18°C , Mostly cloudy | Kigali-Rwanda
Mushumba Charles umaze imyaka 16 ari umutoza aho yafashije mu kuzamura umukino wa Basketball mu kiciro cy'abakobwa

Basketball: Ibigwi bya Mushumba umaze imyaka 16 ari umutoza

Yanditswe na BIZIMANA ERIC

Ku ya 11-10-2018 saa 18:07:03

Mushumba Charles utoza IPRC y’Amajyepfo ni umwe mu batoza bakomeye kandi bafite ibigwi mu mukino wa Basketball mu Rwanda.

Yabaye umukinnyi mu gihe k’imyaka 20 nyuma aba umutoza wa Kaminuza Nkuru y’u Rwanda ayisigira ibikombe 22.

Yanatoje ikipe y’igihugu mu bihe bitandukanye. Anafite uburambe bw’imyaka 21 mu mwuga w’uburezi aho yigisha anatoza siporo muri GS NDP Karubanda i Huye.

Mushumba ni umwe mu bubatse banaharanira iterambere rya Basketball cyane cyane iy’abagore.

Mushumba ni muntu ki?

Amazina ye ni Mushumba Charles ariko akanagira irya Lwanga riri ku ikarita ye ya batisimu rifitanye isano n’abahowe Imana b’i Bugande.

Yabonye izuba tariki 8 Ukwakira 1977 mu cyahoze ari Komini Maraba ubu ni mu Murenge wa Simbi mu Karere ka Huye.

Ni umwana wa munani mu muryango w’abana 10 ba Nyiragumiriza Agnes utuye i Simbi na nyakwigendera Mushumba Laurent.

Yasezeranye na Kayitesi Eugenie tariki 16 Kanama 2008, babyarana abakobwa babiri ari bo Kessi Ineza Nikita Mushumba na Irakoze Mushumba Carla.

Yize amashuri abanza i Simbi, yiga ikiciro rusange kuri ES Louis de Monfort mbere ya Jenoside yakorewe Abatutsi, nyuma yayo yize muri Biochimie muri GS Shyogwe i Muhanga asoreza muri Petit Seminaire Baptiste i Huye. Yabonye impamyabumenyi mu bijyanye n’icungamutungo.

Mu buzima busanzwe, usibye kuba umutoza n’umwarimu mu mashuri yisumbuye, Mushumba ni umworozi w’inkoko.

Mushumba Charles usanzwe ari n’umutoza w’ikipe y’igihugu y’abakobwa batarengeje imyaka 18

Mushumba yakuze akunda Basketball ariko afite impano yo gusiganwa

Mushumba avuga ko mu bwana bwe yakuze ari umwana ushoboye cyane umukino wo gusiganwa ku maguru kuva akiri mu mashuri abanza aho i Simbi.

Ati: “Nkiri umwana nibuka ko najyaga kwiga niruka mfite ikigurudumu, ni na byo byaziyeho gukunda siporo. Nibuka ko nari mfite icya moto, icyo ku ipine y’imodoka n’ik’igare. Narabihinduranyaga kandi bikamfasha kwiruka, nigaga mu bilometero nka bitanu”.

Mushumba akomeza yerekana ko ageze mu kiciro rusange yabanje kujya muri Volleyball mbere yo gukunda cyane umukino wa Basketball.

Ati:“Muri ES Nyanza nabanje kujya muri Volleyball , ariko ndavuga nti uyu mukino bakina nta muntu uhura na mugenzi we,… sinzi ibyanjemo ndavuga nti reka nigire muri Basketball ni ho umuntu ahura n’undi. Icyo gihe hariho umuntu witwa Michael Jordan wari ugezweho ku buryo nange namukundaga cyane, nkavuga nti ngomba kuba nka we”.

Yungamo ati:“Ngeze i Shyogwe, dukomerezayo, dusanga na ho Basketball ihari, kandi umuyobozi twahasanze ashaka abandi bana kugira ngo baze badufashe. Ndanibuka ko twaje mu bigo bine bya mbere mu gihugu”.

