20°C , Partly cloudy | Kigali-Rwanda
Rwangombwa John Guverineri wa Banki Nkuru y'u Rwanda (Foto BNR)

BNR: Urugendo rwo gushyiraho ifaranga rimwe rya EAC rurakomeje

Yanditswe na Sezibera Anselme

Ku ya 08-02-2019 saa 17:42:20

Guverineri wa Banki Nkuru y’u Rwanda (BNR) Rwangombwa John aravuga ko ibihugu byo mu Karere k’Afurika y’Iburasirazuba bikomeje gukora iyo bwabaga ngo bishyireho ifaranga rimwe.

Avuga ko hari intambwe igenda iterwa mu mikoranire ya banki nkuru z’ibihugu byo mu karere kugira ngo habeho ifaranga rimwe, ndetse no guhuza imikorere.

Agira ati: “Igiteganywa gukorwa mu kubaka iryo koreshwa ry’ifaranga rimwe, ni uguhuza kwishyurana mu buryo bworoshye hagati y’ibihugu byacu.

Hakomeje kugenda hazamo imbogamizi kubera ko ubucuruzi bw’ibyo bihugu butandukanye, ibyo buri gihugu kivana mu kindi, n’icyo buri kimwe cyohereza mu kindi biba bitandukanye haba mu mibare n’amafaranga arimo usanga hazamo amadovize bityo kuyakuramo hakaba hakoreshwa ifaranga rimwe rihuriweho n’ibihugu byose bya EAC bikaba bitarakunda”.

Rwangombwa avuga mu nama iheruka y’abaperezida bemeje ishyirwaho ry’urwego rw’akarere rutegura kujyaho kwa banki imwe mu gihe kizaza. Yemeza ko nimara kujyaho izafasha ibihugu byose guhuza ibikorwa byo kugana ku ifaranga rimwe.

Hari ibikorwa bitandukanye bigomba kubanza gukorwa kugira ngo ibihugu bya EAC bibashe guhuza ifaranga rimwe, kandi ngo kubanza guhuza ubucuruzi mu karere, kugira isoko rimwe n’ikintu kimwe cy’ingenzi kizaherwaho mu kuganisha ku ifaranga rimwe.

Agira ati: “Uyu munsi ntabwo biranozwa ngo dutangire kubona urujya n’uruza rw’abantu n’ibintu mu karere bikaba bikiri imbogamizi zituma ikoreshwa ry’ifaranga rimwe ryahita ritangizwa”.

Rwangombwa avuga ko nka banki nkuru z’igihugu zihura cyane mu guhangana n’ibibazo byaba bivutse bishobora guhungabanya ubukungu ndetse bakungurana inama basangizanya uburyo bw’imikorere kugira ngo hirindwe ingaruka zavuka.

Ashimangira ko bakurikirana uko amabanki y’ibyo bihugu uko akora, hakarebwa amategeko agenga urwego rw’imari bigahuzwa mu rwego rw’akarere ku buryo byorohereza umushoramari ugiye muri buri gihugu ku buryo asanga imikorere ari imwe kandi ashimangira ko bigeze ku rwego rwiza, ari na byo byazarushaho gukoresha ifaranga rimwe.

Rwangombwa anavuga ko gahunda yindi BNR yanagabanyije ingendo zakorwaga n’ibigo bya Leta bazana amasheki kuri BNR kuko ubu babikorera ku ikoranabuhanga amafaranga akajya kuri konti z’abo bashaka kwishyura.

Atangaza ko yanateje imbere uburyo bwo kwishyurana hagati y’abantu aho kwinjira mu iduka utanga amafaranga ushobora gukoresha ikarita ukishyura ibyo ugiye kugura, ibyo bikaba bigamije kugabanya imikoreshereze y’amafaranga, kandi iryo koranabuhanga rikaba rinagira uruhare mu kwihutisha iterambere.

Mu kurushaho kongera ingufu z’iyo gahunda telefone ngendanwa zigaragazwa nk’izizagira uruhare runini mu kohererezanyaho amafaranga.

Uretse gahunda BNR yagaragaje iri gukora ikaba inafite ingamba zo guhuza imiyoboro yose ku buryo umuntu ufite amafaranga kuri Mobile Money ya sosiyete ya MTN Rwanda yajya ahanahana n’ukoresho Airtel Money na Tigo Cash.

TANGA IGITEKEREZO

Leave a Reply

Your email address will not be published. Required fields are marked *