18°C , Mostly cloudy | Kigali-Rwanda

Basketball: IPRC Kigali na APR BBC zirabimburira izindi muri   “Legacy Tournament 2019”

Yanditswe na BUGINGO FIDELE

Ku ya 06-11-2019 saa 08:32:00
Umukino wa IPRC Kigali na APR BBC ni wo ubimburira iyindi muri Legacy Tournament 2019”

Amakipe agera kuri 15 mu byiciro bitandukanye ni yo agiye  kwitabira irushanwa ngarukamwaka ry’Umurage muri Basketball “Legacy Tournament 2019” kuva kuri uyu wa Gatatu tariki 06 kugeza  tariki 09  Ugushyingo 2019.

Iri rushanwa ryateguwe n’ikipe ya United Generation Basketball (UGB) ku bufatanye n’ishyirahamwe ry’umukino wa Basketball mu Rwanda “FERWABA”, rigamije kwibuka Nyakwigendera Shampiyona Aimable na Nizeyimana Jean de Dieu bagize uruhare mu guteza imbere uyu mukino mu ishuri rya Lyceé de Kigali, bakanashinga ikipe ya UGB.

Amakipe yitabiriye ari mu byiciro 4  birimo abagabo, abagore, abakanyujijeho ndetse n’abakiri bato.

Mu bagabo amakipe yitabiriye ni 7 aho agabanyije mu matsinda 2. Itsinda A ririmo  Patriots BBC, APR BBC, IPRC Kigali na IPRC-Huye naho itsinda B ririmo REG BBC, UGB na Espoir BBC.

Mu bagore hari amakipe 3 ari yo IPRC Huye, The Hoops BBC n’Ubumwe BBC. Mu bakanyujijeho itsinda A ririmo UGB BBC na CSK BBC naho itsinda B rikabamo Patriots BBC na Bakolo BBC. Mu bakiri bato hari ikipe ya Shooting Touch na Elite BBC.

Imikino y’amajonjora igomba kubera muri Sitade Nto Amahoro na NPC mu gihe mikino ya nyuma izabera muri Kigali Arena tariki 09 Ugushyingo 2019.

Kuri uyu wa Gatatu tariki 06 Ugushyingo 2019 ni bwo hateganyijwe imikino y’umunsi wa mbere aho mu bagabo IPRC Kigali ikina na APR BBC (18h00) muri NPC, REG BBC ikine na UGB (18h00) muri Sitade Nto naho IPRC Huye ikine na Patriots BBC (20h00) muri NPC. Undi mukino uri mu kiciro cy’abakanyujijeho aho UGB ikina na CSK (20h00) muri Sitade Nto Amahoro.

Tariki 07 Ugushyingo 2019, mu bagore The Hoops BBC izakina n’Ubumwe BBC (18h00) muri NPC, mu bagabo APR BBC izakina na IPRC Huye (18h00) muri Sitade Nto, Espoir BBC izakina na REG BBC (20h00) muri NPC naho Patriots BBC ikine na IPRC-Kigali (20h00) muri Sitade Nto.

Ku munsi wa 3, tariki 08 Ugushyingo 2019, mu bagore ikipe ya IPRC Huye izakina n’Ubumwe (18h00) muri NPC. Mu bagabo IPRC Huye ikine na IPRC Kigali (18h00) muri Sitade Nto.  Mu bakanyujijeho, Patriots izakina na Bakolo (20h00) muri NPC.

Ikipe ya UGB izakina na Espoir BBC (20h00) naho APR BBC ikine na Patriots BBC (22h00), imikino izabera muri Sitade Nto.

Ku munsi wa nyuma tariki 09 Ugushyingo 2019,   mu bato, Shooting Touch izakina na Elite BBC (13h00). Mu bagore, The Hoops ikine na IPRC Huye (15h00). Mu bakanyujijeho izatsinda hagati ya UGB na CSK izahura n’izatsinda hagati ya  Patriots na Bakolo (17h00) naho mu bagabo iya mbere mu  itsinda A izahure n’iya mbere mu itsinda B (19h00). Iyi mikino ya nyuma yose izabera muri Kigali Arena.

Muri 2018, Patriots BBC ni yo yegukanye igikombe mu bagabo mu bagore cyatwawe na IPRC Huye BBC naho  UGB yegukanye iki gikombe mu bakanyujijeho.

Nyakwigendera Shampiyona Aimable na Nizeyimana Jean de Dieu bagize uruhare mu guteza imbere umukino wa Basketball

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.