21°C , Intermittent clouds | Kigali-Rwanda
Ubwo uwari Perezida wa FERWAFA Nzamwita (uwa kabiri ibumoso) n'umuyobozi wa Azam TV, Rhys Torrington (uwa kabiri iburyo) basinyaga amasezerano y'imyaka 5

AZAM yahagaritse amasezerano yari ifitanye na FERWAFA

Yanditswe na Bugingo Fidèle

Ku ya 15-08-2019 saa 16:01:17

Muri Kanama 2015 ni bwo ishyirahamwe ry’umupira w’amaguru mu Rwanda “FERWAFA” na  Azam  TV  bashyize  umukono ku masezerano  y’ubufatanye aho Azam  yagombaga gutera  inkunga shampiyona y’u Rwanda y’umupira w’amaguru mu gihe k’imyaka 5.

Mu gihe aya masezerano yari asigaje umwaka umwe dore ko yagomba kurangirana n’umwaka w’imikino wa 2019-2020, FERWAFA yaciye amarenga ko  igiye gutandukana n’uyu muterankunga.

Mu ibaruwa  yandikiwe abanyamuryango bose ba FERWAFA tariki 14 Kanama 2019 igashyirwaho umukono n’Umunyamabanga mukuru, Uwayezu François Regis haragaragaramo ko  tariki 05 Kanama 2019 bakiriye ibaruwa y’umuterankunga wa shampiyona “Azam Media Ltd” ibamenyesha ko batazakomeza gukorana kuva tariki 21 Kanama 2019 mu gihe amasezezerano  yagombaga kurangira muri  Kanama 2020.

Muri iyi baruwa kandi FERWAFA yamenyesheje abanyamuryango bayo ko Azam TV itazongera kwerekana imikino ya shampiyona ndetse ko bagomba kwitegura   izo mpinduka kandi ko mu mwaka w’imikino wa 2019-2020 inkunga bagenerwaga n’umuterankunga itazaboneka.

Gusa basoza bavuga ko bari mu bakomeje ibiganiro na Azam  ku buryo bishobotse   amasezerano yavugururwa.

Mu masezerano Azam TV yari yasinye na FERWAFA  yagombaga kurangira muri 2020, Azam yari yatanze amafaranga angana na miriyoni 2 n’ibihumbi 350 z’amadorari y’Amerika akaba asaga hafi miriyari imwe  na miriyoni 600 mu mafaranga y’u Rwanda.

Mu mwaka wa mbere ni ukuvuga shampiyona ya 2015-2016 , Azam  yagomba gutanga ibihumbi 350 by’amadorari asaga miriyoni 250 y’u Rwanda  naho indi myaka 4 (2016-2017, 2017-2018,2018-2019 na 2019-2020) Azam ikajya itanga ibihumbi 500 by’amadorari  akaba asaga miriyoni 360 z’amafaranga  y’u Rwanda.

Muri aya mafaranga hakaba harimo ayagenerwaga amakipe  nk’inkunga igera kuri miriyoni 10. Azam kandi ni yo yatangaga amafaranga miriyoni 25 yahabwaga ikipe yatwaye igikombe cya shampiyona ndetse na miriyoni 10 ku ikipe yatwaye igikombe cy’Amahoro.

Ubwo uwari Perezida wa FERWAFA Nzamwita (uwa kabiri ibumoso) n’umuyobozi wa Azam TV, Rhys Torrington (uwa kabiri iburyo) basinyaga amasezerano y’imyaka 5

TANGA IGITEKEREZO

Leave a Reply

Your email address will not be published. Required fields are marked *