18°C , Mostly cloudy with showers | Kigali-Rwanda

Bimwe mu byagufasha kwirinda indwara yo guturika kw’imitsi y’ubwonko (Igice cya kabiri)

Yanditswe na Tumukunde Georgine

Ku ya 07-11-2019 saa 08:07:37
Indwara y'umuvuduko w'amaraso iri mu zizi cyane muri Afurika zitera kwangirika k'ubwonko (stroke)

Kwangirika kw’igice cy’ubwonko biturutse ku mitsi yaturitse cyangwa se yifunze  kubera utubumbe twagiye twomoka ku mitsi (Accident Vasculaire Cérébral/ Cerebrovascular Accident/ Stroke),  biterwa ahanini n’indwara umuntu asanganwe,  mu zizwi cyane muri Afurika  ni umuvuduko w’amaraso.

Izindi zishobora kubitera ni  diyabete no kugira ibinure byinshi, hari kandi n’ibindi bishingiye ku myitwarire y’umuntu nko kunywa itabi, kunywa inzoga nyinshi, n’ibindi bituma umutima utera nabi nk’indwara y’umwingo,…

Ni uburwayi budafitanye isano n’umunaniro nk’uko byasobanuwe na Dr. Kabakambira Jean Damascène ukuriye  Ishami ry’ubuvuzi bw’indwara z’imbere mu mubiri mu Bitaro bya Kaminuza bya Kigali (CHUK).

Ubushize Imvaho Nshya yabagejejeho uburyo iriya ndwara y’umuvuduko w’amaraso ishobora gutuma imitsi yo mu bwonko yangirika, ubu irabagezaho ibyafasha umuntu kwirinda n’ubuvuzi buhabwa uwahuye n’uko kwangirika kw’imitsi gutuma igice cy’ubwonko cyangirika(Stroke).

Hari abibaza niba “Stroke” ivurwa igakira

Kuri iki kibazo bamwe bibaza, Dr. Kabakambira avuga ko iyi ndwara ishobora kuvurwa igakira, ariko iyo yafashe igice kinini cy’ubwonko uwayirwaye akenshi iramuhitana.

Yagize ati: “Iriya ndwara aho ibera mbi; iyo yafashe igice kinini cy’ubwonko, guhumeka bikanga, ubwonko bukangirika, akenshi iraguhitana, iyo idahise iguhitana ako kanya haba hari amahirwe ko ushobora gukira”.

Yakomeje agira ati: “Hari imiti tuguha bikajyana no kukwitaho kuko ntuba ufite ubwenge; uburyo wamiraga ibiryo ukabiboneza neza mu rwungano ngogozi noneho biba bishobora kuyoba bikajya mu bihaha,…Ibyo akenshi ni byo bihitana abantu mu gihe kirekire iyo itahise ibahitana”.

Kuri ubwo bufasha umurwayi ahabwa hiyongeraho n’ubwo kumugorora buhoro buhoro kugira ngo ibice byagagaye byongere bikore.

Ati: “Hari abakira ariko bagasigara bacumbagira, hari n’abakira burundu ntube wamenya ko bayirwaye, biterwa n’igice cy’ubwonko cyari cyarangiritse”.

Iyo ubashije kubona uburyo bwo kwitabwaho bwiza, ushobora kubaho. Mu gihe hari ugaragaje ibimenyetso by’iriya ndwara, aba agomba guhabwa ubutabazi bwihuse, akajyanwa kwa muganga.

Ati: “Igihe agereye kwa muganga ni byo bizagira uruhare mu kuba yabaho, iyo tugize amahirwe akatugeraho kare ataramara amasaha 4 bibaye, nko mu bitaro bikomeye mu Gihugu, hari imiti dukoresha niba ari agatsi kazibye ihita igenda igasya akanonko karimo amaraso agahita agenda, ubwonko buba butarapfa, iyo ariya masaha yarenze nta bwo tubikora.”

Dr. Kabakambira avuga ko iyi ndwara yo kwangirika k’ubwonko iri mu zica cyane.

Ati: “Hari abaganga bakoze ubushakashatsi hano  mu Rwanda; twabonye ko abarenga  60% bayirwaye bapfuye, ni ukuvuga ko mu bantu 10 bayigize  6 barapfa, ni ndwara yica cyane, ibyoroshye ni ukuyirinda aho kuvuga ngo uzayivuza”.

Dr. Kabakambira Jean Damascene ukuriye Ishami ry’ubuvuzi bw’indwara z’imbere mu mubiri muri CHUK

Bumwe mu buryo bwo kwirinda

Ibyagarutsweho bitera iriya ndwara ni ibintu umuntu yagira icyo akoraho kugira ngo bihinduke yirinde, ariko hari n’ibindi bidashobora guhinduka nk’imyaka, kuko uko umuntu akura aba afite ibyago byo guhura n’uburwayi butandukanye.

Kwita ku mirire

Mu byafasha umuntu kwirinda ziriya ndwara ari zo ntandaro yo kwangirika k’ubwonko harimo kunoza imirire.

Dr. Kabakambira ati: “Mu ndwara zitandura ari zo diyabete, umuvuduko w’amaraso, za kanseri, asima n’izindi, izo dufiteho uruhare twebwe ku myitwarire yacu ni umuvuduko w’amaraso na diyabete, cyanecyane nka Diyabete ( ubwoko bwa kabiri) ahanini ishobora kubaho bitewe n’uburyo umuntu yitwaye.”

Yakomeje agira ati: “Diyabete ishobora kuza bitewe n’uko urya cyangwa unywa isukari nyinshi, umubiri ukayihinduramo ibinure, uko ugira ibinure byinshi, umusemburo wagombye kuba ugabanya ya sukari urananirwa, noneho ukanaba mukeya mu mubiri ukarwara diyabete.”

