17°C , Partly sunny | Kigali-Rwanda
Ikipe y'u Rwanda irahura na Senegal mu mukino ubanza wo gushaka itike y'igikombe k'Isi

Basketball: U Rwanda rurahura na Senegal mu gushaka itike y’igikombe k’Isi

Yanditswe na NKOMEJE GUILLAUME

Ku ya 14-09-2018 saa 08:20:13

Uyu munsi

Rwanda-Senegal (18h30)

Ejo, tariki 15-09-2018

Rwanda-Cote d’Ivoire (18h30)

Tariki 16-09-2018

Rwanda-Centrafrique (18h30)

Uyu munsi tariki 14 Nzeri 2018, ikipe y’u Rwanda nkuru mu mukino wa Basketball mu bagabo, irakina na Senegal mu mukino ubanza w’amajonjora y’ikiciro cya kabiri yo gushaka itike y’igikombe k’Isi “FIBA Basketball World Cup 2019 African Qualifiers”, ubere i Lagos muri Nigeria saa  kumi n’ebyiri n’igice z’umugoroba (18h30).

Ikipe y’u Rwanda irahura na Senegal mu mukino ubanza wo gushaka itike y’igikombe k’Isi

Iyi mikino yo mu itsinda rya kabiri “F” ikaba iri mu rwego rwo gushaka itike yo kuzakina imikino ya nyuma y’igikombe k’Isi “FIBA Basketball World Cup 2019” izabera mu Bushinwa kuva tariki 31 Kanama kugeza 15 Nzeri 2019.

Ikipe y’u Rwanda itozwa na Vladimir Bosnjak irasabwa gukora ibishoboka byose ngo ibone insinzi muri uyu mukino ubanza, bityo biyihe ikizere n’imbaraga zo kuba yazitwara neza mu yindi mikino izakurikaho.

Iyi kipe y’igihugu yageze i Lagos muri Nigeria hakiri kare, mu rwego rwo kwitegura neza iyi mikino. Mbere yo gukina uyu  mukino wa mbere  yipimye n’ikipe y’igihugu ya Nigeria maze itsindwa amanota 89 kuri 77. Uyu mukino wabaye tariki 12 Nzeri 2018.

Vladimir Bosnjak, umutoza w’iyi kipe y’igihugu, wungirijwe na Mwiseneza Maxime  na  Nkusi A. Karim, yari yatangarije Imvaho Nshya ko gukina uyu mukino wa gicuti na Nigeria bizamufasha kongerera ubunararibonye mu ikipe ndetse no kumenya urwego abakinnyi azifashisha bahagazeho mbere yo gutangira iyi mikino.

Nyuma y’umukino wa mbere, ikipe y’u Rwanda iza gukina na Senegal  uyu munsi, ejo tariki 15 Nzeri 2018, ikipe y’u Rwanda izakurikizaho umukino uzayihuza na Cote d’Ivoire (18h30) izasoze iyi mikino  ikina na Centrafrique ku Cyumweru tariki 16 Nzeri 2018 (18h00).

Nyuma yo gusoza iyi mikino y’iki kiciro, biteganyijwe ko indi mikino yo muri iri tsinda «F», izaba kuva tariki 22 kugeza 24 Gashyatare 2019 gusa ntiharatangazwa aho izabera.

Abakinnyi 12 b’ikipe y’u Rwanda bari muri Nigeria

Aba ni Mugabe Aristide (kapiteni), Sagamba Sedar, Ndizeye Dieudonné, Gasana Kenneth, Kaje Elie, Shyaka Olivier, Kami Kabange, Nkurunziza Chris Walter, Nshobozwabyosenumukiza Jean  Jacques  Wilson, Manzi Dan, Rwabigwi Adonis  na  Ndahiro Kevin.

 

 

 

 

 

 

 

 

 

TANGA IGITEKEREZO

Leave a Reply

Your email address will not be published. Required fields are marked *