27°C , Partly sunny | Kigali-Rwanda
Guverineri wa Banki Nkuru y'u Rwanda John Rwangombwa, asobanura uko uburyo bwo gucunga politiki y'ifaranga bwahinduwe (Foto James R)

BNR yahinduye uburyo yashyiraga mu bikorwa politiki y’ifaranga

Yanditswe na Mutungirehe Samuel

Ku ya 23-12-2018 saa 10:52:15

Banki Nkuru y’u Rwanda, BNR, yatangaje ko yahinduye uburyo yashyiraga mu bikorwa politiki y’ifaranga.

Iravuga ko izajya ibikora bijyanye n’ikerekezo k’igihugu mu iterambere rirambye no mu rwego rwo gufasha abantu kumva neza uburyo barushaho kubona inyungu binyuze mu kwizigamira, gahunda imaze imyaka itanu itegurwa.

Guverineri wa BNR, John Rwangombwa, ubwo yatangazaga iyo politiki nshya (Price-Based Monetary Framework), yavuze ko ije isimbura politiki yari isanzwe guhera mu mwaka wa 1997.

Rwangombwa yasobanuye ko muri politiki yari isanzwe, BNR yasanze mu myaka 20 ishize, kuva mu 1997 kugeza mu 2017, kugwa kw’agaciro k’ifaranga ry’u Rwanda ku isoko kari kuri 6.1% na 1.4% mu mezi 11 agize uyu mwaka wa 2018 bikiyongeraho ko n’igipimo cy’amafaranga abitswa muri za banki cyavuye kuri 15.9% mu 1995 kigera kuri 35.8% umwaka ushize wa 2017.

Ati “Iyo turebye aho ubukungu bwacu bugeze, ni ku rwego rushimishije, rusaba ko dutangira gukoresha uburyo bugezweho mu gucunga politiki y’ifaranga; bitanga ikizere ko twarushaho gucunga neza ubukungu bwacu dukoresheje uburyo bugezweho kandi icyo twijeje abantu ni uko twafashe umwanya w’imyaka itanu mu kubaka ubushobozi nka Banki Nkuru y’u Rwanda, mu bakozi bacu bashinzwe ubushakashatsi, gucukumbura amakuru agendanye n’ibiba mu bukungu.

Ikemezo dufata rero kiba gishingiye ku bushakashatsi bwimbitse kandi butanga amakuru ahamye agaragaza uko ubukungu bumeze cyane cyane tureba n’aho bugana. Ikiza na none ni uko uko ubukungu bwacu bukomera ku rwego rw’igihugu ibikorwa bitandukanye by’inzego za Leta zitandukanye n’ishoramari tubona biduha ikizere cy’uko ibi turimo gukora ari ukuzuzanya n’ikerekezo cya Guverinoma, urugero nka gahunda y’imyaka irindwi (NST1), na twe rero turimo turajya mu mpinduka z’uko dukora na politiki y’ifaranga igendana n’ikerekezo gishya k’igihugu muri rusange.”

Inzobere mu bukungu, akaba no mu kanama gashinzwe politiki y’ifaranga muri Banki Nkuru y’u Rwanda, Prof. Thomas Kigabo, yavuze ko politiki y’ifaranga yari iriho yatumaga amabanki usanga yerekeza cyane imari yayo mu gushaka inyungu ziturutse mu kuzigama bigamije inyungu mu yandi mabanki y’ubucuruzi ariko uburyo bushya buzatuma abantu bizigamira mu mabanki bagamije kubona inyungu nini bitume n’urwego rwo kwizigama ruzamuka bityo banki zibone amafaranga yo kuguriza abantu n’ibigo mu gihe kirekire.

Ati “Iterambere ry’ubukungu mu Rwanda ubu dufite, rimaze guha abantu uburyo bwinshi bwo kwizigamira; ubu abantu bazajya bahitamo uburyo butandukanye bagiye kwizigamiramo. Uko guhitamo bazashingira ku rwunguko bazabona aha cyangwa ahandi. Banki Nkuru y’u Rwanda icyo irimo gukora ubu ni ukuvuga ngo ni ukureba uko dufasha igihugu n’Abanyarwanda guhitamo ubwo buryo butandukanye.”

Ubusanzwe mu kugenzura politiki y’ifaranga nuko ubukungu buhagaze, BNR yagiraga uburyo butandukanye ibikoramo, aho yashoboraga kubona ko amafaranga yabaye menshi mu bantu kurusha ibikorwa ayo mafaranga arimo gukora, ikayakuramo hifashishijwe bumwe mu buryo nko gushyira ku isoko impapuro mpeshwamwenda ariko byose binyuze mu gukorana n’amabanki cyangwa se yaba make nabwo igakoresha ubundi buryo nko gushyiraho igipimo gito cy’urwunguko ku mafaranga BNR ihera amabanki, byose ikabikora mu rwego rwo kwirinda ko habaho gutakaza agaciro k’ifaranga ku isoko.

Guverineri wa Banki Nkuru y’u Rwanda John Rwangombwa, asobanura uko uburyo bwo gucunga politiki y’ifaranga bwahinduwe (Foto James R)

 

TANGA IGITEKEREZO

Leave a Reply

Your email address will not be published. Required fields are marked *