Mushumba amaze kwerekeza muri Petit Seminaire Baptiste i Huye yaje gukomeza umukino wo gusiganwa ku maguru mbere yo kuwuhagarika burundu akajya mu mukino akunda.

Ati:“Ngeze muri Petit Seminaire Baptiste nahuye n’umugabo watozaga imikino ngororamubiri arandeba anjyana kwiruka metero 800, narinze nyivamo nta muntu unsize. Byaranankurikiranye ku buryo n’iyo ntoza sinkunda umukinnyi utiruka”.

Arakomeza ati:“Mu 2001, ni bwo nasezeye wa mutoza, aranababara cyane, ndamubwira nti rero nkunda Basketball reka abe ari ho nguma. Na we arambwira ati n’ubundi byakuvuna niba atari byo ukunda”.

Mushumba yinjiye mu butoza akiri muto

Mushumba wari umaze imyaka ibiri akinira Kaminuza Nkuru y’u Rwanda agaragaza ko nyuma yo kubona ko atazagera ku rwego yifuza yahisemo guhagarika hakiri kare ajya gufasha abakiri bato ku myaka 25 mu 2002,yinjira mu butoza adafite impamyabushobozi kandi atangirira mu ikipe y’abakobwa ya Kaminuza.

Ati:“Naribazaga nti ese ndajya mu bahungu cyangwa mu bakobwa? Icyo nahise mbona ni uko abakobwa bari bafite ikibazo gikomeye cy’abatoza. Ikindi gutoza abakobwa bisaba kwihangana. Byanahuriranye n’uko umutoza w’ikipe y’abakobwa ya Kaminuza yashakaga kubivamo, ndavuga nti reka nifatire iriya idafite umutoza”.

Mushumba yaje gushaka impamyabushobozi yo mu rwego rwa mbere mu 2003.

Icyo gihe ariko akaba yari umwarimu w’Imibare, Ubugenge, Ubukungu na Siporo muri Petit Seminaire Baptiste, maze mu 2003 ahita anatangira kwigisha siporo muri GS NDP Karubanda anakomeza gutoza abana baho bamwe bagakomezanya muri Kaminuza.

Mushumba yemera ko muri Kaminuza yahagiriye cyane amahirwe kuko yahatwariye ibikombe bitanu bya shampiyona anatwara igikombe cy’akarere ka gatanu mu 2004.

Kimwe mu byamushimishije cyane ni ukugirwa umutoza wungirije w’ikipe y’igihugu y’abagore mu 2007, asabwa gutanga abakinnyi beza afite maze umunani yatoranyije mu ijonjora ryibanze ry’abakinnyi 25 bagaragara mu rutonde rw’abakinnyi 12.

Ati:“Ibyo nakoraga ubanza hari umusaruro byatangaga. Abenshi b’icyo gihe barakuze bibereye mu ikipe y’Ubumwe, njya mbabwira ko ari bo batumye menyekana cyane cyangwa nzamuka”.

Mushumba wabonaga ko Basketball y’abagore igeze ku rundi rwego yiyemeje no kuzamura ikipe y’abagabo, iy’abagore ayiha mugenzi we.

Mu 2011, Kaminuza Nkuru y’u Rwanda yayoborwaga na Prof Silas Lwakabamba yafashe ikemezo cyo kugabanya burundu ingengo y’imari ijya muri siporo ahagarika kontaro z’abatoza bose, ariko ntibyaca intege Mushumba wakomeje gukora uyu mwuga yakundaga ku buntu.

Ati:“Naravuze nti igihe cyose nzaba nkiri i Butare, ntabwo kaminuza igomba kuzimira. Icyo gihe byari ibihe bikomeye, nibuka ko nka Nyirimana Fidele yatorezaga Kaminuza i Kigali ku barangije, abandi i Butare. Nge naravuze nti kuba mba ku Karubanda nkaba mfite uko mbaho reka nkomeze mfashe abana. bazageraho bagaruke, basange amakipe agihari”.

Kuva mu 2012 kugeza mu 2016 Mushumba yatozaga ikipe y’abakobwa n’abahungu ya Kaminuza n’iya GS NDP Karubanda muri shampiyona.

