22°C , Mostly cloudy | Kigali-Rwanda

Bizimungu Ally ari mu batoza bifuza gutoza KMC yo muri Tanzania

Yanditswe na Bugingo Fidèle

Ku ya 13-01-2020 saa 10:11:41
Bizimungu Ally uri mu batoza bifuza gutoza ikipe ya KMC

Umutoza ukomoka mu Rwanda, Bizimungu Ally umaze imyaka ibiri atoza muri Tanzania ari mu batoza batanze ubusabe bwabo bwo gutoza ikipe ya KMC (Kinondoni Municipal Council FC) mu kiciro cya mbere muri Tanzania.

Iyi kipe ikinamo Mugiraneza Jean Baptiste “Migi”  wakiniye ikipe ya APR FC, Kiyovu n’ikipe y’igihugu “Amavubi”  yatandukanye n’uwari umutoza mukuru  Jackson Mayanja.

Bizimungu Ally yemeje ko yatanze ibisabwa muri ikipe ariko agitegereje kuko  haba hasabye abatoza benshi.

Undi mutoza nawe watoje mu Rwanda bivugwa ko yasabye uvugwa muri iyi kipe ya KMC ni Okoko Godefroid  ukomoka mu Burundi kuri ubu akaba ari umutoza  wungirije muri Namungo FC yo muri Tanzania. Okoko yatoje amakipe atandukanye mu Rwanda arimo Mukura, Amagaju FC, Musanze FC, Gicumbi FC na Espoir FC.

Mu myaka ibiri Bizimungu Ally amaze muri Tanzania kuva mu 2017  yatoje ikipe ya Mwadui FC yo mu kiciro cya mbere  ubu akaba arimo kubarizwa muri Zanzibar, aho yafashaga ikipe ya Malindi FC gukora ijonjora ry’abakinnyi ishaka kugura.

Bizimungu mu Rwanda yanyuze mu makipe atandukanye kandi akomeye   arimo Kiyovu yatoje ubugira gatatu  Mukura, Rayon Sports, ATRACO FC, AS Muhanga, Bugesera FC.

Uyu mutoza ni we watinyuye abatoza b’Abanyarwanda kujya gutoza hanze y’u Rwanda ni we wagiye bwa mbere muri Tanzania nyuma hajyayo abandi na Hitimana Thierry na Kayiranga Baptiste.

Ikipe ya KMC iri ku mwanya wa 17 mu makipe 20 agize shampiyona ya Tanzania, aho ifite amanota 14, mu mukino 16 imaze gukina yabashije gutsinda 3 inganya 5 itsindwa imikino 8.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.