18°C , Mostly cloudy | Kigali-Rwanda
Rwangombwa John Guverineri wa Banki Nkuru y'u Rwanda (Foto BNR)

BNR: Inoti z’amafaranga 500 twasabye banki kuzitanga–Rwangombwa  

Yanditswe na KAYITARE JEAN PAUL

Ku ya 29-09-2018 saa 10:58:07

Nyuma y’aho bamwe mu baturage hirya no hino mu Mujyi wa Kigali bagaragaje ko hari ikibazo k’ibura ry’inoti y’amafaranga Magana atanu ku isoko, Guverineri wa Banki Nkuru y’u Rwanda (BNR), Rwangombwa John, yasabye amabanki ko yatanga inoti za magana atanu mu bakiriya bayo kugira ngo izo noti zongere kuboneka ku isoko.

Rwangombwa John Guverineri wa Banki Nkuru y’u Rwanda (Foto BNR)

Ibi yabigarutseho mu kiganiro ubuyobozi bwa Banki Nkuru buherutse kugirana n’itangazamakuru, ubwo hatangazwaga uko ubukungu bw’igihugu buhagaze. Guverineri Rwangombwa yavuze ko kugeza ubu, ubukungu bw’u Rwanda buhagaze neza kandi ko nta kibazo kiragaragara gishobora gutuma ubukungu bujegajega.

Asobanura ikibazo k’ibura ry’inoti y’amafaranga Magana atanu (500Frws) ku isoko, Rwangombwa asobanura ko amabanki yasabwe gutanga amafaranga y’inoti za Magana atanu kugira ngo zongere kugaragara ku isoko ndetse no mu baturage.

Ati “Ikibazo cy’uko inoti z’amafaranga Magana atanu zabuze turakizi. Twasabye banki zose ko zatanga izo noti za magana atanu kugira ngo zigere mu baturage zikoreshwe ariko natwe izo twari dufite muri Banki Nkuru twarazohereje.”

Kalinganire Joseph umucuruzi ukorera mu isoko rya Nyabugogo mu karere ka Nyarugenge mu Mujyi wa Kigali, avuga ko kugeza ubu batazi ikibazo cyabayeho kugira ngo inoti z’amafaranga Magana atanu zibure ku isoko, akongeraho ko bagorwa no kubura uko bagarurira abakiriya bagahitamo kubaha ibiceri.

Ati “Inoti z’amagana atanu zarabuze ntituzi ikibazo cyabayeho ahubwo ababishinzwe badufasha bagakemura iki kibazo kuko mu bakora ubucuruzi nka twe biratugora kubona ayo tugarurira abakiriya bacu, ugasanga ahubwo tubahaye ibiceri byinshi.”

Vuguziga Annonciata utuye mu murenge wa Gatenga mu karere ka Kicukiro ahazwi nka i Gikondo MAGERWA, na we ashimangira ko inoti za Magana atanu zabuze. Ati “Twe ntituzi uko byagenze, niba abacuruzi bazitwara muri banki hanyuma banki na zo ntizigarure mu bakiriya bazo, sinzi uko byagenze. Ku isoko bigaragara ko nta noti za magana atanu zihari kuko zarabuze.”

Ntaganzwa Valence na we utuye mu karere ka Kicukiro ahamya ko inoti z’amafaranga Magana atanu zabuze. Ati “Inoti za Magana atanu zarabuze ahubwo nihagire igikorwa zongere zigaragare ku isoko. Ujya guhaha bajya kukugarurira ugasanga baguhaye umurundo w’ibiceri byinshi, kubitwara bikakubera ikibazo.”

Mu gihe banki zatanga inoti z’amafaranga magana atanu mu bakiriya bazo nkuko ubuyobozi bwa BNR bwabitangaje, ikibazo k’ibura ry’inoti ya magana atanu cyaba gikemutse.

 

 

TANGA IGITEKEREZO

Leave a Reply

Your email address will not be published. Required fields are marked *