Basketball: APR BBC  yajyanye  intego yo kwitwara neza mikino y’akarere ka 5

Yanditswe na  BUGINGO FIDELE

Ku ya 19-10-2019 saa 22:56:20
APR BBC yegukanye igikombe cya shampiyona ya 2018-2019 igiye guserukira u Rwanda mu mikino y'akarere ka 5

Ikipe APR BBC mu kiciro cy’abagore  nyuma yo kwegukana igikombe cya shampiyona  ya 2018-2019    yerekeje muri i Dar es Salaam muri Tanzania aho yitabiriye imikino  mpuzamahanga y’Akarere ka 5  izatangira ejo  tariki 21 isozwe 26 Ukwakira 2019.

Mbere yo kwerekeza muri Tanzania, umutoza mukuru w’iyi kipe, Mbazumutima Charles   yatangaje ko imyiteguro yagenze neza kuko nyuma yo  gusoza shampiyona ya 2018-2019 batigeze bahagarara ko bakomeje imyitozo.

Uyu mutoza yakomeje avuga ko  abakinnyi bameze neza uretse Kantore Sandra wagize ikibazo mu ivi ariko bakaba bizera ko azafasha mu mikino bazakina n’ubwo ashobora kudakina umukino wa mbere.

Muri iyi mikino iyo ikipe igiye kwitabira iba yemerewe kongeramo abakinnyi bavuye mu yandi makipe. Umutoza Mbazumutima Charles yavuze ko azifashisha abakinnyi 4. Abo ni Rwibutso Nicole wo muri Kaminuza y’u Rwanda, Nzaramba Cecile (IPRC-Huye), Imanizabayo Laurence na Micomyiza Rosine (The Hoops Rwanda).

Umutoza yagaragaje ko imyaka ishize ikipe ye yagiye ihura n’amakipe yo muri Kenya na Uganda afite ubunararibonye muri aka karere ka 5 , yavuze ko uyu mwaka afite icyizere ko ashobora kwegukana igikombe akurikije uko yateguye abakinnyi ikindi ni uko  bongereye imbaraga .

Ikipe ya APR BBC  umwaka ushize wa 2018 nabwo yari yitabiriye imikino y’akarere ka 5  yasoreje ku mwanya wa 4.

Abakinnyi  APR BBC izifashisha mu mikino ya Zone 5

Aba bakinnyi ni Umugwaneza Charlotte, Umuhoza Jordan, Uwizeye Assouma, Urwibutso Nicole, Tuyisenge Emerance, Nzaramba Cecile, Imanizabayo Marie Laurence, Micomyiza Rosine, Akimana Ange, Mugisha Uwera Benigne na Kantore Sandra.

Umutoza mukuru ni  Mbazumutima Charles, umutoza wungirije akaba  Nkurikiyinka Deo.

Umwanditsi:

 BUGINGO FIDELE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.