16°C , Partly cloudy | Kigali-Rwanda
Murekatete Bella ufite intego yo kuzakina Basketball muri shampiyona ya Leta zunze Ubumwe z'Amerika

Basketball: Murekatete afite intego  yo kuzakina muri NBA

Yanditswe na NKOMEJE GUILLAUME

Ku ya 09-09-2018 saa 09:05:55

Murekatete Bella ni umwe mu bakinnyi ngenderwaho mu ikipe y’iguhugu y’abakobwa y’abatarengeje imyaka 18 yegukanye umwanya wa 4 mu mikino y’igikombe cy’Afurika “2018 FIBA U-18 Women’s African Championship” iheruka kubera i Maputo muri Mozambique kuva tariki 10-19 Kanama 2018.

Murekatete Bella ufite intego yo kuzakina Basketball muri shampiyona ya Leta zunze Ubumwe z’Amerika

Uyu mukinnyi usanzwe wiga akanakinira Ishuri rya “Genesis Preparatory Academy” muri Leta zunze Ubumwe z’Amerika yaje mu bakinnyi batanu beza bagize ikipe y’irushanwa ndetse anahabwa igihembo cy’umukinnyi mwiza w’iri rushanwa wafashe imipira yaganaga mu nkangara “Best Rebounder”.

Ibi kandi yari yanabikoze no mu irushanwa ry’Akarere ka 5 “FIBA Africa Zone 5 Championship 2018” ryaberaga i Dar es Salaam muri Tanzania kuva tariki 17 kugeza 22 Kamena 2018, ari na ho iyi kipe y’u Rwanda yakuye itike yo kwitabira imikino y’Afurika nyuma yo gutwara iki gikombe.

Mu kiganiro kirambuye Imvaho Nshya yagiranye na Murekatete Bella yagize byinshi atangaza ku buzima bwe ndetse avuga  n’intego  ye, inzira yanyuzemo kugeza aho aviriyemo umukinnyi  wa Basketball.

UBUZIMA BWA MUREKATETE

Yabonye izuba tariki 04 Nyakanga 2000, avukira muri Butare ( Huye). Ni umwana w’umuhererezi mu muryango w’abana 4, abahungu babiri n’abakobwa babiri, bavuka kuri nyakwigendera Kanamugire Joseph wapfuye mu 2014 ndetse na Uwindereye Anne Marie. Uyu muryango utuye i Tumba, mu Karere ka Huye, Intara y’Amagepfo.

Yize amashuri abanza mu bigo bibiri, aho yatangiriye ku Kibondo ajya kuri  Ecole Otonomie nyuma agaruka  ku Kibondo ari na ho yasoreje.

Mu mwaka wa 2014 yatangiye amashuri yisumbuye muri Ecole Notre Dame de la Providence Karubanda, ahiga umwaka wa mbere, gusa ntabwo yabashije kuhakomereza kuko yahise yerekeza muri Leta zunze Ubumwe z’Amerika mu 2015 aho yiga abikesha gukina Basketball.

Ati: “Amashuri yisumbuye nayatangiriye ku Karubanda, mu wa mbere, undi mwaka ni bwo navuye mu Rwanda niga mu wa 1 nari mparangije ngiye mu wa kabiri”.

Yaje kuhakomereza yiga umwaka wa kabiri ndetse n’uwa gatatu. Ageze mu mwaka wa kane yize imibare, ibinyabuzima n’ubugenge, kuri ubu akaba arimo kwiga umwaka wa gatandatu w’amashuri yisumbuye.

GUKINA BASKETBALL BYAKOMOTSE KU MUTOZA MUSHUMBA

Murekatete avuga ko akiri muto yakinaga umukino w’intoki wa Volleyball ariko akaba nta hantu yigeze ayikina, ahubwo byari mu rwego rwo kwishimisha.           Ati :“Ubusanzwe nakinaga Volleyball ariko nishimisha”.

