20°C , Mostly cloudy | Kigali-Rwanda
Manzi Dan (ibumoso), Gasana Kenneth (hagati) na Darrius Garret ni bamwe mu bakina hanze bahamagawe mu mwiherero

Basketball: Umutoza yahamagaye abakinnyi bagomba kwitegura imikino y’amajonjora y’igikombe k’Isi

Yanditswe na NKOMEJE GUILLAUME

Ku ya 30-08-2018 saa 07:39:44

Vladimir Bosnjak, umutoza mukuru w’ikipe y’igihugu nkuru y’abagabo yamaze gushyira ahagaragara abakinnyi bagomba kwitabira umwiherero w’imikino y’amajonjora y’ikiciro cya kabiri igamije gushaka itike y’igikombe k’Isi “FIBA Basketball World Cup 2019 African Qualifiers” izabera i Lagos muri Nigeria kuva tariki 14-16 Nzeri 2018.

Manzi Dan (ibumoso), Gasana Kenneth (hagati) na Darrius Garret ni bamwe mu bakina hanze bahamagawe mu mwiherero

Uyu mutoza akaba yatoranyije abakinnyi 13 muri 19 basanzwe bakina imbere mu gihugu bari bamaze iminsi mu myitozo bakoraga bataha yari yatangiye tariki 16 ikageza tariki 27 Kanama 2018.

Ubu hategerejwe abakinnyi 5 bakina hanze y’igihugu biganjemo abazaturuka muri Leta Zunze Ubumwe z’Amerika, biteganyijwe ko bagomba kwitabira uyu mwiherero kuko uwa nyuma atazarenza iminsi 6.

Ikipe y’igihugu yabonye itike yo gukina iyi mikino, nyuma yo gusoreza ku mwanya wa kabiri n’amanota 9 mu itsinda “B” mu mikino y’ijonjora ribanza yabereye muri Nigeria kuva tariki 29 Kamena-01 Nyakanga 2018.

Yaje inyuma ya Nigeria yabaye iya mbere n’amanota 12 ikurikirwa na Mali ya 3 n’amanota 8 naho Uganda yabaye iya nyuma (4) n’amanota 7.

Ikipe y’u Rwanda yashyizwe mu itsinda rya kabiri “F” hamwe na Nigeria, Mali, Senegal, Cote d’Ivoire na Centrafrique. Itsinda rya mbere “E”, rizakinira Abidjan muri Cote d’Ivoire, rigizwe  na Tunisia, Cameroun, Chad, Angola, Misiri na Maroc.

Amakipe abiri ya mbere muri buri tsinda n’ikipe yabaye iya gatatu yitwaye neza, azaba muri 32 azakina imikino ya nyuma y’igikombe k’Isi “FIBA Basketball World Cup 2019” izabera mu Bushinwa kuva tariki 31 Kanama kugeza 15 Nzeri 2019.

Abakinnyi b’ikipe y’igihugu bahamagawe

Hari Mugabe Aristide, Sagamba Sedar, Ndizeye Dieudonné, Hagumintwari Steven, Kaje Elie, Shyaka Olivier, Kami Milambwe Kabange, Nkurunziza Chris Walter, Nshobozwabyosenumukiza Jean Jacques Wilson, Kubwimana Kazingufu Ali, Niyonkuru Pascal, Ruzigande Ali na Ruterana Fabrice. Naho abakina hanze bahamagawe ni Manzi Dan, Rwabigwi Adonis, Darrius Garret, Kevin Ndahiro (USA) na Gasana Kenneth (Maroc).

TANGA IGITEKEREZO

One Comment on “Basketball: Umutoza yahamagaye abakinnyi bagomba kwitegura imikino y’amajonjora y’igikombe k’Isi”

Leave a Reply

Your email address will not be published. Required fields are marked *