21°C , Partly sunny | Kigali-Rwanda
Bosenibamwe Aime, Umuyobozi Mukuru w'Ikigo k'igihugu gishinzwe igororamuco NRS (Foto James R)

Bosenibamwe yagaragaje ibibazo ikigo RNS ayobora gihura nabyo

Yanditswe na MUTUNGIREHE SAMUEL

Ku ya 13-06-2018 saa 05:38:21

Umuyobozi w’ikigo k’Igihugu gishinzwe Igororamuco, RNS, Bosenibamwe Aimé, yatangaje ko mu kazi ko kugorora urubyiruko ruri mu ngaruka zo gukoresha ibiyobyabwenge n’abana b’inzererezi mu bigo bitandukanye biri mu gihugu, bafite imbogamizi zigera no ku bukungu bw’igihugu gikoresha buri kwezi mu kwita kuri abo bantu.

Bosenibamwe Aime, Umuyobozi Mukuru w’Ikigo k’igihugu gishinzwe igororamuco NRS (Foto James R)

Bosenibamwe yavuze ko kugeza ubu hari urubyiruko ruri hagati y’imyaka 14 na 35 bangana na 15 032 bamaze kugororwa, ariko 20% bagarutse kugororwa kuko batabonye uburyo buhamye bwo kubafasha kugira ngo batazasubira muri izo nzira.

Ibyo byose byiyongeraho amafaranga Leta ishyira mu kwita ku buzima bw’abo bantu n’ayo guhemba abakozi ba buri munsi babitaho mu buryo butandukanye aho bamara igihe mu bigo bibafasha gusubira mu buzima busanzwe badakoresha ibiyobyabwenge.

Ati “Tuvuze ko giciro Guverinoma yiyemeje gutunga bariya bana, kubaha ubuvuzi no kubitaho by’umwihariko; bitwara miliyoni 80 ku kwezi ku bari i Wawa gusa, ntushyizemo amafaranga yo guhemba abakozi bagera kuri 80, Gitagata ntidutwara amafaranga ari munsi ya miliyoni 7 ku kwezi, udashyizemo amafaranga polisi ikoresha mu bikorwa byo kubafata n’ayo Umujyi wa Kigali ukoresha mu gutunga abari Gikondo ndetse n’ayo dukoresha tubatunga.  Iyo ukoze ikigereranyo, ubona ko dukoresha arenga miliyari 100 mu mwaka mu gutunga abari muri ibyo bigo”.

Yakomeje avuga ko hari n’ikibazo cyo guhuza ibikorwa by’inzego zitandukanye zifite aho zihuriye no kwita ku rubyiruko.

Hari kandi ikibazo cy’uko nta bushakashatsi burakorwa ngo hamenyekane ibigenda ku miryango y’abari mu ngaruka zo gukoresha ibiyobyabwenge, nta gahunda “National Rehabilitation Curriculum for Harmonization” ihuriweho n’ibigo byose bikora akazi ko gusubiza mu buzima busanzwe abafashwa kureka ibiyobyabwenge bari mu bigo bitandukanye kimwe n’uko nta bigo bihagije by’abikorera bifasha Abanyarwanda babaswe n’ibiyobyabwenge kubivamo kandi bikomeza kugira ingaruka ku buzima n’ubukungu bw’igihugu.

Abo mu nzego z’ubuzima, mu bitaro bisanzwe bivura indwara, bagaragaza ko nk’abaganga babura uburyo bwa gihanga bwo kuvura umuntu wabaswe n’ibiyobyabwenge akava mu ngaruka zabyo akaba muzima hifashishijwe ubuvuzi bw’imiti.

TANGA IGITEKEREZO

Leave a Reply

Your email address will not be published. Required fields are marked *