22°C , Mostly sunny | Kigali-Rwanda
Patriots BBC yatangiye imyitozo yitegura APR BBC mu irushanwa rya Playoffs 2019

Basketball: Patriots ikomeje imyiteguro y’irushanwa rya “Playoffs 2019”

Yanditswe na NKOMEJE GUILLAUME

Ku ya 10-07-2019 saa 11:25:00

Ikipe ya Patriots yatangiye imyitozo yitegura imikino y’irushanwa rya kamarampaka rizwi “Playoffs 2019” rizahuza amakipe yabaye ane ya mbere muri shampiyona ya Basketball mu kiciro cy’abagabo  y’uyu mwaka w’imikino wa 2018-2019.

Muri iri rushanwa, Patriots BBC yasoje shampiyona iri ku mwanya wa mbere n’amanota 30, ikaba igomba guhura n’ikipe ya APR BBC yabaye iya 4 n’amanota 25, biteganyijwe ko umukino wa mbere uzabera kuri Sitade Amahoro i Remera tariki 12 Nyakanga 2019 saa moya z’umugoroba (19h00).

Aganira n’Imvaho Nshya, Mugabe Aristide, kapiteni w’ikipe ya Patriots BBC yatangaje ko bakomeje imyitozo bitegura iri rushanwa ndetse ko irimo kugenda neza.

Yagize ati : “Imyitozo ya Playoffs twayitangiye nko mu byumweru bibiri bishize, irimo kugenda neza, umwuka ni mwiza mu ikipe nta kibazo muri rusange.”

Avuga ko APR BBC bagomba guhura ari ikipe nziza isanzwe ibagora cyane, bityo barimo kugerageza kuyitegura mu buryo bwose bushoboka, bakora imyitozo yo ku rwego rwo hejuru.

Ati : “APR BBC, ni ikipe ikunze kutugora kuko igira abakinnyi bakiri bato kandi bihuta, ni yo mpamvu natwe tugomba kuyitegura ku rwego rwo hejuru.”

Akomeza agira ati : “Niba dushaka kugera ku mukino wa nyuma, biradusaba kwitegura mu buryo bw’imbaraga n’uburyo bw’imikinire yacu kugira ngo tuzabe turi ku rwego rwiza kandi tumeze neza cyane.”

Mugabe yanagaragaje ko mugenzi we, Hagumintwari Steven wari wagize ikibazo k’imvune y’urutugu mu minsi ishize, ntagihindutse azagaragara muri iri rushanwa kuko yatangiye nawe imyitozo kandi ameze neza.

Ku rundi ruhande muri iri rushanwa rya Playoffs 2019, ikipe ya REG BBC yabaye iya kabiri muri shampiona n’amanota 30 izaba ihura na Espoir BBC yaje ku mwanya wa 3 n’amanota 27, aho umukino ubanza uzaba nawo tariki 12 Nyakanga 2019  saa tatu z’ijoro (21h00).

Mu mwaka ushize wa 2018, iyi kipe ya Patriots BBC ni yo yisubije igikombe k’iri rushanwa yari yatwaye mu 2017, nyuma y’uko yitwaye neza itsinda REG BBC imikino 3 kuri 2.

Mu mukino wa nyuma wa 5 wagombaga kugaragaza uwegukana iki gikombe, ikipe ya Patriots BBC yatsinze REG BBC amanota 68 kuri 57 wabereye kuri sitade Amahoro Remera tariki 10 Kanama 2018.

Patriots BBC yatangiye imyitozo yitegura APR BBC mu irushanwa rya Playoffs 2019

TANGA IGITEKEREZO

Leave a Reply

Your email address will not be published. Required fields are marked *