Ubwo umutoza wa IPRC-South BBC, Mushumba Charles yabwiraga abakinnyi be uko bitwara muri uwo mukino

Basketball: IPRC-South BBC yatakaje umukino wa kabiri muri shampiyona

Yanditswe na NKOMEJE GUILLAUME

Ku ya 09-01-2018 saa 12:02:12

Shampiyona y’igihugu y’umukino wa Basketball yari yakomeje mu mpera z’icyumweru gishize, yasize ikipe ya IPRC-South BBC yongeye gutakaza undi mukino itsinzwe na APR BBC ku manota 80 kuri 71.

Ubwo umutoza wa IPRC-South BBC, Mushumba Charles yabwiraga abakinnyi be uko bitwara muri uwo mukino

Muri uwo mukino w’umunsi wa 9 wabereye kuri Sitade Amahoro tariki 07 Mutarama 2017, IPRC-South BBC yari yagaragaje umukino mwiza inayobora uduce 3 tubanza tw’umukino ntiyabashije kwihagararaho mu gace ka nyuma birangira iwutakaje ku kinyuranyo cy’amanota 9 (80-71).

IPRC-South BBC yatsinze agace ka mbere kuri 22-21, aka kabiri kuri 13-12, aka gatatu kuri 28-21 naho itsindwa agace ka nyuma (4) ku manota 26-08.

Umukinnyi wa APR BBC, Ntagunduka Jean De Dieu ni we watsinze amanota menshi (18) akurikirwa na mugenzi we, Iyakaremye Emmanuel na 15 akaba anganya na Muberwa Medard ukinira IPRC-South BBC naho Kabayiza Jean Baptiste wo muri APR BBC yinjiza 13.

Mu kiganiro n’itangazamakuru nyuma y’uwo mukino, umutoza wa IPRC-South BBC, Mushumba Charles yatangaje ko batakaje kubera ko abakinnyi be bari bananiwe bitewe  no gukina imikino ibiri ikurikiranye mu gihe kitagera ku masaha 24.

Mushumba Charles kandi akaba anabihuza n’uko gukina na APR BBC atari ibintu byoroshye kuko ari ikipe nziza kandi ifite ubwugarizi bwiza. Ati “Ikipe twakinnye yari ifite ubwugarizi bwiza, urebye ni cyo kintu gikomeye”.

Uwo ubaye umukino wa kabiri IPRC-South BBC itsinzwe kuko mu mikino 5 ya shampiyona imaze gukina yaherukaga gutsindwa na REG BBC ku manota 75 kuri 58.

Ikipe ya IPRC-South BBC mbere y’uko ihura na APR BBC yari yitwaye neza mu mukino wari wabaye ku wa Gatandatu aho yatsinze UGB BBC ku manota 75 kuri 58.

Mu yindi mikino yabaye, UGB BBC yatsinze Rusizi BBC amanota 79 kuri 60, Espoir BBC itsinda Rusizi BBC amanota 95 kuri 52 ndetse Patriots BBC itsinda APR BBC ku manota 65 kuri 52.

Ubu REG BBC iracyayoboye urutonde rwa shampiyona n’amanota 9, inganya na Patriots BBC iyikurikiye, hakaza Espoir BBC, IPRC-South BBC, APR BBC na UGB BBC zose zifite 8, IPRC- Kigali BBC na 6 naho Rusizi BBC ikaba iya nyuma n’amanota 4.

 

TANGA IGITEKEREZO

Leave a Reply

Be the First to Comment!

avatar