Bolivie: Perezida w’agateganyo n’abaminisitiri 3 banduye Koronavirusi

Yanditswe na NYIRANEZA JUDITH

Ku ya 10-07-2020 saa 10:39:52
Muri Bolivie, Perezida w'agateganyo Jeanine Añez arimo afatwa ibizami muri Kamena, kuri uyu wa Kane tariki ya 9 Nyakanga hatangajwe ko arwaye koronavirusi (Foto Reuters)

Perezida w’agateganyo w’Igihugu cya Bolivie, Jeanine Añez, yanduye Koronavirusi hamwe n’abaminisitiri batatu barimo Minisitiri ushinzwe Ubucukuzi, Minisitiri muri Perezidansi n’uw’Ubuzima.

Ikindi Jeanine abaye umwe mu bo mu nzego zo hejuru wanduye Koronavirusi, nyuma ya Perezida wa Brésil, Jair Bolsonaro na Perezida w’Inteko Ishinga Amategeko ya vénézuéla Diosdado Cabello.

Ni nyuma y’uko abaminisitiri bagize guverinoma bavuze ko bumvaga banduye mu minsi mike yari ishize. Kugeza ubu igihugu cya Bolivie kirabarurwamo abarwayi ba koronavirusi bagera mu 43 000 n’abamaze guhitanwa na yo 1 600.

Mu butumwa bwagejejwe ku baturage binyuze kuri Twitter Perezida w’agateganyo Jeanine Añez, yatangaje ko yapimwe agasanga arwaye Koronavirusi.

Yagize ati: “Njye nabo dukorana, muri aya mezi ashize twegereye imiryango y’Abanyaboliviya. Mu cyumweru gishize abaminisitiri benshi banduye Koronavirusi, nipimishije nange nsanga ndwaye”.

Jeanine Añez  yabaye uwa kane urwaye koronavirusimuri Guverinoma nyuma ya Minisitiri muri Perezidansi, Minisitiri ushinzwe Ubucukuzi na Minisitiri w’Ubuzima.

Perezida w’agateganyo wa Bolivie Jeanine yavuze ko ameze neza kandi ko azaguma mu kato mu gihe k’iminsi 14 akazongera kwipimisha. Abarwayi ba Koronavirusi muri Bolivie bariyongera ku buryo mu byumweru bitatu, umubare w’abarwayi wikubye kabiri.

Umwanditsi:

NYIRANEZA JUDITH

Tanga Igitekerezo

Email yanyu ntigaragazwa ku rubuga. Amazina na Email ni ngombwa.