22°C , Partly sunny | Kigali-Rwanda

Basketball:  Patriots BBC ifite intego yo kwitwara neza mu majonjora  y’ imikino y’Afurika

Yanditswe na BUGINGO FIDELE

Ku ya 12-10-2019 saa 18:02:40
Ikipe ya Patriots BBC yiteguye kwitwara neza mu majonjora y'imikino y'Afurika

Kuri iki Cyumweru tariki 13 Ukwakira 2019 ni bwo ikiciro cya mbere cy’abagize ikipe ya Patriots BBC  gihaguruka kerekeza muri Tanzania ahagiye kubera amajonjora  y’ibanze y’imikino y’Afurika  “Basketball Africa League”.

Ikindi kiciro biteganyijwe ko kizahaguruka ku wa Mbere  tariki 14 Ukwakira 2019  aho bazasanga abandi. Iri rushanwa rigiye kuba ku nshuro ya mbere rizatangira tariki 16 risozwe tariki 20 Ukwakira 2019.

Ikipe ya Patriots BBC yabonye itike yo guserukira u Rwanda muri iyi mikino nyuma yo kwegukana igikombe cya shampiyona ya 2019-2020. Muri iyi mikino  y’amajonjora, Patriots BBC iri mu itsinda D  hamwe na  Hawassa BBC (Ethiopia), City Oil BBC (Uganda, JKT BBC (Tanzania) na Dynamo BBC (Burundi).

Mbere yo kwerekeza muri Tanzania , Perezida w’ishyirahamwe  ry’umukino wa Basketball mu Rwanda “FERWABA”, Mugwiza Desire  Patriots BBC   igiye guhagararira igihugu kandi  bafatanyije nayo kwitegura kugira ngo izabashe kwitwara neza.

Perezida w’iyi kipe, Kirungi Bryan yatangaje ko bashimira abakomeje kubafasha  mu kwitegura iyi mikino  ko na bo biteguye guhesha ishema igihugu.  Yakomeje avuga ko mu bushobozi bari bafite bagerageje gutegura ikipe aho bongeyemo abandi bakinnyi kandi bizeye ko bizabafasha kwitwara neza.

Mu bakinnyi bashya badasanzwe muri iyi kipe  ni  Gasana Kenneth usanzwe akinira ikipe y’igihugu akaba akina muri Maroc,  Blakeney JR George Wilbert ukomoka muri Canada na Nijimbere Guibert usanzwe akinira ikipe ya IPRC Kigali.

Umutoza wungirije w’ikipe ya Patriots BBC, Mukurarinda Claude yatangaje ko  bamaze iminsi mu myitozo kandi abakinnyi bose bameze neza nta kibazo k’imvune cyangwa ikindi bafite kugeza ubu.

Yakomeje avuga ko nyuma yo kugera muri Tanzania ikipe yose, tariki 15 Ukwakira 2019 bazakorera imyitozo kuri Sitade bazakiniraho.

Ku ruhande rwa kapiteni w’iyi kipe, Mugabe Arisitide yavuze ko  amakipe bazakina basanzwe bayazi ariko ko byanze bikunze biteguye. Akomeza avuga ko kuri bo biteguye mu rwego rwo hejuru.

Yagize ati : “Byaratugoye  kubona amashusho y’amakipe tuzahura gusa dusanzwe tuziranye ariko uko twongeyemo abakinnyi na bo bongeyemo urumva rero ko twiteguye nk’abazakina n’amakipe akomeye gusa dufite intego yo kwitwara neza tukazamuka turi aba mbere muri iri tsinda.”

Patriots BBC ifite abaterankunga  batandukanye

Mu rugendo rw’iyi kipe muri iyi mikino y’Afurika ifite abaterankunga batandukanye  kandi bazanakomezanya nayo no mu mwaka utaha w’imikino nk’uko byemejwe n’umuyobozi w’ikigega “Agaciro”, Kayonga Jack.

Ikigega “Agaciro” ni umuterankunga mukuru hari kandi Visit Rwanda, Rwanda Coffee, BK, Rwandair, Nexus, FERWABA, Source Oil, KTRN, Gasabo 3D, RITCO, BDF, HIS na AOS.

Abakinnyi Patriots BBC izifashisha

Aba ni  Sagamba Sedar, Ndizeye Ndayisaba Dieudonne, Hagumintwali Steven, Ruzigande  Ally, Gasana Kenneth, Mugabe Aristide, Kasongo Aubin Junior, Bukuru Joseph, Niyomugabo Sanny, Ishimwe Didier, Makiadi Michael Ongesa, Karekezi Pascal, Nijimbere Guibert, Blakeney JR George Wilbert  na  Hakizimana Lionel. Umutoza mu mukuru ni Mwinuka Henry akazungirizwa na Mukurarinda Claude.

Perezida wa FERWABA, Mugwiza (ibumoso) na Perezida w’ikipe ya Patriots BBC, Kirungi Bryan (iburyo)

Umuyobozi w’ikigega “Agaciro”, Kayonga Jack (ibumoso) wavuze mu izina ry’abaterankunga gahunda bafitiye ikipe ya Patriots BBC

Kapiteni wa Patriots BBC, Mugabe yemeje ko bafite intego yo gusoza ari aba mbere muri iri tsinda D

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.