21°C , Partly cloudy | Kigali-Rwanda

Bamwe mu bafite ubumuga biteje imbere  baranenga bagenzi babo bagisabiriza

Yanditswe na Rutayisire Emile

Ku ya 23-01-2020 saa 14:47:06
Guha umuntu usabiriza ku muhanda bikwiye gucika kuko bituma atahava

Bamwe mu bafite ubumuga baranenga bamwe muri bagenzi babo bagifite umuco wo gusabiriza mu gihe Leta y’u Rwanda iharanira iterambere ry’Abanyarwanda bose nta n’umwe usigaye inyuma.

Nyankiko Pierre utuye mu Mujyi wa Kigali afite ubumuga bwo kutabona, avuga ko iterambere amaze kugeraho arikesha Leta y’u Rwanda iharanira iterambere ry’Abanyarwanda bose, akanenga abasabiriza bitwaza ko bafite ubumuga.

Agira ati: « Nta bwo niyumvisha kuba hari abantu bitwaza ko bafite ubumuga kandi hari icyo bashobora gukora ugasanga barwanira kujya mu kiciro cya mbere cy’ubudehe, kugira ngo bage bafashwa, bakabera umuzigo Leta wo kubafasha harimo kubarihira mituweri n’ibindi ».

Akomeza avuga ko uwo muco wo gusabiriza awunenga cyane kubera ko ari ugusebya Leta y’u Rwanda ikora ibishoboka byose kugira ngo abantu bose bagire imibereho myiza nta we isize, ishyiraho gahunda zibateza imbere ndetse igashyiraho n’umwihariko ku byiciro bifite ibibazo byihariye nk’abafite ubumuga n’abandi.

Nyankiko yatangaje ko atabarizwa mu kiciro cya mbere cy’ubudehe ndetse atifuza kukijyamo, ariko hakaba hari benshi batabona ndetse n’abandi bafite ubumuga bunyuranye, baba barwanira kujya mu kiciro cya mbere.

Uyu mugabo wavutse mu 1977 akavukira  mu Karere ka Gisagara, i Kansi, afite umugore n’abana 4. Yaje i Kigali amaze kubura ababyeyi be bombi mu 1995, aza asabiriza ariko akumva bitamushimishije.

Avuga ko amaze kubona ibihumbi 5 yatangiye gucuruza ikarito areka gusabiriza. Yaje kubona umugiraneza amufasha kwiga umwaka wa nyuma w’amashuri abanza, agira umuhate ndetse atsindira no kujya mu mashuri yisumbuye ariko mu biruhuko agacuruza ikarito aza kurangiza mu 2003. Kuva yatangira gucuruza ikarito yirinze kongera gusabiriza.

Kubera kwizera Leta kandi akurikira imigambi Leta ifitiye Abanyarwanda bose, mu 1998 yegereye ubuyobozi maze MINALOC (Minisiteri y’Ubutegetsi bw’Igihugu) imutuza Kimironko. Inyota yo kwiteza imbere yamubagamo ku buryo mu 2004 yagiye  kwiga ubugororangingo (Phyisiotherapy) arangije ashinga ivuriro i Kigali ahitwa Kabeza. Ntiyabonye abakiriya kuko abantu batumvaga ko ashobora kubavura  kubera imyumvire bari bafite arabihagarika.

Mu 2007 yaje gushaka akazi mu kigo Centre Cesar kiri Kimironko, akora ibyo yize byo kugorora ingingo.

Mu 2013 ni bwo yafashe ikemezo cyo kwikorera aba rwiyemezamirimo, ashinga Sosiyete PNYA Ldt ifasha urubyiruko rufite ubumuga n’abatabufite bagatwara abantu n’ibintu ku magare ku buryo amaze guha akazi abagera kuri 300.

Umwe mu bakora muri PNYA Ltd, Karisa Andrew avuga ko amaze gutera imbere abikesha Nyankiko. Agira ati: «Nabayeho nta kazi ngira ahubwo naratangiye kunywa ibiyobyabwenge. Naje kumenya ko Nyankiko afasha urubyiruko akaruguriza amafaranga rukagura amagare bakayakoresha bafitanye amasezerano ku buryo igare rigirira akamaro sosiyete PNYA ndetse rikakagirira n’urikoresha. Twagiranye amasezerano kandi bimaze kunteza imbere. Sosiyete ifite abashinzwe umutekano ku buryo imyitwarire y’abanyonzi icungirwa hafi kandi tuzwi n’ubuyobozi”.

