22°C , Mostly cloudy | Kigali-Rwanda

Basketball: Harimo gutegurwa irushanwa ryo kwibuka

Yanditswe na NKOMEJE GUILLAUME

Ku ya 09-04-2018 saa 07:36:43

Nk’uko bisanzwe bikorwa buri mwaka, ishyirahamwe ry’umukino wa Basketball mu Rwanda “FERWABA”, ritegura irushanwa ryo kwibuka abakinnyi n’abakunzi b’umukino wa Basketball bazize Jenoside yakorewe Abatutsi  muri Mata  1994.

Ubusanzwe iri rushanwa ryatangiye ritegurwa n’ikipe ya Espoir BBC, igamije kwibuka Ntarugera Emmanuel bitaga ‘Gisembe’ ndetse irushanwa riza no guhabwa izina rya “Gisembe Memorial Tournament”.

Rutare Pierre (ufite ibikombe 2) wari Perezida w’Inkuba BBC akaba yarishwe muri Jenoside yakorewe Abatutsi mu 1994

Nyuma FERWABA yaje gufata iri rushanwa ngo rige rikinwa mu rwego rwo kwibuka abantu bose bafite aho bahuriye n’umukino wa Basketball bazize Jenoside.

Umunyamabanga mukuru wa FERWABA, Mutabazi Richard atangaza ko n’ubwo batari bamenya neza itariki irushanwa ryo kwibuka muri Basketball ry’uyu mwaka wa 2018 rizaberaho, ariko ko nk’uko bisanzwe rizaba mu byiciro 2.

Asobanura ko bategereje itariki bazahabwa na Komite y’igihugu Olimpike kubera ko ari yo igena amatariki azaberaho imikino yo kwibuka muri siporo zose.

Mutabazi avuga ko ubusanzwe irushanwa ryo kwibuka rihuza amakipe y’imbere mu gihugu “Genocide Memorial Tournament”, ikinwa mu gihe k’icyumweru kimwe, igikurikiyeho hakaba irihuza amakipe arimo n’ayo hanze y’igihugu “International Genocide Memorial Tournament”.

Mu mwaka ushize wa 2017, Espoir BBC ni yo yegukanye igikombe cy’irushanwa ryo kwibuka, “Genocide Memorial Tournament 2017” itsinze REG BBC amanota 61 kuri 58. Naho mu kiciro cy’abagore igikombe cyatwawe na APR BBC.

Ku rundi ruhande, ikipe ya REG BBC mu bagabo ni yo yegukanye igikombe k’irushanwa mpuzamahanga ryo kwibuka “International Genocide Memorial Tournament 2017”, itsinze Espoir BBC nayo yo mu Rwanda amanota 81 kuri 66.

Ni mu gihe mu bagore, APR BBC yagitwaye iki gikombe itsinze Berco Star y’i Burundi ku mukino wa nyuma amanota 72 kuri 58.

Abibukwa by’umwihariko muri Basketball

Mu bakinnyi bibukwa hari Ntarugera Emmanuel “Gisembe”, Rutagengwa Mayina Aimable, Rubingisa Emmanuel “Mbingisa”, Kabeho Auguste “Tutu”, Munyaneza Olivier “Toto”, Mutijima Theogene “Riyanga”, Murenzi JMV, Hitimana Nice, Mukotanyi Desire, Twagiramungu Felix “Rukokoma”, Mutarema Vedaste, Rutagengwa Jean Bosco, Kamanzi “Majoro”, Munyawera Raymond,  Gatera Yves (Espoir BBC), Florence “Kadubiri” ( MINITRAPE BBC), Esperance (Nyarugenge BBC na  MINITRAPE BBC), Gasengayire Emma (UNR), Mugabo Jean Baptiste (INKUBA BBC & OKAPI BBC), Rutabana (INKUBA BBC & OKAPI BBC), Cyigenza Emmanuel (INKUBA BBC & Terror BBC), Christian (INKUBA BBC), Nshimayezu Esdras (UNR BBC), Nzamwita Tharcisse (MINIJUST BBC) na Siboyintore (MINIJUST BBC).

Abayobozi:  Rugamba Gustave (Umubitsi wa Espoir BBC), Kabayiza Raymond (Visi Perezida wa Espoir BBC) na Rutare Pierre (Perezida w’ INKUBA BBC).

Abatoza: Nyirinkwaya Damien (Espoir BBC).

TANGA IGITEKEREZO

Leave a Reply

1 Comment on "Basketball: Harimo gutegurwa irushanwa ryo kwibuka"

avatar
Sort by:   newest | oldest | most voted
Amini Maniraguha
Guest

Murakoze bavandimwe gukora iki GIKORWA cyo kwibuka bagenzi bacu.Nubwo tudahari ngi twifatanye namwe hafi na hafi ariko tulikumwe muri byose