27°C , Mostly cloudy | Kigali-Rwanda
Aba ni bamwe mu bana bitabiriye ingando za Basketball

Basketball: Hagiye gutangizwa gahunda ya “Junior NBA Rwanda League” mu mashuri

Yanditswe na NKOMEJE GUILLAUME

Ku ya 01-03-2018 saa 08:23:31

Ishyirahamwe nyarwanda ry’umukino wa Basketball “FERWABA”, ku bufatanye na “NBA Africa”, bagiye gutangiza irushanwa ry’abatarengeje imyaka 15 mu bigo by’amashuri yisumbuye rizwi nka “Junior NBA Rwanda League”.

Aba ni bamwe mu bana bitabiriye ingando za Basketball

Iri rushanwa rya “ Junior NBA Rwanda League 2018”, rizatangizwa ku mugaragaro kuri uyu wa Gatandatu tariki 3 Werurwe 2018, aho rizakorwa mu bigo by’amashuri yisumbuye by’imbere mu gihugu bigera kuri 30 mu bahungu n’abakobwa.

Muri iri rushanwa rizajya riba hagati y’ibyumweru 12 na 14 buri mwaka w’amashuri, biteganyijwe ko buri kipe izaba igizwe n’abakinnyi bari hagati ya 15-20 muri buri kiciro.

Iryo rushanwa kandi rizaba ryubatse mu buryo bumwe nk’ubwo muri shampiyona ya Basketball yo muri Amerika ya “NBA”, aho amakipe agabanyije mu gice k’Iburasirazuba ndetse n’ik’Iburengerazuba. Aha muri buri gice nacyo kizaba kirimo ibyiciro 3, bisobanuye ibyiciro 6 muri rusange ndetse buri kiciro kizaba kigizwe n’amakipe 5.

FERWABA itangaza ko iri rushanwa ry’abakiri bato, rigamije kurushaho guteza imbere impano z’abakiri bato, ku buryo rizafasha mu kubaka ikipe y’igihugu y’abato mu byiciro byombi ndetse n’amakipe “Clubs” akomeye.

Mu byiciro by’abakiri bato bikunze guserukira igihugu mu ruhando mpuzamahanga mu mukino wa Basketball birimo, ikipe y’abatarengeje imyaka 16 n’abatarengeje imyaka 18 mu bahungu n’abakobwa.

Uretse iri rushanwa, hasanzwe habaho n’ayandi marushanwa y’abakiri bato atandukanye arimo nk’ingando akenshi zikunze gutegurirwa abana bari mu biruhuko.

Uko amakipe agabanyije mu matsinda bagendeye mu bice aherereyemo

Mu gice k’Iburengerazuba kigabanyijemo ibyiciro bitatu ari byo Iburasirazuba, hagati n’Amajyepfo. Mu Burasirazuba harimo amakipe 5 ariyo  G.S St Aloys, I.P Mukarange, G.S Kabare, G.S Gahini na Kagitumba H.S.

Hagati harimo amakipe nka LDK, G.S St Andre, Green Hills Academy, Kigali Christian school na P.S Rwesero ni mu gihe mu Magepfo kigizwe n’amakipe arimo Saint Joseph Kabgayi, P.S Virgo Fidelis, College Ste Marie Reine, Ste Marie Adelide na G.S Officiel Butare.

Ku rundi ruhande, mu gice k’Iburengerazuba kigabanyijemo ibyiciro bitatu aribyo, Amajyaruguru, Iburengerazuba bwa mbere (i) n’Iburengerazuba bwa kabiri (ii). Mu Burengerazuba harimo amakipe 5 ariyo Sunrise, G.S Janja, E.S Kirambo, Regina Pacis na ES Musanze.

Mu Burengerazuba (i) harimo amakipe nka ES Nyange, G.S Rambura, ES Murunda, G.S.St Joseph Birambo na P.S Nyundo naho mu Burengerazuba (ii) hakaba harimo amakipe nka G.S Gihundwe, G.S Nyamasheke, G.S St Bruno, G.S FAK Kibogora na E.S Gishoma.

TANGA IGITEKEREZO

Leave a Reply

Be the First to Comment!

avatar