21°C , Partly cloudy | Kigali-Rwanda
Ruzigande Ally (iburyo), wasinye amasezerano y'imyaka ibiri muri Patriots BBC, ari kumwe na Kirungi Bryan, umuyobozi w'iyi kipe

Basketball: Ruzigande yasinye amasezerano y’imyaka ibiri muri Patriots BBC

Yanditswe na Nkomeje Guillaume

Ku ya 06-11-2018 saa 11:39:27

Ruzigande Ally wakiniraga APR BBC mu bagabo akaba asanzwe ari umukinnyi w’ikipe y’igihugu nkuru ni umwe mu bakinnyi bashya bazakinira ikipe Patriots BBC muri uyu mwaka w’imikino wa Basketball wa 2018-2019.

Uyu wageze muri APR BBC mu 2014 avuye muri KBC yagiye agira ibihe byiza, gusa nta bwo yabashije kugira igikombe na kimwe atwarana nayo mu gihe yari ayibayemo.

Aganira n’Imvaho Nshya, Ruzigande Ally werekeje muri Patriots BBC akaba yashyize umukono ku masezerano y’imyaka ibiri yatangaje ko yishimiye kuba umukinnyi w’iyi kipe, kubera ko ari ikipe nziza bityo ko abona ari intambwe ikomeye abashije gutera.

Ruzigande avuga ko yiteguye gutanga ibyo afite kugira ngo afatanye n’abakinnyi asanze mu gufasha Patriots BBC gutwara ibikombe bitandukanye nk’uko basanzwe babikora.

Yagize ati “Kuba ndi umukinnyi mushya wa Patriots BBC nabyakiriye neza cyane. Ni ikipe nziza ifite abakinnyi bakomeye. Nange niteguye gufatanya nabo nsanze ngo dukore akazi kose dusabwa kandi neza.”

Ruzigande Ally (iburyo), wasinye amasezerano y’imyaka ibiri muri Patriots BBC, ari kumwe na Kirungi Bryan, umuyobozi w’iyi kipe

Atangaza ko afite intego yo gutwara ibikombe muri iyi kipe ye nshya. Ati “Intego yange ni iyo gutwara ibikombe nk’uko basanzwe babikora, gusa nange nzakora ibishoka kugira ngo tubigereho.”

Ruzigande Ally wari umaze imyaka ine muri APR BBC yayifashije gusoreza ku mwanya wa 3 muri shampiyona ishize ya 2018 inyuma ya REG BBC yabaye iya kabiri ndetse na Patriots BBC yatwaye igikombe.

Ruzigande abaye umukinnyi wa kabiri mushya werekeje muri Patriots BBC, nyuma ya Jean Jacques Boissy ukomoka muri Senegal akaba azakinira iyi kipe mu gihe k’imyaka ibiri.

Jean-Jacques Boissy wari mu ikipe y’igihugu ya Senegal y’abatarengeje imyaka 18 yakinnye igikombe cy’Afurika yabereye i Bamako muri Mali kuva tariki 24 Kanama kugeza 2 Nzeri 2018 yaje mu Rwanda muri gahunda ya NBA-Africa, aho yiga ibijyanye n’imiyoborere muri Kaminuza “African Leadership University”.

TANGA IGITEKEREZO

Leave a Reply

Your email address will not be published. Required fields are marked *