19°C , Intermittent clouds | Kigali-Rwanda

Australia: ‘Visit Rwanda’ yahawe igihembo kiruta ibindi mu bukerarugendo

Yanditswe na Sezibera Anselme

Ku ya 07-10-2019 saa 16:55:02
Australia: ‘Visit Rwanda’ yahawe igihembo kiruta ibindi mu bukerarugendo

Gahunda ya ‘Visit Rwanda’ yahawe igihembo kiruta ibindi mu kiciro   cy’ahantu habereye gusurwa, uwo muhango wo gutanga ibihembo by’ahabereye gukorerwa ubukerarugendo wabereye i Sydney muri Australia.

Umuhango wo gutanga ibyo bihembo bizwi ku izina rya “Luxperience Awards” byo muri uyu mwaka wa 2019, byahuje abahanga mu guhanga udushya tujyanye no guteza imbere ibikorwa bijyanye n’ubukerarugendo.

Ibyo birori ubusanzwe bifatwa nk’isoko ry’imyidagaduro  ishingiye ku gutembera (ku bukerarugendo) muri Australia na Asia  yo mu burengerazuba bw’inyanja ya Pacific.

Muri ibyo birori, Visit Rwanda yahawe iki gihembo cy’ahabereye gukorerwa ubukerarugendo mu muhango wo gutangiza ibirori uyu munsi.

Mu ijambo rye nyuma yo kwakira icyo gihembo, Umuyobozi ushinzwe ubukerarugendo mu Rwego rw’Igihugu rw’Iterambere (RDB) Belise Kariza, yavuze ko bishimiye icyo gihembo bahawe kuko kizatuma ba mukerarugendo biyongera.

Ati: “RDB yishimiye iki gihembo cyahawe Visit Rwanda. Kuba ubukerarugendo bw’u Rwanda bwarashoboye guhatana muri aya marushanwa y’ubukerarugendo ategurwa n’igihugu cya Australiya, ni intambwe nziza izatuma ba mukerarugendo barushaho kwiyongera mu Rwanda. Ubu Australiya ni igihugu cyohereza ba mukerarugendo benshi mu Rwanda kandi bakahamara igihe.

Mu byerekeye kuza gusura ingagi zo mu birunga, Abanya-Australia baza ku mwanya wa gatatu mu kuzisura nyuma ya Leta Zunze Ubumwe z’Amerika n’u Bwongereza.”

Kariza atangaza ko ari ubugira kabiri muri ayo marushanwa u Rwanda rwigaragaza nk’Igihugu gitatse ibyiza ndetse kigaragaza amahirwe menshi na serivisi nziza mu bijyanye n’ubukerarugendo.

Mu bitabiriye ayo marushanwa harimo abahagarariye abakora ibijyanye n’ubukerarugendo mu Rwanda harimo abakora ubwikorezi bw’abantu n’ibintu, abanyamahoteli, n’abandi bashamikiye ku Rwego rw’Igihugu rw’Iterambere, aho basuwe n’abantu bagera ku bihumbi birindwi.

Abasuye ahamurikirwa ibikorwa bya RDB beretswe ibyiza bitatse u Rwanda, uburyo bugezweho bwo gusura ingagi zo mu birunga, gutembera mu bidukikije no kureba amoko atandukanye y’ibiguruka, kwakirwa neza ndetse banerekwa ko u Rwanda ari ahantu heza ho gukorera inama mpuzamahanga.

Umuyobozi w’ubukerarugendo muri RDB yakira ibihembo byagenewe Visit Rwanda i Sydney muri Australia

Umwanditsi:

Sezibera Anselme

Tanga Igitekerezo

Email yanyu ntigaragazwa ku rubuga. Amazina na Email ni ngombwa.