17°C , Partly cloudy | Kigali-Rwanda
Guverineri wa Banki Nkuru y'u Rwanda, John Rwangombwa, amurika uko ubukungu bw'igihu gu buhagaze n'uko buzaba bwifashe mu 2019 (Foto James R)

BNR: Izamuka ry’ubukungu rizarenga 7.2% byari biteganyijwe

Yanditswe na Mutungirehe Samuel

Ku ya 21-02-2019 saa 17:46:08

Guverineri wa Banki Nkuru y’u Rwanda BNR, Rwangombwa John, yatangaje ko babona izamuka ry’ubukungu bw’igihugu mu mwaka wa 2018/19 rizarenga igipimo cya 7.2% cyari giteganyijwe.

Arabivuga ashingiye makuru yihuse babona ku bikorwa bimwe by’ubucuruzi byaranze uyu mwaka n’uko mu gihembwe cya kane ubukungu bwari bwifashe neza.

Yabitangaje kuwa 21 Gashyantare 2019, ubwo yashyiraga ahagaragara raporo igaragaza uko ubukungu bw’igihugu buhagaze, muri raporo y’ubusugire bw’urwego rw’imari na politiki y’ifaranga.

Rwangombwa yavuze ko muri rusange umwaka wa 2018 wabaye umwaka mwiza ku bukungu, kuko mu bihembwe bitatu bya mbere byawo bwazamutseho 8.3%.

Mu isesengura nka Banki Nkuru y’u Rwanda ngo basanze na raporo y’igihembwe cya kane igaragaza ko ubukungu bwifashe neza.

Guverineri wa Banki Nkuru y’u Rwanda, John Rwangombwa, amurika uko ubukungu bw’igihu gu buhagaze n’uko buzaba bwifashe mu 2019 (Foto James R)

Rwangombwa yavuze ko bitanga ikizere ko izamuka ry’ubukungu rizarenga umuvuduko igihugu n’Ikigega Mpuzamahanga k’Imari (FMI) bateganyije.

Ati “Iyo turebye imibare twebwe dukurikirana yoroshye kubona, tudakoze ubushakashatsi nk’ubwo ikigo k’Ibarurishamibare NISR gikora mbere yo gutangaza imibare ya nyuma, tubona n’igihembwe cya kane na cyo cyaragenze neza aho ubukungu bwazamutseho 13.1% ugereranyije na 13.7% yo mu gihembwe cyabanje.

Bituma rero tubona ko muri rusange umwaka wose wa 2018 ubukungu bushobora kuzamuka kurusha uko byari byitezwe mbere kuri 7.2%, kuko ubu ibihembwe bitatu bya mbere byari ku 8.3% bivuye kuri 4.6% mu bihembwe nk’ibyo bya 2017 kandi n’igihembwe cya kane aho imibare izabonekera tubona ko bizaba biri hejuru ya 7.2%.”

Rwangombwa yakomeje avuga ko nka Banki Nkuru ikurikirana ibibazo by’ibiciro ku masoko, babona umuvuduko w’ibiciro ku masoko na wo muri uyu mwaka utangiye wa 2019 utazajya hejuru, uzaba uri hafi 3%.

Raporo yagaragaje kandi ko ibigo by’imari biri mu Rwanda bihagaze neza, kuko bifite imari shingiro ihagije, yabifasha guhangana n’ibibazo kandi urwunguko rwabo rwazamutse, imyenda mishya batanga na yo yarazamutse aho mu mwaka ushize wa 2018 yageze kuri miliyari 909 ivuye kuri miliyari zirenga 830.

Umwaka ushize wa 2018 kandi ifaranga ry’u Rwanda ryataye agaciro kuri 4% ugereranyije n’idorari, BNR ikaba ivuga ko bidateye impungenge ku gihugu nk’u Rwanda rukura ibintu hafi ya byose hanze.

Gusa amafaranga aturuka mu bikorwa Abanyarwanda bakorera hanze, ubukerarugendo n’ibindi byafashije ifaranga ry’u Rwanda gutuma ridahungabana cyane kandi n’uyu mwaka bizaba biri muri icyo kigero cya 4 kugeza kuri 4.5%, nk’uko BNR ibyizera.

Muri ibyo byose ariko BNR yagaragaje ko ikigega IMF kerekana ko ku bukungu ku rwego mpuzamahanga mu 2019 ubukungu buzazamuka ku kigero gito cya 3,7 ugereranyije na 3.8% bwazamutseho mu 2018 naho ubukungu bw’Akarere k’Afurika y’Iburasirazuba bukazazamukaho 6.3% mu 2019.

Raporo yagaragaje kandi ko inguzanyo zitishyurwa mu mabanki n’ibigo by’imari zirimo kugabanuka, aho byavuye kuri 8.2% mu 2017 ubu bikaba bigeze kuri 6.5%.

Umuyobozi Mukuru w’Urugaga rw’Abikorera PSF, Robert Bapfakurera, yasabye ko kuva mu 2018 aho abafite ibinyabiziga bazamuriwe ubwishingizi ku binyabiziga hasuzumwa niba bitarafashije gusa ibigo bitanga ubwishingizi kuruta uko bizafasha n’abakora mu bwikorezi bakarushaho guhomba.

TANGA IGITEKEREZO

Leave a Reply

Your email address will not be published. Required fields are marked *