22°C , Mostly sunny | Kigali-Rwanda
Perezida wa FRVB, Karekezi Leandre (hagati) mu kiganiro n'abanyamakuru ubwo hatangazwaga aho imyiteguro y'igikombe k'Isi igeze

Beach Volleyball: Mu Rwanda hakomeje imyiteguro  yo kwakira igikombe k’Isi 

Yanditswe na BUGINGO FIDELE

Ku ya 12-07-2019 saa 09:51:57

Tariki 21 kugeza 24 Kanama 2019 mu Karere ka  Rubavu  mu Ntara y’Iburengerazuba  hazabera irushanwa  ryo ku rwego rw’Isi mu mukino wa Volleyball ikinirwa ku mucanga “Beach Volleyball World Tour 2019”  akaba ari ubwa  kabiri rigiye kubera ku mugabane w’Afurika kuko inshuro ya mbere ryabereye muri Maroc umwaka ushize wa 2018.

Iri rushanwa “Rubavu Beach Volleyball Tour 2019” biteganyijwe ko rizitabirwa n’amakipe 56 ni ukuvuga amakipe 28 mu bagabo n’abagore. Muri aya makipe hazaba harimo amakipe 3 yo mu Rwanda  muri buri kiciro.  Muri Beach Volleyball ikipe ikaba iba igizwe n’abakinnyi babiri.

Aya makipe azitabira azatangazwa mbere y’iminsi 21 ngo irushanwa ritangira ni ukuvuga mu mpera z’uku kwezi kwa Nyakanga 2019. Amakipe azitabira afatwa hashingiwe ku rutonde    rukorwa n’ishyirahamwe ry’umukino wa Volleyball ku Isi “FIVB”.

Ikipe zemerewe ni iziri muri 20 za  mbere ku Isi, gusa nta bwo igihugu kigomba kurenza amakipe 4 mu irushanwa. Muri aya makipe kandi  yitabira hari 2 atumirwa na FIVB.

Uko irushanwa rizagenda

Aya makipe 28 muri buri   kiciro hari 16  azakina ku munsi wa mbere  akuranamo hasigare 4 asange 12 meza hanyuma akine imikino yo  mu  matsinda, izitwaye neza zikomeze zigere ku mukino wa nyuma.

Kubera ikiciro iri rushanwa ririho   amakipe 3 ya mbere muri buri kiciro azagabana ibihumbi 5  by’amadorari nk’igihembo.

Aho imyiteguro igeze

Hatumimana Christian uyoboye  ibikorwa by’iri rushanwa akaba asanzwe ari umunyamabanga w’ishyirahamwe ry’umukino wa Volleyall mu Rwanda  “FRVB” yatangaje ko  icya mbere bakoze ari ukohereza umucanga muri Canada kugira ngo bawupime barebe ko wujuje ubuziranenge.

Yakomeje avuga ko amakuru bafite ari uko basanze nta kibazo ubu  bakaba bategereje ko FIVB ibandikira mu buryo  bwemewe ibyemeza.

Ibindi bizakurikiraho akaba ari ugutegura ibibuga n’aho abantu bazicara byibura bari hagati ya 500 na 750. Hatumimana akaba avuga ko mu minsi ya vuba ibi bikorwa bizatangira kuko ibyo bazubaka irushanwa nirirangira bizavaho.

Iri rushanwa ibikorwa byo kuritegura byose bikaba biteganyijwe ko bizatwara amafaranga y’u Rwanda agera kuri miriyoni 350.

Perezida w’ishyirahamwe ry’umukino wa Volleyball mu Rwanda “FRVB”, Karekezi Leandre yavuze ko kugira ngo irushanwa nk’iri baryemerere u Rwanda hari  ibyo bashingiyeho birimo uburyo amakipe y’u Rwanda yitwara muri uyu mukino ndetse n’uburyo indi mikino yagiye ibera mu Rwanda yagenze.

Yakomeje  avuga ko  batangiye kwitegura ku bufatanye n’inzego zitandukanye z’igihugu  akaba avuga ko  bakomeje imyiteguro  kugira ngo irushanwa rizagende neza kandi ko bizasigira gihugu inyungu yaba mu rwego rwo kuzamuka k’umukino  ndetse n’izijyanye n’iterambere kuko aba bashyitsi bari ibyo bazakenera.

Umuyobozi w’agateganyo wa Siporo muri Minisiteri y’Umuco na Siporo “MINISPOC”, Rurangayire  Guy  yatangaje ko  bifuza gutegura neza iri rushanwa rya mbere  ku buryo n’ubutaha u Rwanda  rwahabwa amahirwe yo kwakira iryisumbuyeho. Yakanguriye Abanyarwanda kuzitabira iyi mikino mu rwego rwo guteza imbere siporo n’ubukerarugendo.

Perezida wa FRVB, Karekezi Leandre (hagati) mu kiganiro n’abanyamakuru ubwo hatangazwaga aho imyiteguro y’igikombe k’Isi igeze

TANGA IGITEKEREZO

Leave a Reply

Your email address will not be published. Required fields are marked *