18°C , Mostly cloudy with thunderstorms | Kigali-Rwanda
Stromae ufite inkomoko mu Rwanda yizihije imyaka 33

Bimwe mu byaranze ubuzima bwa Stromae wizihije isabukuru y’imyaka 33

Yanditswe na SHEMA CHRISTIAN

Ku ya 13-03-2018 saa 07:14:29

Paul Van Haver wamenyekanye cyane ku izina ry’ubuhanzi rya Stromae yavutse tariki ya 12/03/1985 yizihije isabukuru y’imyaka 33 ishize abonye izuba.

Stromae yavukiye i Bruxelles mu Bubiligi kuri se w’umunyarwanda witwaga Rutare Pierre wishwe muri Jenoside yakorewe Abatutsi muri Mata 1994 na nyina w’umubiligikazi witwa Miranda Marie Van Haver ari nawe wamureze cyane.

Stromae ufite inkomoko mu Rwanda yizihije imyaka 33

Uyu musore w’amateka akomeye yatangiye kwamamara cyane mu Bubiligi ahagana mu mpera z’umwaka wa 2009 nyuma yo gusohora indirimbo ye ‘Alors on danse’ yaje gukundwa cyane muri iki gihugu no mu bindi bihugu by’u Burayi n’Afurika bikoresha igifaransa.

Stromae yatangiye gukunda umuziki akiri umwana muto cyane. Ku myaka 11, ni ho Stromae yerekeje mu ishuri rya muzika rya Académie Musicale de Jette, yiga amateka y’umuziki no kuvuza ingoma. Kuri ubu Stromae ni Umwanditsi w’indirimbo ndetse akanaririmba mu njyana ya Hip Hop na Electronic music, uyu kandi azi ibijyanye no kuyobora ndetse no gutunganya indirimbo mu buryo bw’amajwi n’amashusho ari na byo muri iyi minsi yibandaho cyane.

Mbere gato y’uko amenyekana cyane ku ruhando rwa muzika mpuzamahanga nka Stromae, uyu musore mu 2000 yagaragaye nk’umuraperi yitwa Opsmaestro, iri zina akaba yararihinduye nyuma yaho gato afata iri zina rya ‘Stromae’ yamenyekaniyeho cyane.

Ku myaka 18 y’amavuko, yashinze group yitwa “Suspicion” ikora injyana ya Rap, afatanyije n’umuraperi J.E.D.I. muri Eichof. Bakoze indirimbo z’amajwi n’amashusho harimo nka ‘Faut que t’arrête le Rap…’, gusa nyuma yaho gato, uyu mugenzi we J.E.D.I. yafashe ikemezo cyo kuva muri iryo tsinda.

Mu rwego rwo guteza imbere amasomo ye, yakoraga igice cy’umunsi mu ruganda rukora ibijyanye no gutanga serivisi, ariko amasomo ye ntabwo yagendaga neza. Nyuma yaho gato, yiyandikishije muri Institut National de Radioélectricité et Cinématographie, ni bwo yashyize alubumu ye ya mbere hanze ayita ”Juste un cerveau”

Mu 2008 yasinye amasezerano y’imyaka 4 akorana n’amazu akora umuziki yitwa “Because Music” ndetse na “Kilomaître”. Mu 2009 yakoze amahugurwa kuri radio y’umuziki NRJ y’i Buruseli. Vincent Verbelen, Manager w’umuziki, yatangajwe n’impano Stromae afite ubwo yashyiraga ahagaragara indirimbo ye yise ‘Alors on danse’ maze afata ikemezo cyo kuyicisha kuri radio NRJ. Abantu bumvaga iyo radio (harimo abantu bakomeye nka Anna Wintour, Jean-Claude Vandamme, The Rock, ndetse n’uwahoze ari perezida w’u Bufaransa Nicolas Sarkozy…) byarabashimishije cyane maze ubwo  Stromae aba atangiye kumenyekana  ubwo, aho yahise aza ku mwanya wa mbere mu Bubiligi mu byumweru bike.

Vertigo Records, ikaba ari inzu y’umuziki ya Mercury Records yo mu bufaransa (Zose zikaba ziri muri Universal Group) Bahise bamusinyisha amasezerano mpuzamahanga nyuma yaho gato amaze gukora ayo mateka ku bw’indirimbo ye yise “Alors on danse”.

Mu kwezi kwa 5 mu 2010 iyi ndirimbo ye ‘Alors on danse’ yagiye ku mwanya wa mbere mu Bubiligi, mu Bufaransa, mu Buholandi, mu Bugiriki, mu Budage, Otirishe, Turukiya, mu Busuwisi, mu Butaliyani, Danimarike, Romaniya ndetse na Repuburika ya Czech. Ku itariki 2 Nzeri, Stromae yakoranye indirimbo n’igihangange muri muzika Kanye West basubiramo indirimbo ye (remix) ‘Alors on danse’.

Mu 2010 ubwo yari afite alubumu imwe yise ‘Cheese’, yatoranyijwe nk’Umudage cyangwa Umubiligi witwaye neza (Best Dutch and Belgian Act) muri MTV Europe Music Awards. Kuva ubwo kugeza magingo aya Stromae yarakoze cyane agira ibihangano byinshi byakunzwe kuri alubumu ye ya kabiri yise ‘Racine carrée’ nka Papaoutai na Formidable. Hamwe n’izi alubumu ze ebyiri yegukana ibihembo mpuzamahanga byinshi ndetse yitabira ibitaramo bikomeye mu bice bitandukanye by’Isi.

Stromae akomoka ku mubyeyi w’umunyarwanda ndetse benshi batemezaga ko uyu musore yaba afite Inkomoko mu Rwanda yabibemeje ubwo yasorezaga uruhererekane rw’ibitaramo yakorerega hirya no hino ku Isi maze akigera ku rubyiniro avuga ijambo ritazibagirana mu mitima ya benshi aho yagize ati: ”Ku nshuro ya mbere ndashaka kugira ikintu ntura Data mbikoreye mu gihugu cyamubyaye urakoze papa” ahita aririmba indirimbo ye PapaOutai.”

Stromae yageze mu Rwanda aje gukora igitaramo tariki ya 17 Ukwakira 2016 igitaramo cyabereye muri stade ya kaminuza yigenga ya Kigali (ULK), igitaramo yatuye se umubyara by’umwihariko.

 

 

 

TANGA IGITEKEREZO

Leave a Reply

Be the First to Comment!

avatar