22°C , Partly sunny | Kigali-Rwanda

Basketball: Gasana Kenny azakinira ikipe ya Patriots BBC mu mikino y’Afurika

Yanditswe na Bugingo Fidèle

Ku ya 10-10-2019 saa 12:29:24
Gasana Kenny uzakinira ikipe ya Patriots BBC mu mikino y'Afurika

Ikipe ya Patriots BBC igomba kwitabira imikino y’Afurika “NBA & FIBA Basketball Africa League 2019-2020”  aho igiye kwitabira imikino y’amajonjora izabera muri Tanzania kuva tariki 15 kugeza 20 Ukwakira 2019.

Iyi kipe tariki  30 Nzeri 2019 ni bwo yatangiye imyitozo yitegura imikino y’amajonjora izabera  muri Tanzania. Mu bakinnyi iyi kipe yari isanganwe yongeyemo  abandi bazayifasha muri iyi mikino.

Aba bakinnyi barimo Gasana Kenny usanzwe akinira ikipe y’igihugu y’u Rwanda akaba yakinaga muri Maroc. Hari kandi George Wilbert ukina muri Canada ndetse na Habineza Shaffy wakiniraga  ikipe ya Espoir BBC.

Visi Perezida wa Patriots BBC, Nzaramba Thierry atangaza ko  aba bakinnyi bombi Gasana Kenny na George Wilbert bagiye kubafasha muri iyi mikino gusa nyuma bakazareba niba Gasana Kenny bamugumana akaba  umukinnyi wabo igihe cyose kuko amasezerano ye muri Maroc yarangiye.

Nzaramba avuga ko ikipe igomba kwerekeza muri Tanzania tariki 13 Ukwakira 2019 hanyuma bukeye bwaho tariki 14 Ukwakira 2019 bagakora imyitozo nyuma  tariki 15 Ukwakira 2019 bagatangira irushanwa.

Mu mikino  y’amajonjora, ikipe ya Patriots BBC izaba ihagarariye u Rwanda iri mu itsinda D  hamwe na  Hawassa BBC (Ethiopia), City Oil BBC (Uganda, JKT BBC (Tanzania), Brave Hearts (Malawi) na Dynamo BBC (Burundi).

Iyi mikino izakinirwa mu byiciro bitandukanye aho hari amatsinda 6  ikipe 2 za mbere zikaba ari zo zizakomeza mu kiciro gikurikuraho.

Visi Perezida wa Patriots BBC, Nzaramba yavuze ko  intego nta yindi ari ukwitwara neza muri iyi mikino y’amajonjora kugira ngo bibahe ikizere cyo kuzitwara neza mu mikino ikurikiraho.

Kapiteni w’iyi kipe, Mugabe Aristide nawe avuga ko bamaze iminsi bitegura iyi mikino kandi abakinnyi bose muri rusange bameze neza igisigaye ari ukugenda bakitwara neza.

Umwanditsi:

Bugingo Fidèle

Tanga Igitekerezo

Email yanyu ntigaragazwa ku rubuga. Amazina na Email ni ngombwa.