22°C , Partly sunny | Kigali-Rwanda

Babangamiwe no kuba imirenge SACCO itarakoresha ikoranabuhanga

Yanditswe na Kayitare Jean Paul

Ku ya 20-09-2019 saa 06:32:48
Guverineri wa Banki Nkuru y'u Rwanda, John Rwangombwa, amurika uko ubukungu bw'igihu gu buhagaze n'uko buzaba bwifashe mu 2019 (Foto James R)

Abanyarwanda by’umwihariko abatuye mu Mujyi wa Kigali baragaragaza ko bakibangamiwe n’imikorere y’ibigo byo kuzigama no kugurizanya, bitarabasha gukoresha ikoranabuhanga kugira ngo aho bageze hose bashobore kubitsa no kubikuza amafaranga yabo mu mirenge SACCO.

Niyonkuru Aimable umwe mu bakorana na SACCO yo mu Karere ka Kicukiro mu Mujyi wa Kigali yagize ati “SACCO imbogamizi zikirimo kandi zitarimo kutworohera, ni uburyo bwo gukorana n’izindi banki. Uragenda waba wimutse uvuye mu ntara ya mafaranga yawe bisaba ko uyasanga aho wari wayabikije, aho niho harimo imbogamizi mu rwego rw’ikoranabuhanga”.

Yongeraho ko ngo ubusanzwe ukeneye guhabwa imwe muri serivisi zitangwa na SACCO, agenda yitwaje agatabo hanyuma agashakirwa ifishi noneho ngo agahabwa serivisi yifuza, ibyo ubwabyo ngo bikaba bikiri imbogamizi.

Mukundente Aline umunyamuryango wa SACCO mu Murenge wa Kinyinya mu Karere ka Gasabo, na we ahamya ko kuba Umurenge SACCO utarashobora gukoresha ikoranabuhanga ku buryo aho umuntu ageze hose ajya gushaka serivisi, bikimubera imbogamizi.

Ati “Kuba ntashobora kuva i Kinyinya ngo nge ku murenge SACCO Gisozi nsabe serivisi ni ikibazo cyagombye gukemuka bityo aho umuntu ageze agashobora kubona serivisi. Kudakoresha ikoranabuhanga kw’imirenge SACCO biracyatubereye imbogamizi rwose”.

Umurerwa Triphose, Umuyobozi wa Vision SACCO Gahanga, avuga ko ikoranabuhanga ryaba igisubizo kuko ngo abaturage badashobora kubikuza amafaranga yabo aho bari hose.

Yagize ati “Bizatworohereza akazi kuko kugira ngo wakire abantu 500 ku munsi kandi bose ubandike mu gitabo, wongere usubire inyuma uge kubibara, biba bigoye ariko ikoranabuhanga rije byose byahita byikora”.

Akomeza avuga ko hari igihe umunyamuryango wa SACCO ajya i Gahanga kandi yagombye kujya nka Kicukiro, i Muhanga cyangwa i Rwamagana, akagenda aho ari hose ari umunyamuryango bityo aho agiye hose agahabwa serivisi zabo.

Guverineri wa Banki Nkuru y’u Rwanda, Rwangombwa John, mu kiganiro n’itangazamakuru, aherutse gusobanura aho umushinga wo guhuza za SACCO hakoreshejwe ikoranabuhanga, ugeze.

Ati “Hari ingamba za Leta zo gushyira ikoranabuhanga mu mikorere ya za SACCO ndetse no kuyihuza ku rwego rw’akarere. Ikibazo gihari ni icy’abantu bari bahawe isoko bityo bamara imyaka ibiri irenga birabananira. Ubu tugiye gutangira bundi bushyashya turebe imari n’igenamigambi ku bufatanye n’ikigo cya RISA. SACCO zose hagati mu mwaka utaha zizaba zatangiye gukoresha ikoranabuhanga”.

Mu rwego rwo kwegereza abaturage serivise z’imari binyuze mu ikoreshwa ry’ikoranabuhanga, Rwangombwa avuga ko mu mpera z’uyu mwaka Imirenge Sacco ya mbere izakorerwamo ikoranabuhanga mu rwego rw’igerageza, ku buryo mu mwaka utaha wa 2020 Imirenge Sacco yose mu gihugu izaba ikoresha ikoranabuhanga.

Umurenge SACCO watangijwe mu 2009 mu rwego rwo guteza imbere ishoramari ridaheza. Mbere y’uwo mwaka abanyarwanda bakoranaga n’ibigo by’imari bari 21% mu gihe kugeza ubu abakorana n’ibigo by’imari barera 90%.

Imirenge SACCO ifite ubwizigame bungana na miriyari 69 n’abanyamuryango barenga miriyoni 3, naho imirenge SACCO iri mu mirenge 416. Banki Nkuru y’u Rwanda ivuga ko mu ntera y’ibirometero 5 umunyarwanda ashobora kubona serivisi z’imari.

Umwanditsi:

Kayitare Jean Paul

Tanga Igitekerezo

Email yanyu ntigaragazwa ku rubuga. Amazina na Email ni ngombwa.