19°C , Partly cloudy | Kigali-Rwanda

Bizimana wakiniye  APR FC akanayitoza  arasaba abakinnyi gutekereza cyane ku kazi

Yanditswe na BIZIMANA ERIC

Ku ya 30-09-2018 saa 08:58:32

Bizimana Didier, umutoza wungirije  muri  APR FC akaba yaranahoze ari kapiteni w’iyi kipe  arasaba abakinnyi bo muri iyi myaka kurushaho gutekereza cyane ku kazi kabo aho kuba imbata z’imbuga nkoranyambaga n’ibindi byose bibarangaza.

Bizimana Didier wakiniye APR FC ubu akaba amaze imyaka 6 ari umutoza wungirije muri iyi kipe

Ibi yabisobanuriye Imvaho Nshya mu kiganiro kirambuye ku rugendo rwe nk’umukinnyi w’umupira w’amaguru  ndetse n’umutoza.

Ubuzima bwa Bizimana

Yahoze ari myugariro wa APR FC kuva mu 1995 kugeza mu 2007 agirwa kapiteni wayo mu 2003 nyuma y’itoroka ry’uwari kapiteni wayo Nsengiyumva Janvier. Yanagarutse muri APR FC mu 2012 aza kuba umutoza wungirije wa APR FC kugeza ubu.

Bizimana  yaje mu Rwanda mu 1995 aturutse i Burundi aho yari avuye mu gikombe k’isi cy’abatarengeje imyaka 20 cyabereye muri Qatar aho yagiye mu mwenda w’ikipe y’igihugu cy’u Burundi. Yanakomeje guhamagarwa mu ikipe nkuru y’u Burundi akinira APR FC.

Bizimana avuga ko ari Umunyarwanda ukomoka kuri nyakwigendera Rukimira Joseph wavukiye i Nyanza mu Rwanda akagwa  i Burundi na Mukangarambe Albertine wavukiye i Muhanga  ubu akaba atuye i Kigali. Yabonye izuba tariki 05 Ugushyingo 1978 mu Bwiza i Bujumbura mu Burundi.

Yakiniye Prince Louis y’i Bujumbura kuva mu 1992 kugeza mu 1995, akinira APR FC (1995-2007) na Bukavu Dawa yo muri RDC  (2007-2012).

Yanakiniye u Burundi mu gihe yari Umunyarwanda kubera amategeko ya CAF atarabyemeraga. Bizimana ati “Nkigera mu Rwanda bashatse ko nakinira ikipe y’igihugu Amavubi ariko CAF itegeka ko kugira ngo nkinire u Rwanda bisaba ko u Burundi bwandika ibaruwa igaragaza ko buhariye u Rwanda,   ibyo ntibyari gushoboka. Urumva imbogamizi zabaye kuba nta mategeko yari ahari yemerera umuntu gukinira ikipe y’igihugu yarakiniye ikipe nto”.

APR FC yazirikanye imyaka babanye imugira umutoza

Bizimana wabaye igihe kirekire muri APR FC nyuma yo guhagarika gukina yaje kwegerwa n’abayobozi ba APR FC  bamusaba kugaruka iwabo akaba umutoza.

Ati “Nagiye gutoza kuko nakundaga umupira mpagarika nkiwukunze numva ko najya kuwutoza. Na mbere yo kuwureka abayobozi ba APR FC ni bo ubwabo bambwiye ko mbishatse nareka  umupira bakampa akazi  kuko babonaga mfite impano yo gutoza. Ikindi iyo umuntu akina uhita ubona imyumvire n’imitekerereze ye ugahita ubona ko abaye umutoza byamworohera. Ndabashimira”.

Bizimana  yinjiye  mu butoza adafite urupapuro na rumwe ariko ubu amaze kugera kuri Licence B ya CAF n’impamyabushobozi yo gukoresha imyitozo ngororamubiri ya FIFA.

Amaze imyaka 6 ari umutoza wungirije ushinzwe imyitozo yo kongerera ingufu abakinnyi

Bizimana asobanura ko mu myaka itandatu amaze muri APR FC yakoranye n’abatoza benshi kandi b’abahanga bamwigishije.

Yemera ko rimwe azageraho akaba umutoza mukuru kuko ubumenyi abufite nubwo buri kintu kizira igihe cyacyo. Ati “Urwego mfite si urwego rubi pe biturutse ku batoza nakoranye na bo. Nta myaka byo nabiha, gusa mfite intego yo gutera  imbere. Ariko ikintu cyose kiba gifite igihe cyacyo. Ni igihe mba ntegereje, igihe nikigera ni ibyo.Igihe ni kigera nzakora. Icyo wowe ureba ni ugukora , abatoza baraza bakanyongerera ubumenyi”.

