19°C , Mostly cloudy | Kigali-Rwanda

Bimera bite kuba Perezida?… igisubizo cya Perezida Kagame

Yanditswe na NTAWITONDA JEAN CLAUDE

Ku ya 10-07-2020 saa 18:52:26

“Ntabwo kuba Perezida ari akazi umuntu asaba.” Aya ni amagambo Perezida wa Repubulika y’u Rwanda Paul Kagame, yagarutseho mu kiganiro yagiranye n’abavuga rikijyana ku mbuga nkoranyambaga (social media influencers), cyagarutse ku ngingo zitandukanye zifite izingiro ku rugendo rw’u Rwanda rwo kwibohora mu myaka 26 ishize.

Icyo kiganiro cyagarutse ku ngingo zirebana n’iterambere ry’u Rwanda, uko rukomeje guhangana na COVID-19, umubano warwo n’ibindi bihugu ndetse no ku buzima bwite bwa Perezida Kagame.

Kimwe mu bibazo Perezida Kagame yabajijwe cyamusabye gusobanura byimbitse inshingano z’Umukuru w’Igihugu n’ubwitange bimusaba kugira ngo yuzuze izo nshingano uko bikwiye.

Yatangaje ko kuba Perezida atari ibintu bisaba kwandika ibaruwa yaka akazi nk’uko bigenda mu gusaba imirimo isanzwe, ashimangira ko kuba ari Perezida wa Repubulika atari ibintu yateguye cyangwa ngo abisabe ahubwo bifitanye isano n’urugendo rwo kwibohora rwahereye mu buhungiro aho we na bagenzi be bari bafite umugambi wo guharanira uburenganzira bambuwe bwo kugira Igihugu.

Yasobanuye ko urwo rugamba rwabasabye gukurikira umurongo wa Politiki n’ibikorwa bigaragaza ibyo bahisemo, ari na byo byabayoboye, bikaba bikibayoboye kugeza n’ubu.

Nyuma y’urugamba yisanze agomba kuba Perezida, bijyana no kwemera inshingano ziremereye, zisaba gushakira ibisubizo ibibazo by’abaturage no guharanira ko ntawuhutara.

Yagize ati: “Iyo wabaye Perezida muri ubwo buryo hari ibyo bigusaba mu buryo bw’imyifatire abo uyobora bagomba kugufatamo, niba hari uwarenganye akumva ko yarenganurwa cyangwa atarengana uhari. Abanyarwanda uko babayeho, ari ubukungu, iterambere, ibi byose bigaruka ku muntu witwa Perezida, ndetse n’uwaburaye akabaza ngo Perezida yari ari he, kuki naburaye?”

Yakomeje avuga ko nubwo bitakunda ko buri wese aba Perezida, buri wese yagira uruhare mu kuzuza inshingano za Perezida mu rwego yaba arimo rwose.

Yagize ati:”Kuba Perezida ntibiba buri mwaka, buri myaka ibiri cyangwa buri kwezi; byari kugera ku bantu benshi benshi ariko ntabwo ari twe twatumye bitera gutyo. Ariko akumva ko n’iyo utaba Perezida, niba ubaye Minisitiri, Guverineri, Mayor, Umwarimu, Umukuru w’ivuriro, umupolisi, umusirikare, aho hose haba hari inshingano ituma ugera kuri urwo rwego. Inshingano zigenda zitandukana ariko byose bishoboka kuko abantu buzuzanya.”

Perezida Kagame yavuze ko inzira yanyuzemo ngo abe Perezida yari ishingiye ku kuzuza inshingano yasabwaga umunsi ku wundi.

Ati: “Ntabwo nigeze njya muri iyi nzira nzi ko nzaba Perezida cyangwa ari byo mparanira, ntabwo ari byo, ntabwo byigeze biba rwose…Ndetse njya kuba Perezida na mbere yaho gato ntabwo ari ikuntu jye nigeze mvuga ngo ngiye kugira ntya kugira ngo mbe Perezida. Nakoraga ibyo nsabwa, twari ku rugamba n’abandi benshi, nari mfite umwanya wange ntangiramo umusanzu nk’umuntu.”

Urubyiruko rw’ubu ntirugihangayikishwa n’ubuhunzi

Perezida Kagame yagarutse ku rugendo rurerure rwaranze urubyiruko rwo mu gihe cyabo rwagizwe impunzi ku gahato, avuga ko u Rwanda n’igihe cyabo bakiri bato rutandukanye cyane n’u Rwanda n’igihe cy’ubu.

Ati: ” Icyo gihe turi bato twari benshi bari impunzi, abandi batari impunzi hanze bari impunzi mu gihugu, bivuze ko hari n’abakibagamo bitwa ko ari Abanyarwanda ariko badafite uburenganzira nk’Abanyarwanda, na bo bakabaho nk’impunzi.”

Perezida Kagame yavuze ko abantu bose bagize uruhare mu rugendo rwo kwibohora bigomwe igihe cyabo, bigomwa ubuzima, n’ikindi cyose byabasabaga kugira ngo bagere ku burenganzira bw’abahejejwe ishyanga n’ubuyobozi bwimakazaga Politiki y’ivangura.

Bityo kwigomwa no guhitamo inzira imwe byabasabye n’ikiguzi cyo kugira imyitwarire n’imyumvire ibageza ku nsinzi; ati: “Iyo wahisemo inzira nk’iyo ntabwo uyijyamo na none ngo ukore ibyo ushaka byose. Ukora ibijyanye na ya nzira wafashe yaba iyo kwibohora cyangwa gufatanya n’abandi bose kubohora Igihugu ngo kibe icy’Abanyarwanda bose, igihugu twabanamo twese uko twaba duteye, uko twaba dusa kose.”

Perezida Kagame yanagiriye urubyiruko inama zitandukanye zirimo no guhora biteguye guhangana n’ubuzima bugoye, kuko igihe cyo kwishima ari gike ugereranyije n’icyo umuntu ahuramo n’ibihe bigoye.

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.