26°C , Partly sunny | Kigali-Rwanda

Beach Volleyball: U Rwanda rugiye kwakira irushanwa ryo gushaka itike y’imikino Olempike

Yanditswe na BUGINGO FIDELE

Ku ya 11-02-2020 saa 17:34:40
Ikipe y'u Rwanda mu bagore izakina ikiciro cya kabiri k'imikino y'ijonjora izabera i Rubavu

Igihugu y’u Rwanda kizakira imikino  y’ijonjora rya kabiri  mu gushaka itike y’imikino Olempike 2020 mu mukino wa Volleyball ikinirwa ku mucanga “Beach Volleyball” mu kiciro cy’abagore.

Nyuma y’imikino y’amajonjora y’ibanze  yabereye mu bice bitandukanye b’Afurika, muri Werurwe  2020 ni bwo hazaba  imikino y’ijonjora rya kabiri.

Mu bagore hari amakipe 20 yagabanyijwe mu matsinda 4.  Nk’uko tubikesha impuzamashyirahamwe y’umukino wa Volleyball muri Afurika “CAVB”,  imikino izabera mu Rwanda ni iyo mu itsinda B ririmo Maroc, Niger, Sudani, Eritrea  n’u Rwanda. Iyi mikino izaba tariki 25 kugeza 29 Werurwe 2020 ibere mu karere ka Rubavu.

Ikipe y’u Rwanda izaba igizwe na Nzayisenga Charlotte ufatanya na Munezero Valentine ndetse na Mukantambara Seraphine uzaba afatanyije na  Hakizimana Judith.

Mu yandi matsinda, itsinda A ririmo Mauritius, Sierra Leone, Gambia, Cote d’Ivoire na Ghana, imikino izabera muri Sierra Leone tariki 23 kugeza 27 Werurwe 2020. Itsinda C ririmo Nigeria, Kenya, Cap Vert, RDC  na Zambia, imikino izabera muri Nigeria tariki 04 kugeza 08 Werurwe 2020 naho mu itsinda D  harimo  Uganda, Misiri, Mozambique, Guinea Conakry na Zimbabwe, imikino izabere muri  Uganda kuva tariki 09 kugeza 13 Werurwe 2020

Nyuma y’iyi mikino y’amajonjora hazazamuka amakipe 2 muri buri tsinda abe 8 ari yo azakina ikiciro cya nyuma aho ikipe ya mbere izabona itike.

Mu kiciro cy’abagabo hari amakipe 20 yagiye yitwara neza mu bice bitandukanye “Zone”. Aya makipe yagabanyijwe mu matsinda 4 aho itsinda A ririmo Mozambique, Nigeria, Tunizia, Zambia na Congo Brazzaville, imikino izabera muri Mozambique  tariki 19 kugeza 23 Werurwe 2020.

Itsinda B ririmo  Ghana, Afurika y’Epfo, Sudani, Tanzania na Niger, imikino izabera muri Tanzania tariki 26 kugeza 30 Werurwe 2020.   Itsinda C ririmo Gambia, Mauritius, Kenya, Botswana na Sudani y’Amajyepfo aho imikino izabera muri Gambia tariki 12 kugeza 15 Werurwe 2020 naho itsinda D ririmo ikipe y’u Rwanda, Sierra Leone, Misiri, Togo na Mali, imikino ibere muri Sierra Leone tariki 23 kugeza 27 Werurwe 2020.

Ikipe y’u Rwanda izaba igizwe na  Ntagengwa Olivier ufatanya na  Akumuntu Kavalo Patrick  ndetse na Habanzintwari Fils ufatanya na  Gatsinzi Venuste.

Muri iki kiciro naho hazazamuka amakipe 2 muri buri tsinda abe 8  hanyuma akine  irushanwa rya nyuma aho ikipe ya mbere izabona itike y’imikino Olempike 2020 izaba tariki 24 Nyakanga kugeza 09 Kanama 2020.

Ubwo imikino Olempike iheruka kuba muri 2016 yabereye Rio de Janeiro muri Brazil.  Mu bagabo hitabiriye ibihugu 24. Igihugu cya Tunizia ni cyo cyaserukiye Afurika ahari hagiyeyo ikipe ya Choaib Belhaj Salah na Mohamed Arafet Naceur. Mu bagore  nabwo hitabiriye amakipe 24, igihugu cya Misiri ni cyo cyahagarariye Afurika aho hariyo ikipe igizwe na Doaa Elghobashy na Nada Meawad.

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.