18°C , Mostly cloudy with thunderstorms | Kigali-Rwanda
Patriots BBC yagumye ku mwanya wa mbere wa shampiyona nyuma yo gutsinda UGB BBC itayibabariye

Basketball: Patriots BBC yatsinze UGB BBC iguma ku mwanya wa mbere

Yanditswe na NKOMEJE GUILLAUME

Ku ya 13-03-2018 saa 07:19:31

Ikipe ya Patriots BBC yagumye ku mwanya wa mbere wa shampiyona y’igihugu ya Basketball “StarTimes Basketball National League 2017-2018” nyuma yo kwitwara neza igatsinda UGB BBC ku manota 80 kuri 37.

Patriots BBC yagumye ku mwanya wa mbere wa shampiyona nyuma yo gutsinda UGB BBC itayibabariye

Uyu mukino w’umunsi wa 8 wabaye ku wa Gatanu tariki 09 Werurwe 2018, Patriots BBC yari yasuye UGB BBC yagaragaje ko itangiranye imbaraga zidasanzwe imikino yo kwishyura, iyobora uduce twose tw’umukino (24-10, 23-10, 20-9 na 13-8), irangiza ibonye insinzi ku kinyuranyo cy’amanota 43 (80 kuri 37).

Sagamba Sedar ukinira Patriots BBC ni we watsinze amanota menshi muri uyu mukino (18), akurikirwa na mugenzi we, Kasongo Aubin Junior winjije 13 naho Mugarura Deo wa UGB BBC atsinda 12.

Mu yindi mikino yabaye mu mpera z’icyumweru gishize, APR BBC yatsinze IPRC-Kigali amanota 73 kuri 69, REG BBC  itsinda  IPRC-South BBC amanota 97 kuri 67 naho Espoir BBC itsinda Rusizi BBC amanota 69 kuri 59.

Mu kiciro cy’abagore bari bageze ku munsi wa kabiri shampiyona, imikino yaranzwe no gutungurwa ku makipe akomeye. Ikipe ya IPRC-South BBC yatsinzwe  n’Ubumwe BBC amanota 70 kuri 66 ndetse na APR BBC itsindwa na The Hoops amanota 63 kuri 59. Undi mukino, IPRC-South BBC yatsinze ikipe y’igihugu y’abatarengeje imyaka 18 amanota 78 kuri 64.

Kuri ubu, Patriots BBC ni iya mbere n’amanota 15, hakaza REG BBC na APR BBC zinganya amanota 14, IPRC-South BBC na Espoir BBC zinganya amanota 12, IPRC-Kigali BBC na 11, UGB BBC (10) naho Rusizi BBC ni iya nyuma n’amanota 8.

 

 

 

 

TANGA IGITEKEREZO

Leave a Reply

Be the First to Comment!

avatar