21°C , Partly cloudy | Kigali-Rwanda
Minisitiri w'Imari n'Igenamigambi w'u Rwanda Dr Ndagijimana Uziel (iburyo) asinyana amasezerano y'inkunga n'Umuyobozi wa Banki y'Isi mu Rwanda Yaser El Gammal (Foto James)

Banki y’Isi yateye inkunga u Rwanda izifashishwa mu gucunga umutungo wa Leta

Yanditswe na Sezibera Anselme

Ku ya 05-11-2018 saa 16:18:07

Miliyoni 20 z’Amadolari ni yo nkunga Banki y’Isi yahaye u Rwanda kuri uyuwa 5 Ugushyingo 2018, igenewe kunoza imicungire y’umutungo n’imari bya Leta.

Minisitiri w’Imari n’Igenamigambi Dr Ndagijimana Uziel ahererekanya amasezerano y’inkunga n’umuyobozi wa banki y’isi Yaser El Gammal(Foto James)

Minisitiri w’Imari n’Igenamigambi, Dr Ndagijimana Uziel, avuga ko iyo nkunga izita cyane cyane mu kubaka ubushobozi bw’abakozi ba Leta bafite aho bahuriye n’imicungire y’umutungo.

Dr Ndagijimana avuga ko hazibandwa ku kubaka uburyo bukoreshwa mu icungamutungo no kurigeza mu nzego zose no guhugura abashinzwe icungamutungo mu buryo bw’ubunyamwuga.

Ati: “Igice kinini hafi 1/2 cy’iyo nkunga kizifashishwa mu kubaka ubushobozi bw’abakozi bakora imicungire n’umutungo by’imari bya Leta”.

Nyuma yo kwakira inkunga u Rwanda rwahawe na Banki y’isi, Abanyamakuru bahawe umwanya w’ibibazo (Foto James)

Buri mwaka Umugenzuzi Mukuru w’imari ya Leta asohora raporo ku micungire y’umutungo wa rubanda, akagaragaza ibyuho mu nzego zitandukanye.

Dr Ndagijimana avuga ko nubwo hari aho umutungo wa Leta ucungwa nabi ariko bitabuza no kwishimira intambwe imaze guterwa mu kunoza imicungire n’imari bya Leta.

Avuga ko uko imyaka yagiye itambuka ari ko urwo rwego rw’umugenzuzi mukuru w’imari ya Leta rwagiye rugaragaza ko inzego zacunze neza umutungo n’imari bya Leta zagiye ziyongera.

Dr Ndagijimana asobanura ko kimwe mu byifashishwa muri iyo micungire y’umutungo wa Leta harimo kubaka inzego.

Agira ati: “Hari ukubaka ubushobozi ku buryo bubiri, hari ugushyiraho ikoranabuhanga ryifashishwa mu gucunga umutungo wa Leta ari na rumwe mu rwego ruzafashwa n’iyo nkunga, ubu twari tumaze kugeza ikoranabuhanga mu icungamari ry’umutungo wa Leta ku rwego rw’igihugu kumanuka kugera mu turere n’inzego ziri munsi yatwo.

Ikindi n’uko ikoranabuhanga atari ryo rikora amakosa ahubwo akorwa n’abantu. Mu kubaka ubwo bushobozi harimo no guhugura abakora umwuga w’icungamari, abafite aho bahuriye n’inzego zitandukanye z’imicungire y’uwo mutungo nk’abatanga amasoko, abacunga ingengo y’imari”.

Mu rwego rwo gukosora ayo makosa Dr Ndajimana avuga ko hariho gukurikirana abacunze uwo mutungo nabi ndetse no kuwugaruza, kandi hagenda hanozwa amategeko ajyanye n’imicungire yawo.

Umuyobozi wa Banki y’isi mu Rwanda Yaser El Gammal yashimangiye ko iyo nkunga izunganira muri gahunda zo kongera ubushobozi bw’abakozi ba Leta mu gucunga umutungo wa rubanda.

Minisitiri w’Imari n’Igenamigambi w’u Rwanda Dr Ndagijimana Uziel (iburyo) asinyana amasezerano y’inkunga n’Umuyobozi wa Banki y’Isi mu Rwanda Yaser El Gammal (Foto James)

 

Mu bigo bya Leta bizagerwaho n’iyo nkunga byumwihariko harimo MINECOFIN, RPPA ICPAR n’ibindi.

Umuyobozi wa banki y’isi Yaser El Gammal

 

TANGA IGITEKEREZO

Leave a Reply

Your email address will not be published. Required fields are marked *