Mushumba avuga ko muri Kaminuza ari ahantu atazibagirwa kubera urukundo rw’imikino rwahabaga.

Umutoza Mushumba Charles utoza IPRC-South BBC atanga amabwiriza ku bakinnyi be.

Kwerekeza muri IPRC South

Mushumba wabonaga ko Kaminuza itagifite politiki yo kugarura siporo yahisemo gufasha IPRC-South mu mikino ya “Playoffs 2016” aje gusimbura Bineza Didier wari umutoza wayo birangira ayikomezanyije kugeza ubu.

Mu butoza bwe kandi Mushumba kuva yatangira aka kazi ntarabura mu makipe ane agera muri 1/4 k’imikino ihuza amashuri yisumbuye. Yanatwaye ibikombe bibiri mu ikipe y’igihugu.

Kureba imikino ibiri ya NBA, kimwe mu byamushimishije mu buzima bwe

Mu buzima bwe, Mushumba yabashije kureba imikino ibiri ya shampiyona ikomeye y’Amerika muri Basketball « NBA » harimo uwa Cleverand yakinagamo Lebron James na Shaquille O’Neal na Celtic Boston yakinagamo Kevin Garnet. Hari kandi uwa Huston Rocket ya Yao Ming na Neywork Nick.

Mushumba avuga ko nko ku mukino wa Huston bagiye bahawe ubutumire ariko ashaka kureba uko baba babayeho. Ati: “Nashakaga kumenya ngo Yao Ming yambara inkweto zimeze gute? Ziba ziri he? Dufata amafoto, batubuza kubishyira kuri Facebook. Naramubonye nubwo atari yakinnye”.

Avuga ko ibi byabaye nyamara yari agiye gusezera Basketball nyuma yo guhesha itike ikipe y’igihugu bikarangira ahawe nshingano.

Ati: “Icyanshimishije mu buzima ni ukuba kera narararaga amajoro ndeba abantu muri All Stars, naravugaga nti icyazampa bariya bantu nkababona imbona nkubone. Umukino wa mbere wa NBA narebye mu 2009, nari ngiye kuva muri Basketball kuko twari twafashije ikipe y’igihugu kubona itike y’imikino y’Afurika nyuma twe baradusimbuza bashaka undi. Narababaye ndavuga nti ubanza ntari mu bintu byange”.

Akomeza agira ati: “Ndi kubyigaho, nabonye ubutumire bunjyana muri Amerika, nibuka ko iyo kipe y’igihugu yagiye Madagascar nge bukeye bwaho njya muri USA. Nge nizera Imana, nahise mvuga nti mu isengesho ryange navugaga kera, Imana ikoze igitangaza, abantu bagiye muri Madagascar nge ngiye muri USA”.

Noneho nyuma y’imyaka 6, hahantu muri Madagascar ejo bundi yahajyanye abana batarengeje 16 ari umutoza mukuru”.

TANGA IGITEKEREZO

4 Comments on “Basketball: Ibigwi bya Mushumba umaze imyaka 16 ari umutoza”

  1. Congs Mushumba mon petit frère iyo nibutse ko watangiye basket nkureba nugufasha ngirango ni amusement none dore ubaye ubukombe n’igihangange nakwibutsa Prosper na Mudacumura i Nyanza muri ESN .. courage ibyoza biri imbere

  2. Congratulations my Borther Mushumba, Inyana ni iya mweru. Na Papa wawe yari ashoboye kuririmbisha n’ijwi ry’agahebuzo. ndamwibuka atwigisha imenagitero ya Rugamaba Cyprien. Ahubwo ntarasobanukirwa neza ibya Rugamaba iyo nayumvaga kuri radio nabaga nziko Papa wawe Mushumba ariwe nyirayo. Bityo rero komereza aho kandi uzagera kure Cyaneeeee!!!!!!!!!!!!!.

  3. Mushumba Ni umutoza ukomeye kndi ushoboye,vraiment afite experience ku buryo akora neza neza I yo azi!gusa na none ibigo baba batorezamo bige biborohereza bibumve muburyo nko kugura abakinnyi biborohereza.mushumba courage kbsa

Leave a Reply

Your email address will not be published. Required fields are marked *