16°C , Partly cloudy | Kigali-Rwanda
Umuyobozi Mukuru wa BK Group PLC Dr Karusisi Diane (Foto Gisubizo G.)

BK Group PLC igiye kwagurira ibikorwa byayo muri Kenya

Yanditswe na SEZIBERA ANSELME

Ku ya 02-09-2018 saa 07:41:06

Mu rwego rwo kwagura ibikorwa byayo, Umuyobozi Mukuru wa BK Group PLC Dr Karusisi Diane, arahamya ko iyo banki igiye kwerekeza ibikorwa byayo ku isoko ry’imari n’imigabane mu mujyi wa Nairobi muri Kenya kugira ngo babashe kwegera abanyamigabane benshi batabashaga kugera i Kigali kandi hanagamijwe kuzamura inyungu yabonaga.

Umuyobozi Mukuru wa BK Group PLC Dr Karusisi Diane (Foto Gisubizo G.)

Ibyo Dr. Karusisi yabigarutseho ubwo ubuyobozi bw’iyo Banki ya BK Group bwagiranaga ikiganiro n’abanyamakuru mu rwego rwo kubatangariza ibyagezweho mu gihembwe cya mbere cy’umwaka wa 2018 cyagarukiye muri Kamena uyu mwaka wa 2018.

Dr Karusisi avuga ko ibikorwa bijyanye no kwitegura bigeze kure kandi bigenda bigerwaho ku buryo atanga ikizere cy’uko bitarenze uyu mwaka wa 2018 bizaba byagezweho.

Avuga ko ukw’ibikorwa bya banki bigenda byaguka ari nako igomba kwiyegereza abantu benshi bakangurirwa kongera imigabane kuko ibikorwa banki igamije gutera inkunga bigenda biba byinshi.

Dr Karusisi avuga ko mu gihe BK Group PLC izaba imaze kugeza isoko ry’imari n’imigabane i Nairobi muri Kenya biteze kuzabona abaguzi benshi mu karere baruta ab’i Kigali ku bijyanye n’isoko ry’imigabane.

Atangaza ko umujyi wa Nairobi umaze gutera imbere kandi ufite abantu benshi baguriramo imigabane, bikaba bitanga ikizere cy’uko bazaha amahirwe abo bantu badashobora kuza i Kigali kuko bazaba babasanze aho bakorera kandi n’igiciro k’imigabane ya BK Group ikazungukiramo kuko izaba yabonye abantu benshi.

Itangazamakuru ryifuje gutangarizwa inyungu BK Group iteganya kubona igihe izaba yamaze kwagura ibyo bikorwa byayo muri Kenya, umukozi ushinzwe ibikorwa by’ubucuruzi Gatete Vincent agaragaza ko icyo gikorwa kitezweho gutuma banki izamura imari shingiro yayo ikiyongeraho hagati ya miliyoni 60-70 z’amadolari y’Amerika.

Mu ngamba z’iyo banki kandi nk’uko binashimangirwa n’umuyobozi ushinzwe imari Mpaka Nathalie, atangaza ko BK Group PLC  ifite intego yo kuzunguka miliyari 28 z’amafaranga y’u Rwanda mu gice cya kabiri cy’uyu mwaka wa 2018.

 

 

TANGA IGITEKEREZO

Leave a Reply

Your email address will not be published. Required fields are marked *