20°C , Partly sunny | Kigali-Rwanda

Basketball: Hamenyekanye uko amakipe azahura mu irushanwa ryo gusoza shampiyona

Yanditswe na BUGINGO FIDELE

Ku ya 13-10-2020 saa 22:55:50

Kuri uyu wa  Kabiri tariki 13 Ukwakira 2020 ni bwo  habaye tombora y’uko amakipe azahura mu irushanwa ryo gusoza shampiyona ya Basketball y’u Rwanda “ BK Basketball National League 2019-2020” rizaba tariki 18 kugeza 24 Ukwakira 2020 muri Kigali Arena.

Mu kiciro cy’abagabo iri rushanwa rizakinwa n’amakipe 8 yagabanyijwe mu matsinda 2 aho itsinda A riyobowe na REG BBC hakaza IPRC Musanze,  UGB na IPRC Kigali naho itsinda B rikabamo APR BBC, Espoir BBC, Patriots BBC na IPRC Huye.

Biteganyijwe ko aya makipe azakina imikino y’amajonjora  kuva tariki 18 kugeza 21 Ukwakira 2020 baruhuke umunsi umwe hanyuma amakipe abiri muri buri tsinda   tariki 23 Ukwakira 2020 akine imikino ya ½  maze umukino wa nyuma ube tariki 24 Ukwakira 2020.

Mu bagore kuko hazitabira amakipe 4  ari yo  IPRC Huye, The Hoops, Ubumwe  na  APR BBC azakina hagati yayo kuva tariki 18 kugeza 20 Ukwakira 2020. Muri ½  ikipe ya mbere izakina n’iya kane hanyuma iya  kabiri ikine n’iya gatatu,  izitwaye neza zikine umukino wa nyuma.

Visi Perezida wa kabiri w’ishyirahamwe ry’umukino wa Basketball mu Rwanda “FERWABA” akaba ashinzwe amarushanwa, Nyirishema Richard yatangaje ko bagiye gusubukura imikino ariko mu buryo budasanzwe  kubera icyorezo cya COVID-19. Yakomeje avuga ko biteguye neza  kugira ngo iri rushanwa rizagende neza  kandi bazabikora bakurikiza amabwiriza yo kwirinda COVID-19.

Umuyobozi ushinzwe kumenyekanisha ibikorwa muri BK, Nshuti Thierry  yatangaje ko kuba imikino  isubukuwe  ari ikigaragaza ko u Rwanda rurimo kugenda rutsinda icyorezo cya COVID-19. Yakomeje avuga ko BK  nk’umuterankunga mukuru wa shampiyona ya Basketball bishimira imikino igiye gusubukurwa kandi bizera ko bizagenda neza.

Biteganyijwe ko amakipe 12 yose ni ukuvuga 8 mu bagabo n’amakipe 4 mu bagore  tariki 16 na 17  Ukwakira 2020 bazapimwe COVID-19 bahite bajya mu mwiherero ahantu hamwe muri La Palisse Hotel i Nyamata ariko bazaba kugeza irushanwa rirangiye.

Gahunda y’irushanwa

Umwanditsi:

BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.