22°C , Mostly sunny | Kigali-Rwanda
Kasongo Junior ukinira Patriots BBC (ufite umupira) ahanganye n'abakinnyi b'ikipe y'APR BBC mu mukino wabahuje

Basketball: Patriots BBC irakira APR BBC mu mukino ubanza wa “Playoffs 2019”

Yanditswe na NKOMEJE GUILLAUME

Ku ya 12-07-2019 saa 09:56:32

Mu mpera z’iki cyumweru, haratangira imikino y’irushanwa rya kamarampaka “Playoffs 2019”, rihuza amakipe yabaye ane ya mbere muri shampiyona y’abagabo n’abagore y’uyu mwaka wa 2019.

Kuri uyu wa Gatanu tariki 12 Nyakanga 2019, ikipe ya Patriots BBC yasoje shampiyona iri ku mwanya wa mbere n’amanota 30 irahura na APR BBC yabaye iya 4 n’amanota 25 ubere kuri sitade Amahoro i Remera (19h00).

Patriots BBC ifite iki gikombe giheruka, ifite akazi katoroshye ko kwitwara neza imbere y’ikipe ya APR BBC yagiye ikunda kuyigora cyane, nubwo yabashije kuyitsinda mu mikino yombi ya shampiyona iheruka kubahuza.

Ku rundi ruhande, APR BBC itozwa na Nkusi Aime Karim na yo iraza kuba ishaka uko yayigaranzura ikayikuraho amanota 2 yo ku munsi wa mbere w’iri rushanwa.

Nyuma y’uyu mukino, REG BBC yabaye iya kabiri muri shampiyona n’amanota 30, irahura na Espoir BBC yaje ku mwanya wa 3 n’amanota 27 saa tatu z’ijoro (21h00).

Iyi mikino yo ku munsi wa kabiri izakomeza ku munsi w’ejo tariki 13 Nyakanga 2019 kuri sitade Amahoro, ikipe ya REG BBC izahura na Espoir BBC (19h00) naho Patriots BBC izongere ihure na APR BBC (21h00).

Mu kiciro cy’abagore, ejo tariki 14 Nyakanga 2019, ikipe ya IPRC Huye BBC yabaye iya kabiri muri shampiyona izakira APR BBC yabaye iya 3 muri IPRC Huye (12h00) naho The Hoops BBC yabaye iya mbere izahure n’Ubumwe BBC yabaye iya 4 umukino uzabere kuri sitade Amahoro (17h00).

Ku munsi wa kabiri, tariki 14 Nyakanga 2019, ikipe ya The Hoops BBC izakina n’ Ubumwe BBC kuri sitade Amahoro (11h00) naho IPRC Huye BBC izongere yakire APR BBC muri IPRC Huye (11h00).

Kugira ngo hamenyekanye ikipe zizagera ku mukino wa nyuma wa Playoffs, aya makipe yombi muri buri kiciro agomba gutanguranwa gutsinda imikino 3 muri 5 iteganyijwe gukinwa.

Bitandukanye n’imyaka yatambutse, ikipe izaba iya mbere muri Playoffs 2019 mu byiciro byombi, ni yo izahita ihabwa igikombe cya shampiyona ya 2019.

Mu mwaka ushize wa 2018, Patriots BBC yanatwaye shampiyona, yisubije iki gikombe cya “Playoffs 2018”, yari yatwaye mu mwaka 2017, itsinze REG BBC imikino 3 kuri 1 naho IPRC Huye BBC igitwara mu bagore itsinze APR BBC imikino 3-2.

Kasongo Junior ukinira Patriots BBC (ufite umupira) ahanganye n’abakinnyi b’ikipe y’APR BBC mu mukino wabahuje

TANGA IGITEKEREZO

Leave a Reply

Your email address will not be published. Required fields are marked *