18°C , Partly cloudy | Kigali-Rwanda
Ubwo abakinnyi b'ikipe y'u Rwanda bakoraga imyitozo mbere y'uko berekeza muri Nigeria

Basketball: Ikipe y’u Rwanda irakina na Nigeria mu mukino wa gicuti

Yanditswe na NKOMEJE GUILLAUME

Ku ya 12-09-2018 saa 08:17:07

Uyu munsi

Rwanda-Nigeria (19h00)

Kuri uyu wa Gatatu tariki 12 Nzeri 2018, ikipe y’u Rwanda nkuru mu mukino wa Basketball  irakina n’ikipe y’igihugu ya Nigeria mu mukino wa gicuti, ubere i Lagos saa moya z’umugoroba ku masaha y’i Kigali (19h00).

Ubwo abakinnyi b’ikipe y’u Rwanda bakoraga imyitozo mbere y’uko berekeza muri Nigeria

Uyu mukino wa gicuti, ukaba uri mu rwego rwo kwitegura imikino y’amajonjora y’ikiciro cya kabiri yo gushaka itike y’igikombe k’Isi “FIBA Basketball World Cup 2019 African Qualifiers” izabera i Lagos muri Nigeria guhera kuri uyu wa Gatanu tariki 14-16 Nzeri 2018.

Aganira n’Imvaho Nshya, Vladimir Bosnjak, umutoza mukuru w’ikipe y’igihugu, yatangaje ko bageze muri Nigeria amahoro nyuma y’uko bahagurutse i Kigali tariki 10 Nzeri 2018.

Avuga ko nubwo byabasabye gukora urugendo rw’amasaha abiri kugira ngo bagere kuri Hoteli bacumbitsemo, bitewe n’ubucucike bw’imodoka nyinshi, abakinnyi bameze neza nta kibazo.

Uyu mutoza avuga ko uyu mukino wa gicuti ari ingenzi, kuko ubaha ubunararibonye ndetse uramufasha gukinisha abakinnyi bose yajyanye kugira ngo amenye  neza urwego bariho mbere yo gutangira iyi mikino.

Yagize ati Uyu mukino wa gicuti tuza guhuramo na Nigeria, uraduha kugira ubunararibonye, ikindi ni umwanya mwiza wo gukinisha abakinnyi bacu uko ari 12, bityo bimfashe kumenya uko bahagaze mbere y’uko dutangira gukina aya marushanwa.”

Vladimir Bosnjak avuga ko nubwo batabashije kubona Darius Garret ku munota wa nyuma, binagoranye kubona uwahita amusimbura bari ku rwego rumwe, bafite intego yo kwitwara neza ku makipe bazahura nayo muri aya marushanwa.

Ikipe y’u Rwanda iri mu itsinda rya kabiri “F” hamwe na Nigeria, Mali, Senegal, Cote d’Ivoire na Centrafrique, kugira ngo ibone itike y’igikombe k’Isi, irasabwa guhatanira kuza mu makipe abiri ya mbere. Indi mikino izaba kuva tariki 22 kugeza 24 Gashyatare 2019.

Iyi kipe y’u Rwanda izatangira ihura na Senegal, kuri uyu wa Gatanu tariki 14 Nzeri, izakurikizeho  Cote d’Ivoire, tariki 15 Nzeri naho tariki 16 Nzeri 2018 izakine na Central African Republic.

Mu rindi tsinda rya mbere “E”, rizakinira i Tunis muri Tunisia, ririmo ibihugu na Tunisia, Cameroun, Chad, Angola, Misiri na Maroc.

Amakipe abiri ya mbere muri buri tsinda n’ikipe yabaye iya gatatu yitwaye neza, azaba muri 32 azakina imikino ya nyuma y’igikombe k’Isi “FIBA Basketball World Cup 2019” izabera mu Bushinwa kuva tariki 31 Kanama kugeza tariki 15 Nzeri 2019.

 

 

 

 

 

 

 

 

TANGA IGITEKEREZO

Leave a Reply

Your email address will not be published. Required fields are marked *