Basketball: Hamane yishimiye uko imikino y’Afurika yabereye mu Rwanda yagenze

Yanditswe na NKOMEJE GUILLAUME

Ku ya Aug 6, 2019

Tariki 28 Nyakanga kugeza 03 Kanama 2019 u Rwanda rwakiriye imikino y’igikombe cy’Afurika mu bakobwa batarengeje imyaka 16 muri Basketball “FIBA U-16 Women’s African Championship 2019” yabereye muri Sitade Nto i Remera.

Iyi mikino yabaga ku nshuro ya 6 ikitabirwa n’ibihugu 7, ikipe y’igihugu ya Mali yegukanye igikombe cy’uyu mwaka wa 2019 itsinze Misiri ku mukino wa nyuma amanota 84 kuri 48.

Hamane Niang uyobora ishyirahamwe mpuzamahanga ry’umukino wa Basketball mu rwego rw’Isi “FIBA” umwe mu bari abashyitsi bakuru bitabiriye iyi mikino y’Afurika y’abakobwa U-16 yatangaje ko yishimiye imitegurire n’imigendekere yaryo muri rusange.

Yagize ati: “Mbere na mbere ndashimira abayobozi b’u Rwanda bafashije ishyirahamwe ry’umukino wa Basketball mu Rwanda kwakira Afrobasket U-16 y’abakobwa 2019. Mu 2016 nabwo  twari hano muri Afrobasket U-18 mu bahungu.”

Yakomeje agira ati : Sinasoza ntashimiye FERWABA bakoze akazi keza, urwego rw’imitegurire y’iyi mikino y’Afurika ni rwiza ni nayo mpamvu buri gihe duhitamo kuza hano kubera ko twakiriwe neza twabonye imitegurire myiza n’abafana beza b’agatangaza, mwarakoze cyane ku bwa buri kimwe.”

Perezida wa FIBA yavuze ko yakozwe ku mutima n’ubwitabire ndetse anatungurwa n’imyitwarire y’abakunzi b’uyu mukino bagaragaje mu muhango wo gusoza iyi mikino y’Afurika.

Ati: Turashimira n’ibyishimo abaturage b’i Kigali, abaturage beza, bakunda kandi bazi Basketball nubwo ikipe y’igihugu yabo itageze muri ½ no ku mukino wa nyuma, abafana bari buzuye muri sitade.”

Yungamo ati: Mu muhango wo gusoza iri rushanwa nishimiye kubona abafana baragumye muri sitade kugeza hatangwa imidari n’ibihembo mu by’ukuri ni iby’agaciro gakomeye birakwiye ko tubashimira, ndasaba namwe itangazamakuru ngo mudushimire abakunzi b’umukino wa Basketball.”

Hamane yanashimiye Perezida w’u Rwanda, Paul Kagame ku bw’uruhare agira mu guteza imbere umukino wa Basketball. Ati : Ntibishoboka ko naba naje muri ibi birori ngo sinshimire Perezida Paul Kagame  ku byo yakoze ku rubyiruko rw’u Rwanda n’urubyiruko rw’Afurika binyuze ku iyubakwa rya Kigali Arena.”

Avuga ko iyubakwa rya Kigali Arena ryatumye Umujyi wa Kigali n’u Rwanda muri rusange bahabwa kuzakira imikino ya nyuma y’irushanwa ry’amakipe yitwaye neza ku mugabane w’Afurika “BAL Final Four” rizaba rigiye kuba ku nshuro ya mbere, rizatangira muri Werurwe 2020.

Asaba Abanyarwanda kugira uruhare mu gutuma Umujyi wa Kigali uba ukomeye muri Basketball ndetse anabakangurira kuzitabira iyi mikino ari benshi bakuzura Kigali Arena.

Ati: Dukore cyane kugira ngo Kigali izabe umujyi w’ikerekezo  cy’umukino wa Basketball, nta bwo ari ku busa ko imikino ya nyuma y’iri rushwana izabera i Kigali, bivuze ko abakunzi b’uyu mukino mu by’ukuri mufite umugisha wacu wose, n’ubufasha bwose rero ni ahanyu kugira ngo muzuzure iyi Sitade nziza kubera ko bizaba ari ibirori Nyafurika bya Basketball mu ishusho nshya, byahawe abanya Kigali n’Abanyarwanda.”

Hamane Niang uyobora FIBA-Monde ari kumwe na Anibal Manave uyobora FIBA-Afrique n’abandi bayobozi batandukanye baherekejwe na Mugwaneza Pascale, Visi Perezida wa mbere  wa FERWABA basuye Kigali Arena tariki 2 Kanama 2019.

Hamane Niang uyobora FIBA Monde utangaza ko yishimiye ko imikino y’igikombe cy’Afurika y’abakobwa U-16 yagenze neza