16°C , Partly sunny | Kigali-Rwanda
Mutabaruka Victor uvuga ko ashobora kuzagaruka mu kibuga mu gihe cy’amezi 9

Basketball: Mutabaruka ashobora kuzagaruka mu kibuga nyuma  y’amezi 9

Yanditswe na NKOMEJE GUILLAUME

Ku ya 08-06-2018 saa 06:26:51

Mutabaruka Victor ukinira IPRC-Kigali BBC n’ikipe y’igihugu nkuru ya Basketball mu bagabo aratangaza ko ashobora kuzongera kugaruka mu kibuga nyuma   y’amezi 9 nyuma y’uko abazwe imvune y’ivi mu byumweru bibiri bishize.

Mutabaruka Victor uvuga ko ashobora kuzagaruka mu kibuga nyuma y’amezi 9

Uyu mukinnyi wabazwe tariki 22 Gicurasi 2018, mu bitaro byitiriwe umwami Faisal yavunikiye mu myitozo y’ikipe y’igihugu yiteguraga imikino y’ikiciro cya mbere yo gushaka itike y’igikombe k’Isi “FIBA Basketball World Cup 2019 Qualifiers” yagombaga kubera i Bamako muri Mali kuva tariki tariki 23 kugeza 25 Gashyantare 2018.

Mu kiganiro yagiranye n’Imvaho Nshya, Mutabaruka yatangaje ko igikorwa cyo kumubaga imvune y’ivi bita “ACL sprain and meniscus” cyagenze neza kandi ko arimo kugenda yoroherwa. Ati  “Ndimo koroherwa mu by’ukuri, birimo kuza mu minsi mike ndatangira kwigenza nta mbago nkoresheje”.

Mutabaruka yemeza ko kugira ngo yizere gukira neza bimusaba kuzamara hagati y’amezi 3 na 4 naho ku rundi ruhande kuba yagaruka mu kibuga ari hagati y’amezi 6 kugera ku mezi 9.

Yagize ati Gukira ni hagati y’amezi 3 kugera kuri 4 naho kugira ngo nibura wizere ko uri ku rwego rwiza cyangwa witeguye kongera gusubira mu kibuga ni hagati y’amezi 6 na 9”.

Akomeza avuga ko ibitaro bya King Faisal bikomeje kumwitaho muri iki gihe by’umwihariko mu bijyanye no kurambura imitsi.

Mutabaruka Victor ni umwe mu bakinnyi bari bagize ibihe byiza muri uyu mwaka w’imikino wa 2017-2018 ari na byo byaje kumuhesha kugirirwa ikizere n’uwari umutoza w’ikipe y’igihugu, Mutokambali Moise. Yanagize uruhare mu gufasha ikipe ya IPRC-Kigali BBC gusoreza mu myana ine ya mbere muri shampiyona ari na yo izakina irushanwa rya Kamarampaka “Playoffs 2018”.

 

 

TANGA IGITEKEREZO

Leave a Reply

Your email address will not be published. Required fields are marked *