Beach Volleyball: Abakinnyi bazaserukira u Rwanda mu gikombe k’Isi batangiye kwitegura

Tariki 21 kugeza 24 Kanama 2019 mu Rwanda hazabera  irushanwa riri ku rwego rw’Isi  muri Volleyball ikinirwa ku mucanga “FIVB Beach Volleyball World Tour 2019”   akaba ari ubwa  kabiri rigiye kubera ku mugabane w’Afurika kuko inshuro ya mbere ryabereye muri Maroc.

Kugeza ubu ibihugu 12 ni byo byemeje ko bizitabira iri rushanwa rizabera mu Karere ka Rubavu mu Ntara y’Uburengerezuba.  Ibi bihugu birimo Cote d’Ivoire, u Bwongereza, u Buholandi, Slovenia, Denmark, Japan, Canada, Czech Republic, Norway, Suwede, Cyprus n’u Rwanda ruzakina.

Igihugu cy’u Rwanda biteganyijwe ko kizahagararirwa n’amakipe 3 muri buri kiciro ni ukuvuga abagabo n’abagore. Mu bagabo ikipe ya mbere igizwe na Mukunzi Christophe na Ndamukunda Flavien, iya  kabiri igizwe na Gatsinzi Venutse afatanyije na  Habanzintwari Fils naho ikipe ya gatatu igizwe na Muvunyi Alfred  na  Niyonkuru Yves. Iyi kipe izaba itozwa na Sammy Mutemi Mulinge usanzwe ari umutoza wa APR VC mu bagabo.

Mu bagore, ikipe ya mbere igizwe na Nzayisenga Charlotte  afatanyije na  Hakizimana Judith, ikipe ya kabiri igizwe na Muhoza Louise  afatanyije na Musaniwabo Hope naho ikipe ya  gatatu ikaba igizwe na Nyirarukundo Christine  na Umulisa Pacifique. Iyi kipe izaba itozwa na Mbonyuwontuma Jean Luc.

Nk’uko tubikesha ishyirahamwe ry’umukino wa Volleyball mu Rwanda “FRVB” aba bakinnyi batangiye kwitegura aho bakoraga imyitozo bisanzwe  ariko kuva  tariki 07 Kanama 2019 bagomba kujya i Rubavu azahazabera irushanwa bagatangira umwiherero banakorera imyitozo aho bazakina.

Hari abarimo gukorera imyitozo mu Buyapani

Abakinnyi bamwe bazaserukira u Rwanda muri iri rushanwa hari abagiye mu Buyapani  gukorerayo imyitozo muri gahunda y’ubufatanye Komite Olempike y’u Rwanda ifitanye n’umujyi wa Hanchimantai  mu Buyapani.

Mu bakinnyi bari muri kiriya gihugu barimo  Nzayisenga Charlotte  ufatanya na  Hakizimana Judith,  Gatsinzi Venutse uzakinana na Habanzintwari Fils ndetse na Niyonkuru Yves uzakinana na Muvunyi Alfred.

Uretse aba bakinnyi ariko hariyo n’ikipe ya Ntagengwa Olivier ufatanya na Akumuntu Kavalo Patrick ndetse na Munezerero Valentine ufatanya na Mukandayisenga Bénitha. Aba bo bakaba baserukira u Rwanda mu mikino y’Afurika “All African Games 2019” izabera mur Maroc kuva tariki 16 kugeza 31 Kanama 2019.

Abakinnyi bari mu Buyapani bazakina iri rushanwa ryo ku rwego rw’Isi “Rubavu Beach Volleyball Tour 2019” bagera mu Rwanda mu cyumweru gitaha bakomezanye na bagenzi babo imyitozo.

Uko iyi mikino izagenda hazakinwa imikino y’amajonjora  ry’ibanze hanyuma hakurikireho imikino yo mu matsinda izitwaye neza zikomeza   muri ¼ , ½ n’umukino wa nyuma.

Kubera ikiciro iri rushanwa ririho   amakipe 3 ya mbere muri buri kiciro azagabana ibihumbi 5  by’amadorari nk’igihembo.

Hakizimana Judith na Nzayisenga Charlotte bazaserukira u Rwanda mu irushanwa ry’igikombe k’Isi rizabera mu Rwanda