17°C , Partly cloudy | Kigali-Rwanda

Basketball: REG na The Hoops zegukanye irushanwa mpuzamahanga ryo kwibuka

Yanditswe na NKOMEJE GUILLAUME

Ku ya 10-06-2019 saa 12:08:54
Abakinnyi b'ikipe ya REG BBC bishimira igikombe k'irushanwa ryo kwibuka

REG BBC mu bagabo na The Hoops Rwanda mu bagore zegukanye igikombe k’irushanwa mpuzamahanga ryo kwibuka abari abakinnyi, abayobozi n’abakunzi b’umukino wa Basketball bazize Jenoside yakorewe Abatutsi mu 1994 “Genocide Memorial Tournament 2019”.

Iri rushanwa ngarukamwaka risanzwe ritegurwa n’ishyirahamwe ry’umukino wa Basketball mu Rwanda “FERWABA” ku bufatanye na Sosiyete icuruza Gaz “Safe Gaz” ryari ryitabiriwe n’amakipe 15, arimo 10 y’abagabo na 5 y’abagore, ryabaye kuva tariki 4-9 Kamena 2019.

REG BBC yari yitabiriye iri rushanwa ku nshuro ya 3, yegukanye iki gikombe itsinze mukeba wayo, Patriots BBC nayo yo mu Rwanda bigoranye ku manota 74 kuri 71.

Muri uyu mukino wabereye kuri Sitade Nto i Remera, Patriots BBC ni yo yari yatangiye iri hejuru itsinda agace ka mbere ku manota 25-15, REG BBC irayigaranzura itsinda agace ka kabiri kuri 17-14, itsinda agace ka 3 kuri 22-15 ndetse n’aka nyuma (4) kuri 20-17, bityo REG BBC ibona insinzi ku kinyuranyo cy’amanota 3 (74 kuri 71).

Kaje Elie ukinira REG BBC ni we watsinze amanota menshi (21), akurikirwa na Nijimbere Guibert wakiniye Patriots BBC muri iri rushanwa watsinze amanota 20.

REG BBC itozwa na Ngwijuruvugo Richard Patrick, ikaba yakoze amateka yo kwegukana iki gikombe k’iri rushanwa ryo kwibuka ku rwego mpuzamahanga inshuro 3 yikurikiranya.

Yagitwaye bwa mbere mu 2017, itsinze Espoir BBC ku mukino wa nyuma amanota amanota 81 kuri 66. Mu mwaka ushize wa 2018, REG BBC yongeye kwisubiza iki gikombe itsinze Patriots BBC amanota 73 kuri 67.

Iki gikombe REG BBC itwaye kikaba kibaye icya 4 yegukanye muri uyu mwaka wa 2018-2019, nyuma y’ik’irushanwa ribanziriza shampiyona ndetse n’ik’irushanwa ry’Intwari ndetse n’icya MTN Yolo Hoops. Muri iki kiciro cy’abagabo, Terreur yo muri RDC n iyo yegukanye umwanya wa 3 itsinze APR BBC yo mu Rwanda ku manota 65 kuri 55.

Mu bagore, ahari hitabiriye amakipe 5, akaba yarahuye hagati yayo hakarebwa iyabonye amanota menshi, The Hoops Rwanda Girls Team BBC ni yo yatwaye iki gikombe nyuma y’uko ibaye iya mbere n’amanota 8, IPRC Huye BBC iba iya kabiri n’amanota 7, APR BBC iba iya 3 (6), Scandinavia yo muri RDC iba iya 4 (5) naho ngenzi yayo PJB isoreza ku mwanya wa nyuma (5) n’amanota 4.

Mu kiciro cy’abakanyujijeho, UGB yabaye iya mbere mu bagabo, ikurikirwa na Patriots BBC naho VCGB iba iya 3.
Mu bagore, REG BBC yabaye iya mbere, ikipe y’u Rwanda iba iya 2 naho RSSB iba iya 3.

Mu bihembo byatanzwe, ikipe ya mbere mu byiciro byombi, abagabo n’abagore yahawe igikombe, giherekejwe na sheki y’amafaranga y’u Rwanda miriyoni imwe, iya kabiri ihabwa igikombe na sheki y’amafaranga ibihumbi 700 naho iya 3 ihabwa sheki y’amafaranga ibihumbi 400.

Mu bakanyujijeho ikipe ya mbere n’iya kabiri muri buri kiciro zahawe igikombe gusa.

Mu bihembo byatanzwe ku bakinnyi mu bagabo, Nijimbere Guibert wakiniye Patriots BBC yabaye umukinnyi mwiza w’iri rushanwa “MVP”, naho mu bagore aba Micomyiza Rosine ukinira The Hoops Rwanda Girls Team BBC.

Mu bakanyujijeho, Cyusa Jean Luc ukinira UGB yabaye umukinnyi mwiza w’irushanwa mu bagabo naho mu bagore aba Kamana Aisha ukinira REG BBC.

Abakinnyi b’ikipe ya REG BBC bishimira igikombe k’irushanwa ryo kwibuka

TANGA IGITEKEREZO

Leave a Reply

Your email address will not be published. Required fields are marked *