27°C , Mostly cloudy | Kigali-Rwanda
Umutoza w'ikipe y'igihugu, Mutokambali Moise utangaza ko biteguye neza umukino wa Mali

Basketball: Ikipe y’u Rwanda irakina na Mali mu gushaka itike y’igikombe k’Isi

Yanditswe na NKOMEJE GUILLAUME

Ku ya 23-02-2018 saa 08:38:41

Uyu munsi

Rwanda-Mali (20h00)

Ejo tariki 24-02-2018

Rwanda-Nigeria (17h30)

Tariki 25-02-2018

Rwanda-Uganda (17h30)

Uyu munsi tariki 23 Gashyantare 2018, ikipe y’u Rwanda nkuru mu mukino wa Basketball mu bagabo, irakina na Mali mu mukino ubanza w’imikino y’amajonjora yo gushaka itike y’igikombe k’isi “FIBA Basketball World Cup 2019 ” izabera mu Bushinwa muri Nzeri 2019.

Umutoza w’ikipe y’igihugu, Mutokambali Moise utangaza ko biteguye neza umukino wa Mali

Iyo mikino yo mu itsinda B, ikaba iri mu rwego rwo gushaka itike y’igikombe k’isi y’ikiciro cya mbere aho ibera i Bamako muri Mali kuva kuri uyu wa Gatanu tariki 23 kugeza 25 Gashyantare 2018.

Umutoza w’ikipe y’igihugu, Mutokambali Moise yabwiye Imvaho Nshya ko umukino wa Mali bawiteguye neza ndetse ko ari umukino bashaka kuza gukoresha imbaraga nyinshi bityo bakaba bayitungura.

Yagize ati Tuwiteguye neza, kuko ni  umukino dushaka kuza gukoresha imbaraga, ku buryo dutungura Mali, tugashakisha insinzi hakiri kare, kuko dutsinze umukino wa mbere byaba ari byiza cyane”. 

Mutokambali avuga ko Mali basanzwe bayizi ndetse ko n’urwego iriho rutari hejuru cyane bityo ko mu gihe baramuka babonye insinzi muri uyu mukino byababera intangiriro nziza, bikabongerera n’amahirwe yo kubona itike y’iyi mikino y’igikombe k’isi.

Yagize ati “Ni umukino dufiteho intego ku buryo dushaka gukora ibishoboka byose tugatungura Mali, kuko twakinnye nayo mu mukino wa gicuti, urwego rwayo turaruzi nta bwo ari urwego ruhambaye cyane, n’ubwo iri iwayo dushobora kuyitungura kugira ngo twinjire mu rugamba neza kandi turamutse dutahukanye insinzi mu mukino wa mbere byatwongerera amahirwe yo kubona itike”.

Mu mukino wa gicuti uheruka guhuza u Rwanda na Mali, wabaye tariki 03 Nzeri 2017, ikipe y’u Rwanda yari yayoboye uwo mukino yaje kuwutakaza mu masegonda 10 ya nyuma itsinzwe amanota 68 kuri 67.

Iyi kipe y’igihugu iri mu itsinda B hamwe na Mali, Uganda na Nigeria, izakurikizeho umukino wa Nigeria uzaba ejo tariki 24 Gashyantare 2018 mbere y’uko ihura na Uganda tariki 25 Gashyantare 2018 mu mukino usoza iki kiciro.

Nyuma y’iyi mikino y’amajonjora y’ikiciro cya mbere yo gushaka itike y’igikombe k’isi irimo kubera muri Mali, biteganyijwe ko indi mikino y’ikiciro gikurikiyeho izaba kuva tariki 28 Kamena – 01 Nyakanga 2018.

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

 

TANGA IGITEKEREZO

Leave a Reply

Be the First to Comment!

avatar