26°C , Partly sunny | Kigali-Rwanda
REG BBC imaze gushyikirizwa igikombe k'irushanwa ry'intwari 2018

Basketball: REG BBC yegukanye igikombe k’irushanwa ry’Intwari

Yanditswe na NKOMEJE GUILLAUME

Ku ya 06-02-2018 saa 07:45:37

Ikipe ya REG BBC yegukanye igikombe k’irushanwa ry’Intwari “National Heroes Tournament 2018” mu mukino wa Basketball mu kiciro cy’abagabo nyuma yo gutsinda Patriots BBC amanota 54 kuri 51.

REG BBC imaze gushyikirizwa igikombe k’irushanwa ry’intwari 2018

Iri rushanwa ryateguwe mu rwego rwo kwizihiza umunsi mukuru w’Intwari usanzwe wizihizwa tariki 1 Gashyantare buri mwaka, ryatangiye tariki 27 Mutarama risozwa tariki 4 Gashyantare 2018.

Muri uyu  mukino, REG BBC yatangiye nabi  kuko yatakaje agace ka mbere ku manota 17 kuri 12, ibifashijwemo n’ubunararibonye bw’abakinnyi bayo yaje guhindura ibintu maze ibasha gutsinda uduce 3 twakurikiyeho (12-11, 16-12 na 14-11).

Nyuma yo gutsinda uyu mukino byahise biha REG BBC kwegukana igikombe kuko yasoje iri ku mwanya wa mbere nta mukino n’umwe itsinzwe aho ifite amanota 8 mu mikino 4.

Muri iki kiciro, Espoir BBC yegukanye umwanya wa kabiri nyuma yo kwitwara neza itsinda IPRC-South BBC ku manota 78 kuri 71.

Mu makipe 5 yitabiriye irushanwa ry’Intwari ry’uyu mwaka wa 2018, REG BBC yabaye iya mbere n’amanota 8, ikurikirwa na Espoir BBC (7), Patriots BBC ya 3 (6), IPRC-South BBC ya kane (5) naho APR BBC iba iya gatanu n’amanota 4.

Mu kiciro cy’abagore, ikipe ya IPRC-South BBC yegukanye igikombe nyuma yo gutsinda APR BBC bari bahanganye ku manota 79 kuri 77.

Mu makipe 5 yari yitabiriye, IPRC-South BBC yabaye iya mbere n’amanota 6, inganya na APR BBC gusa batandukanwa n’ibitego bazigamye. Ku mwanya wa 3 haza Ubumwe BBC, The Hoops ndetse n’ikipe y’igihugu U-18 zose zinganya amanota 5.

Mu bihembo byatanzwe, REG BBC na IPRC- South BBC zabaye iza mbere zahawe igikombe n’amafaranga ibihumbi 500 naho Espoir BBC na APR BBC za kabiri zihabwa ibihumbi 300. Muri iri rushanwa ry’Intwari 2018, Niyonkuru Pascal ukinira Espoir BBC ni we watowe nk’umukinnyi mwiza mu bagabo “MVP” naho   mu bagore aba Urwibutso Nicole ukinira IPRC-South BBC.

TANGA IGITEKEREZO

Leave a Reply

Your email address will not be published. Required fields are marked *