Nyankiko amaze kugera ku bikorwa binyuranye kuko afite n’amazu akodesha mu Murenge wa Kimironko. Asaba abafite ubumuga kwirinda gukomeza kumva ko bagomba gufashwa ahubwo bakiyakira bagakora kuko mu Isi ari amarushanwa.

Ati: « Leta y’u Rwanda yaduhaye amahirwe menshi yo gukora mwiyapfusha ubusa”. Yaboneyeho kwibutsa abagifite imyumvire mike ku bamugaye kureka kubaheza mu kazi kuko nabo bashoboye.

Imvaho Nshya kandi yaganiriye na Muheto Pie ukora akazi ko kudoda inkweto mu Murenge wa Kimisagara mu Karere ka Nyarugenge. Avuga ko atari byiza gutega amaboko kandi ushobora gukora.

Agira ati: “Nagize ikibazo ndwara imbasa ku buryo ngendera mu kagare. Nakuze mbona abafite ubumuga harimo abasabiriza, nkareba ukuntu hari ababasuzugura cyangwa agatega akaboko ntibamuhe bikambabaza. N’ubwo ntabashije kwiga amashuri menshi namenye gusoma no kwandika negera umugabo w’inshuti ya Papa wadodaga inkweto musaba ko anyigisha, arabinyigisha ntangira gukora mufasha nyuma nza kuza kwishakira aho nkorera”.

Akomeza avuga ko kudoda inkweto bimutunze kuko yabashije gushaka umugore akaba afite abana babiri bose biga mu mashuri abanza. Yemeza ko buri muntu ufite amaboko yashaka icyo akora kandi akabaho. Yongeraho ko abafite ubumuga bo mu Rwanda bafite amahirwe menshi kubera ko Leta ibitaho kandi ikabagenera imfashanyo igamije kubateza imbere inyura mu Turere.

Mukamurigo Esperance atuye mu Mujyi wa Kigali, mu Karere ka Gasabo, agendera mu mbago akaba adoda imyenda. Yabashije kwiga amashuri yisumbuye ariko ntiyagira amahirwe yo gukomeza kaminuza. Yashatse akazi arakabura maze yiyemeza kwiga imyuga yiga kudoda.

Agira ati: “Birambabaza iyo mbonye umuntu ufite ubumuga ndetse n’abatabufite kandi bafite amaboko bagasabiriza, badafite ibibazo byo mu mutwe. Leta yaduhaye amahirwe menshi yo kubaho neza kuko duterwa inkunga mu kwiga imyuga kandi uyize akenshi ahabwa n’uburyo bwo gukora ujyanye n’ibikoresho byifashishwa mu mwuga wize, si twe gusa ni gahunda ku bantu bose”.

Akomeza asaba urubyiruko n’abafite ubumuga kumva ko nabo bashoboye kandi ko aho guhabwa ahubwo washaka uko wiha ukora akazi byaba ngombwa ukaba waha n’abandi.

Uku kugaya umuco wo gusabiriza kugarukwaho na Niyomugabo Romalis, Perezida w’Inama y’’Igihugu y’Abantu bafite ubumuga. Avuga ko gusabiriza ari ugusebya Leta kuko itanga uburyo bwo kwiteza imbere ndetse kubera ibyiciro bashyizemo abafite ubumuga bigahuzwa n’ibyiciro by’ubudehe, bamwe batangiye guhabwa amafaranga y’ingoboka.

Agira ati: “Leta y’u Rwanda nta cyo itadukoreye, gukomeza gusabiriza ni ugusebya Lata y’u Rwanda kuko hari Poritiki ifite imirongo migari yadushyiriweho igamije kuduteza imbere by’umwihariko”.

Akomeza agaya abantu bafite ubumuga bagifite ingeso yo gusabiriza, avuga ko abasabiriza benshi usanga bafite imyumvire mibi kandi ko gukomeza gusabiriza babiterwa n’ababaha amafaranga. Asanga gufasha umuntu neza atari ukumuha ifi ngo ayirye ahubwo ari ukumwigisha uko bayiroba. Yemeza ko gukomeza guha amafaranga abasabiriza atari ukubagirira neza, ahubwo ko ari ukubica mu mutwe, ko bagombye kwitabira gahunda yo kubafasha Leta yabashyiriyeho.

Niyomugabo agaruka ku isura mbi gusabiriza biha Igihugu, ku buryo umunyamahanga ubabonye agira ngo Leta ntacyo ibamariye kandi ntacyo itakoze ngo bagire ubuzima bwiza. Avuga ko guha umuntu usabiriza ku muhanda ari ugushyigikira ingeso mbi.

Umwanditsi:

Rutayisire Emile

Tanga Igitekerezo

Email yanyu ntigaragazwa ku rubuga. Amazina na Email ni ngombwa.