Avuga ko iyo diyabete igeze mu mubiri yica udutsi duto aho turi hose, mu maso, mu mutima mu mpyiko, mu myanya ndangagitsina  n’ahandi, kuzageza ubwo muri utwo dutsi hazamo utunonko cyangwa se utubumbe.

Ati: “Ibijyanye n’imirire ni ingenzi cyane mu kwirinda ziriya ndwara.”

Yasobanuye  ko ibyo umuntu agomba kurya kurushaho ari imboga n’imbuto nyinshi, akirinda isukari, inyama akayirya rimwe na rimwe.

Atanga ingero zo kuba umuntu ashobora kujya muri resitora agasanga batetse umuceri mu buryo butandukanye, ibirayi mu buryo butandukanye n’ibindi binyamafufu,  aho guhitamo ubwoko bumwe ugasanga yabyiyaruriye byose.  Ibi ngo biba ari ukwiyongerera isukari mu mubiri no kwiyongerera ibiro.

Ati : “Ntugomba kuvanga ibyo bintu byose kuko bikora kimwe, ushobora kurya kimwe uyu munsi ahubwo ugashyiraho imboga nyinshi, ukongeraho imbuto, ni bwo uba uriye neza.”

Gukora siporo

Dr. Kabakambira avuga ko gukora siporo ari ngombwa cyane. Ati: “Ni yo mpamvu duhora tugira inama abantu yo gukora siporo kuko iyo bayikoze amaraso atembera neza, ntihabeho turiya tubumbe dufunga imitsi yo mu bwonko, bikagabanya ibinure bitera biriya bibazo byose, kandi bakanipimisha, umenye ko afite diyabete, n’izindi ndwara akavurwa hakiri kare.”

Ikindi ni ukwirinda kwicara igihe kinini. Ati: “Usanga umuntu ahera mu gitondo saa mbiri ageze ku kazi akicara  kuri  mudasobwa agahaguruka saa kumi n’imwe atashye, ni bibi, buri masaha abiri wagombye guhaguruka ukagendagenda, amaraso akongera agatembera.”

Kugenzura  ibiro wirinda ko biba byinshi cyane na byo ni byiza.  Avuga ko nibura  umuntu ureshya na m1,60 atagombye kurenza ibiro 60, ufite  m 1,70 ntarenze 70,…

Ikindi ni ukwirinda umubyibuho ukabije cyane cyane uw’inda kuko ari intandaro ya diyabete.

Asobanura ko buri wese yakora siporo ashoboye; akaba yanakora urugendo n’amaguru yihuta, akagenda intambwe nibura ibihumbi 10 ku munsi; ni ukuvuga ibirometero bigera kuri 7,6, cyangwa akagenda  iminota 30 ku munsi, akageza ku minota 150 mu cyumweru.

Abakiri bato bakora siporo zisaba imbaraga bakabira ibyuya basabwa gukora iminota 75 mu cyumweru.

Uriya muganga avuga kandi ko abantu badakwiye kwibeshya ko siporo ituma umuntu atakaza ibiro ahubwo bitakara bitewe n’uko yita ku   mirire ye, siporo icyo ikora ni ugutunganya imitsi, amaraso agatembera neza, imyanda igasohokera mu byuya. Hari abava muri siporo bakarya cyane, bakarya byinshi kurusha ibyo batakaje kandi  ubundi  ibyo umuntu arya avuye muri siporo bigomba kuba  biri munsi y’ibyo yatakaje.

Izindi nama atanga

Mu gihe hari uwahuye na ziriya ndwara zavuzwe haruguru zishobora gutera “stroke” ni ugukora ku buryo abaganga bamukurikiranira hafi, bagapima isukari, bakareba n’umuduko w’amaraso uko bihagaze.

Dr. Kabakambira ati: “Ufite ziriya ndwara ni ugukora ku buryo ajya kwa muganga  bakamubwira niba isukari imeze neza, niba umuvuduko umeze neza, ariko ibyo kugira ngo bimere neza ni uko aba yarabyipimishije azi ko abifite.”

Ni yo mpamvu umuntu mukuru wese urengeje imyaka 35 akwiye kuba yipimisha nibura buri mwaka bakereba isukari ye dore ko ari n’ikizamini gihendutse, gupima umuvuduko w’amaraso byo ni ubuntu. Ati: “Buri wese yagombye kumenya uko ahagaze ku bijyanye na ziriya ndwara.”

Uko imitsi yo mu bwonko iziba bishobora no kuba ku yo mu mutima kandi biragoye ko  uwahuye n’icyo kibazo abaho. Ibi na byo bituruka kuri ziriya ndwara z’umuvuduko w’amaraso na diyabete.

Dr. Kabakambira Jean Damascene ukuriye Ishami ry’ubuvuzi bw’indwara z’imbere mu mubiri muri CHUK, avuga ko ziriya ndwara zavuzwe haruguru zirimo kwiyongera cyane zihangayikishije Isi, zihitana benshi zikanatwara amafaranga menshi mu kuzirinda, kuzisuzumisha no mu buvuzi bwazo.

Avuga ko serivisi zijyanye no kuvura ziriya ndwara  aho umuntu atuye hose mu Rwanda ashobora kuzibona ku mavuriro amwegereye, usuzumwe bakazimusangamo ashobora kubona imiti, bivuze ko ntawukwiye kugira urwitwazo rwo kutivuza.

Umwanditsi:

Tumukunde Georgine

Tanga Igitekerezo

Email yanyu ntigaragazwa ku rubuga. Amazina na Email ni ngombwa.