Avuga ko yatangiye gukina Basketball mu 2014 nyuma y’umwaka umwe ahuye n’umutoza Mushumba Charles (2013). Yagize ati: “Natangiye kuyikina mu 2014, byaturutse ku mutoza Mushumba  ni we wambonyemo ubushobozi agahitamo kungirira icyo kizere”.

Akomeza avuga ko yamubonye mu muhanda hanyuma aramuhamagara.                  Ati :“Narimvuye kwa muganga ngiye ku kazi aho  mama yakoreraga, ambona mu muhanda ndi kugenda, hanyuma arampagara ambaza amazina, ambaza aho niga n’imyaka mfite. Hakurikiyeho guhita njya kwiga ku Karubanda kuko ni ho yatorezaga, hanyuma Basketball yange itangirira aho”.

Murekatete ahamya ko atangira gukina Basketball byamugoye. Ati: “Byarangoye ariko bitari cyane, kuko burya iyo ukina Volleyball, Basketball ntikugora cyane”.

Uyu mukinnyi yemeza ko kuba yarajyaga agirirwaga ikizere cyo gukina mu ikipe ya mbere y’ikigo byari iby’agaciro gakomeye kuri we, kuko atabashije gukina bihoraho mu ikipe y’ishuri yigagamo.

Ati: “Nakinnye mu ikipe y’ikigo ariko bitari cyane kuko muri icyo gihe hari hari abakinnyi beza cyane barimo Umuhoza Martine Akimana (Kavende), ubu akina muri APR BBC hamwe na Urwibutso Nicole ukina muri IPRC-South BBC n’abandi benshi batagikina”.

UKO YAGEZE MU IKIPE Y’IGIHUGU

Yatangiye gukinira ikipe y’igihugu mu 2015, ubwo yahamagarwaga n’umutoza Mushumba Charles w’iyi kipe y’u Rwanda y’abakobwa batarengeje imyaka 16, yaje no kwitabira imikino y’Afurika (2015 FIBA Africa Under-16 Championship for Women) yabereye muri Madagascar kuva tariki 11-19 Nyakanga 2015.

Murekatete utangaza ko yakiriye neza gukinira iyi kipe y’igihugu ku nshuro ya mbere, yaje mu ikipe y’abakinnyi batanu bitwaye neza muri iyi mikino yakinwaga ku nshuro ya kane.

YEMEZA KO KUBA YIGA AKANAKINA MURI AMERIKA BYAMWUNGUYE BYINSHI

Murekatete wageze muri Leta zunze Ubumwe z’Ameika mu 2015 agiye kwiga no gukina, avuga ko yungutse byinshi mu mukino wa Basketball ari nabyo bituma afasha ikipe y’igihugu mu mikino itandukanye.

Ati: “Ikintu cya mbere maze kwiyongeraho ndi  muremure, byamfashije gukomera no kwihuta, kumenyera gukina imikino myinshi, kugira imyitozo myinshi. Ubu narakuze mu mutwe menya ko umukino wose twawutsinda tutitaye ku cyabaye n’icyo bazanye, Basketball yo muri Amerika iri hejuru cyane bampa ubumenyi nkaba ari bwo nzana mu ikipe y’igihugu”.

YAGARAGAJE KO AFITE INTEGO YO KUZAKINA MURI “WNBA”

Afite intego yo kuzakina muri shampiyona ya Basketball y’abagore muri Leta zunze Ubumwe z’Amerika. Ati “Intego yange ni ukurangiza amashuri yisumbuye nkajya muri kaminuza nayirangiza nkajya muri shampiyona y’abagore ya Leta zunze Ubumwe z’Amerika (Women’s National Basketball Association /WNBA)”.

Murekatete Bella wifuza kurangiza amasomo ye ndetse no kuzafasha umuryango we, atangaza ko abakinnyi bamubera ikitegererezo mu gukina umukino wa Basketball, mu bagore ari  Monique Billings ukinira Atlanta Dreams ibarizwa mu gice cy’Uburasirazuba na ho mu bagabo ni Lebron James, ukinira LA Lakers yo muri Amerika.

 

TANGA IGITEKEREZO

Leave a Reply

Your email address will not be published. Required fields are marked *