21°C , Mostly cloudy | Kigali-Rwanda
Perezida wa CAC, Dr Mohammed Wagih Azzam (iburyo) na Minisitiri Uwacu Julienne (ibumoso) bashyikiriza ishimwe Perezida wa FERWACY, Bayingana Aimable

Bayingana yashimiwe uruhare rwe mu iterambere ry’umukino w’amagare muri Afurika

Yanditswe na BUGINGO FIDELE

Ku ya 19-02-2018 saa 08:16:55

Ubwo hasozwaga  shampiyona y’Afurika mu mukino wo gusiganwa mu magare “African Continental Cycling Championships 2018” yabereye mu Rwanda kuva tariki 14 kugeza 18 Gashyantare 2018, Perezida w’ishyirahamwe ry’umukino wo gusiganwa ku magare mu Rwanda “FERWACY”, Bayingana Aimable yashimiwe uruhare yagize mu iterambere ry’uyu mukino mu Rwanda ndetse no muri Afurika muri rusange.

Perezida wa CAC, Dr Mohammed Wagih Azzam (iburyo) na Minisitiri Uwacu Julienne (ibumoso) bashyikiriza ishimwe Perezida wa FERWACY, Bayingana Aimable

Iri shimwe yarishyikirijwe na Perezida w’impuzamashyirahamwe y’umukino wo gusiganwa ku magare muri Afurika “CAC”, Dr Mohammed Wagih Azzam ari kumwe na Minisitiri w’Umuco na Siporo mu Rwanda “MINISPOC”, Uwacu Julienne.

Perezida wa CAC, Dr Mohammed Wagih Azzam akaba yaravuze ko iyi shampiyona yabereye mu Rwanda yagenze neza aho yashimiye u Rwanda uburyo rwakira amarushanwa mpuzamahanga.

Bayingana Aimable yageze ku buyobozi bwa FERWACY mu 2008 nyuma y’umwaka umwe u Rwanda rutegura Tour du Rwanda mpuzamahanga. Nyuma y’imyaka 10, umukino w’amagare mu Rwanda wagaragaje gutera imbere mu buryo bukomeye ahazamutse abakinnyi bakitwara neza no ku ruhando mpuzamahanga kuko kugeza ubu abakinnyi barenga 8 bakinnye mu makipe y’ababigize umwuga ku mugabane w’u Burayi.

Uretse kuyobora FERWACY, Bayingana Aimable kuva mu 2013 ari mu bagize komite nyobozi y’impuzamashyirahamwe y’umukino wo gusiganwa ku magare muri Afurika “CAC”.

Nyuma ya shampiyona y’Afurika ya 2018 yari ibaye ku nshuro ya 13 akaba ari ubwa kabiri ibereye mu Rwanda, Bayingana yatangaje ko bishimiye uko irushanwa ryagenze ndetse anashima uburyo abakinnyi bari bahagarariye u Rwanda bitwaye. U Rwanda rwegukanye imidali 10 ingana n’iyo rwegukanye kuva mu 2005 ubwo  shampiyona y’Afurika yatangiraga gukinwa.

 

TANGA IGITEKEREZO

Leave a Reply

Be the First to Comment!

avatar