19°C , Partly cloudy | Kigali-Rwanda
Sangwe Armel wamaze kongera amasezerano y'imyaka ibiri muri Espoir BBC

Basketball: Sangwe yongereye amasezerano y’imyaka ibiri muri Espoir BBC

Yanditswe na NKOMEJE GUILLAUME

Ku ya 12-10-2018 saa 11:06:03

Espoir BBC yatangiye gahunda yo kwiyubaka yitegura umwaka utaha w’imikino, iratangaza ko Sangwe Armel yamaze gusinya amasezerano mashya y’imyaka ibiri, azamugeza mu mwaka wa 2020.

Mu kiganiro yagiranye n’Imvaho Nshya, Mwiseneza Maxime, umutoza mukuru wa Espoir BBC yemeje aya makuru ndetse anagaragaza ko bafite gahunda ndende yo kongeramo amaraso mashya bityo bakagira ikipe nziza.

Avuga ko uretse kuba basinyishije Sangwe amasezerano mashya y’imyaka ibiri, hari na bagenzi be bongereye amasezerano bari bafitanye n’iyi kipe. Yagize ati “Abakinnyi, Emile Kazeneza na Habineza Shaffi na bo bongereye amasezerano yabo muri Espoir BBC bombi bashyize umukono ku masezerano y’imyaka ibiri”.

Uyu mutoza wemeza ko abakinnyi bifuzaga kugumana abenshi bongereye amasezerano, avuga ko hakiri n’abandi bakiri kumvikana ngo na bo babe basinya amasezerano mashya.

Mwiseneza atangaza ko bafite gahunda yo gusinyisha abakinnyi bashya. Ati “Gahunda yo gushaka abakinnyi bashya irahari, turacyari kubashakisha. Abakinnyi bashya dukeneye nta bwo turarangiza kubumvikanaho na komite, gusa dukeneye hagati ya 4 na 5”.

Mwiseneza Maxime umaze kugira ubunararibonye mu mukino wa Basketball y’u Rwanda, agaragaza ko bifuza kongera amaraso mashya ku bakinnyi bakina kuri rimwe, kabiri, gatatu no kuri kane.

Sangwe wari umukinnyi ngenderwaho muri Espoir BBC mu mwaka w’imikino ushize 2017-2018 yabashije no gushyiraho agahigo ko gutsinda amanota menshi (40) mu mukino umwe.

Sangwe Armel wamaze kongera amasezerano y’imyaka ibiri muri Espoir BBC

Sangwe Armel wazamukiye mu ikipe ya Gymkhana yo mu kiciro cya kabiri iwabo i Burundi yageze muri Espoir BBC mu 2017 yafashije iyi kipe gusoreza ku mwanya wa 5 muri shampiyona ishize.

TANGA IGITEKEREZO

Leave a Reply

Your email address will not be published. Required fields are marked *