Abakinnyi b’ubu ntibatekereza ku kazi kabo

Mu bunararibonye bwe, Bizimana avuga ko abakina ubu bafite amahirwe yo kugaragara kuri za televiziyo mu gihe bo batigeze bayagira.

Ati “Twe twakinnye kera ubu bo bari mu isi igezweho, bo bafite amahirwe menshi cyane. Twe twarakinaga ariko kugira ngo ubone byibuze  n’amashusho  yawe byari ikibazo. Uyu munsi ariko umuntu arakina ataranagera mu rugo agasanga amaze kubona  amashusho y’umukino  kuri Youtube. Bo bari mu kerekezo”.

Ku rundi ruhande yemera ko iterambere ry’ubu rituma bamwe mu bakinnyi barangarira cyane ku mbuga nkoranyambaga aho kwita ku kazi kabo, banatekereza ibyo bahindura.

Ati “Twe twabarushaga gutekereza ku kazi kacu cyane, impano zirahari  ikibazo ariko ntibatekereza ku kazi kabo, hahandi urangiza imyitozo ukitekerezaho , ukareba uburyo witoje, amakosa wakoze n’umutoza yaza kugukosora ugasanga nawe witekerejeho ugasanga n’umutoza biramworoheye kuko nawe ubyumva kubera ko ari ibintu uba watekerejeho cyane. Icyo nabonye bakora imyitozo ibindi bakabisiga ku kibuga ntibafate umwanya ngo bitekerezeho”.

Akomeza agira  ati “Ni yo mpamvu mvuga ngo twakinnye mu bya kera  hari ibintu byinshi twe tutari dufite. Izo mbuga nkoranyambaga ziri kubarangaza. Ariko ni igihe cyabo . Ni ibihe gusa bikomeye muri iki gihe”.

Ubu umupira wagutunga bitandukanye na kera

Mu buhamya bwe kandi, Bizimana yerekana ko abakinnyi b’ubu bakwiye guha cyane agaciro akazi kabo kuko gashobora kubatunga bagakoze neza bitandukanye no mu gihe cyabo.

Ati “Twe dukina abantu bumvaga ko umupira ari ikintu cyo kwishimisha bitari umwuga  umuntu yavugaga umukinnyi ukumva ni umuntu umeze nk’umukarasi uri aho,  hahandi wanamusuzuguraga ariko ubu abantu bamaze kumva ko kwitwa umukinnyi ari akazi gakomeye ,  gahemba neza ku buryo abantu basigaye babiha icyubahiro. Igihe cyacu wavaga mu rugo ubabwiye ko ugiye gukina bakaguseka ariko ubu n’umubyeyi atoza umwana we akiri muto iby’umupira ari na byo byerekana ko n’ababyeyi bamaze kubona ko mu mupira harimo inyungu”.

Bizimana Didier  yishimira ko yagize amahirwe yo kubaka inzu atuyemo mu Mujyi wa Kigali kuko ari byo yari afite muri gahunda. Ati “Nubatse inzu nyikesha umupira mu mafaranga nahembwe nkina muri APR FC. Abakinnyi ba kera ntibajyaga muri gahunda yo kuvuga ngo bagura inzu, gahunda zabo zari  ukujya iyo mu Burayi cyangwa muri Afurika y’Epfo nta kindi”.

Ashyigikira cyane politiki ya APR FC

Bizimana  wabaye ikirangirire muri APR FC ashima politiki yafashwe n’ubuyobozi bwa APR FC mu 2011 yo gukinisha gusa abana b’Abanyarwanda nubwo na bo basabwa kubiharanira.

Ati « Biriya bintu ni byiza . Kuvuga ngo babona abo bareberaho, Televiziyo zirahari iyi gahunda bakoze ni nziza , igihari gusa n’aba bana bakwiye kwitekerezaho igihe kinini, ubushobozi bwo gukina bwo barabufite, bagomba kugira ikintu k’ishyaka  na bo bakigaragaza ».

Mu gusoza, avuga ko  aba bana  bagoma gufata umwanya munini bagatekereza ku kazi kabo k’umupira bakumva ko ari akazi kuko ubu umupira  utunga  umutu.

 

TANGA IGITEKEREZO

Leave a Reply

Your email address will not be published. Required fields are marked *