Bahufite John utoza abana bari mu ngando zibera ku kibuga cya Club Rafiki kiri i Nyamirambo

Basketball: Bahufite atangaza ko ingando zateguriwe abana zibagirira akamaro

Yanditswe na admin

Ku ya 28-12-2017 saa 07:05:26

Bahufite John ni umwe mu barimo gutoza mu ngando z’abana bari mu biruhuko bateguriwe aho bigishwa gukina umukino wa Basketball by’umwihariko akaba akorana n’abakorera ku kibuga cya Club Rafiki kiri i Nyamirambo.

Mu kiganiro Imvaho Nshya yagiranye n’umutoza Bahufite John yatangaje ko izi ngando zirimo gukorwa mu bice bitandukanye by’igihugu zifite akamaro kanini ku bana bazitabiriye kuko ariho bigira byimbitse ubumenyi bw’ibanze muri uyu mukino wa Basketball kandi bugezweho.

Yagize ati Zibafitiye akamaro cyane, kuko ni wo mwanya mwiza wo kwigiramo ubumenyi bw’ibanze mu mukino wa Basketball, usanga utabwigira mu ikipe nkuru kuko tugira abakinnyi bakuru, ubona bakina ibintu bimeze nka gakondo”.

Bahufite watoje amakipe akomeye muri Basketball y’u Rwanda nka Espoir BBC na REG BBC akazihesha n’ibikombe bitandukanye birimo shampiyona, ahamya kandi ko muri izo ngando abana babona umwanya uhagije wo kwisanzura, kuko usanga baba bari mu kigero kimwe.

Avuga ko abo bana bitabira izi ngando ku rwego rushimishije kandi bagaragaza ko bakunze gukina uyu mukino wa Basketball. Ati Ubwitabire burashimishije cyane, kuko dufite abana bagera kuri magana abiri. Abakobwa bato n’abakuru, bakina bayikunze, kuko icya mbere ntibasiba cyangwa ngo bakererwe, kandi bakora bafite ishyaka ryinshi cyane”.

Uyu mutoza wahesheje REG BBC igikombe cya shampiyona y’uyu mwaka wa 2017, atangaza ko muri izo ngando bibanda cyane ku bintu bya tekinike gusa ntibabura kubwira abo bana ibyiza bya siporo, imyitwarire myiza mu kibuga no mu bundi buzima.

Bahufite John utoreza kuri Club Rafiki, akaba akorana umunsi ku munsi n’abana b’abakobwa n’abahungu bafite imyaka 14  na  18. Abo bana bafite imyaka 14 barimo abakobwa bato 31, abahungu 86. Ni mu gihe abakuru bafite imyaka 18 bagizwe n’abakobwa 16 n’abahungu 65. Abo bana bose hamwe bakaba bagera ku 198.

Izi ngando zateguwe n’ishyirahamwe  Nyarwanda ry’umukino wa Basketball  “FERWABA” kuva tariki 12 Ukuboza 2017 kugeza tariki 14 Mutarama 2018, zirimo kubera mu bice 9 birimo abakorera ku Kicukiro muri IPRC-Kigali, i Kibagabaga, ni muri Kigali Christian School. Hari  kandi  abakorera ku Kimihurura muri IFAK, i Rubavu kuri Stella, i Musanze kuri APICUR, i Huye muri IPRC-South ndetse n’i Muhanga bakorera muri Ecole Saint André.

NKOMEJE GUILLAUME

TANGA IGITEKEREZO

Leave a Reply

Be the First to Comment!

avatar