21°C , Partly cloudy | Kigali-Rwanda
Kamilindi Olivier wari umaze imyaka ine akinira Patriots BBC, ni umukinnyi mushya wa Espoir BBC.

Basketball: Kamilindi yasinye umwaka umwe muri Espoir BBC

Yanditswe na Nkomeje Guillaume

Ku ya 08-11-2018 saa 14:57:43

Ikipe ya Espoir BBC yasinyishije Kamilindi Olivier wakiniraga Patriots BBC amasezerano y’umwaka umwe mu rwego rwo kwitegura umwaka w’imikino wa 2018-2019.

Mu kiganiro Imvaho Nshya yagiranye na Mwiseneza Maxime Marius, umutoza mukuru wa Espoir BBC yatangaje ko Kamilindi Olivier bamuhaye amasezerano y’umwaka umwe ariko ushobora kongerwa.

Avuga ko Kamlindi ari umukinnyi bari bakeneye cyane kuko azabafasha mu bijyanye n’ubwugarizi.

Ati “Twari dukeneye umukinnyi ukina hagati, rero azadufasha cyane mu bwugarizi ndetse binyanye n’ubunararibonye afite azafasha abana bacu gukina bashyize hamwe.”

Mwiseneza avuga ko gusinyisha abakinnyi bashya baza kongerera abo bari basanganywe ingufu bigikomeje cyane ko hari n’abandi babiri barimo kugirana ibiganiro.

Ati “N’ubwo tumaze gusinyisha Kamilindi hari n’abandi bakinnyi babiri tukiganira na bo ariko ibiganiro ntibirarangira.”

Kamilindi Olivier wari umaze imyaka ine akinira Patriots BBC, ni umukinnyi mushya wa Espoir BBC.

Mwiseneza yaboneyeho no gutangaza ko hari n’abakinnyi bamaze gutandukana n’iyi kipe barimo Uwimana Sankara na Niyungeho Jean De Dieu uzwi nka “Hakim”.

Aba bakinnyi bombi biyongeraho Niyonkuru Pascal “Kaceka” wari kapiteni wa Espoir BBC wamaze kwerekeza muri APR BBC, akaba yarasinye amasezerano y’imyaka ibiri.

Kamilindi wari umaze imyaka ine muri Patriots BBC agatwarana nayo ibikombe bitari bike, birimo na shampiyona ishize yatangaje ko mu gihe yari ayibayemo hari byinshi yahigiye bitari Basketball gusa yashimiye iyi kipe ku byo yabashije kumugezaho.

Yavuze ko kuri ubu, ahinduye akaba yerekeje mu ikipe ya Espoir BBC, kandi ko ashimishijwe no kuba azagira ibihe byiza muri iyi kipe.

Kamilindi Olivier abaye umukinnyi wa kabiri mushya werekeje muri Espoir BBC, nyuma y’Umurundi, Rukundo Fabrice wahoze muri RP-IPRC Huye BBC (IPRC-South BBC) na we wasinye amasezerano y’umwaka umwe.

TANGA IGITEKEREZO

Leave a Reply

Your email address will not be published. Required fields are marked *