22°C , Partly sunny | Kigali-Rwanda

Australia: Urukingo rwa COVID-19 rwatangiye kugeragerezwa ku nyamaswa

Yanditswe na Imvaho Nshya

Ku ya 02-04-2020 saa 14:53:51
Inkingo ebyiri zishobora kuvamo urukingira Koronavirusi zatangiye kugeragerezwa muri Australia

Kuri uyu wa Kane tariki 02 Mata 2020, Abahanga mu bya Siyansi bo muri Australia batangiye kugeragereza inkingo rbyiri za Koronavirus ku nyaaswa zishobora kugira akamaro mu minsi iri imbere.

Nk’uko byatangajwe na BBC, izo nkingo zakozwe na Kaminuza ya Oxford yo mu Bwongereza na “Kompanyi Inovio Pharmaceuticals” yo muri Leta Zunze Ubumwe z’Amerika, Ishami ry’Umuryango w’Abibumbye ryita ku Buzima (OMS/WHO) ritanga uruhushya rwo kugeragerezwa ku nyamaswa.

Ikigo cya Australia cyita ku bumenyi bwa siyansi kizagenzura niba izo nkingo zikora, ndetse niba nta ngaruka zagira ku bantu.

Igerageza rya mbere ry’urukingo ku bantu ryabereye muri Amerika mu kwezi gushize kwa gatatu, ariko risimbuka icyiciro cyo kubanza kugeragerezwa ku nyamaswa.

Bivugwa ko hari izindi nkingo nyinshi zirimo gukorwa mu bice bitandukanye by’Isi muri iki gihe, mu rwego rwo gukomeza guhangana n’umuvuduko udasanzwe wa COVID-19

Ariko izo nkingo ziri kugeragezwa n’ikigo cya Australia cya siyansi n’ubushakashatsi bugari gishamikiye ku muryango wa Commonwealth (CSIRO) zirihariye, nkuko kibivuga.

Itangazo ry’Ikigo cy’Umuryango w’Ibihugu bikoresha ururimi rw’Icyongereza rikora ubushakashatsi mu bya Siyansi n’Inganda muri icyo gihugu (Commonwealth Scientific and Industrial Research Organization (CSIRO) riragira riti: “Twatangiye igerageza ry’ibanze ku bishobora kuzavamo inkingo. Biteganyijwe ko igeragezwa rizafata amezi atatu.”

Iri tangazo rinashimangira ko izo nkingo zirinzwe cyane mu kigo giherereye i Geelong, Victoria.

Ikigo CSIRO cyatangaje ko cyatangiye kwiga kuri Koronavirusi muri Mutarama 2020, ariko gitangira gahunda y’urukingo muri muri Gashyantare.

Kugeza ubu muri Australia hamaze kwandura abarwayi 5,137 mu gihe muri Afurika yose abanduye bageze ku 6,473; ku Isi yose hamaze kuboneka abarwayi 955,301, muri bo 203,011 bamaze gukira na ho abahitanywe n’iki cyorezo bakaba bageze ku 48,578.

Umwanditsi:

Imvaho Nshya

2 Comments on “Australia: Urukingo rwa COVID-19 rwatangiye kugeragerezwa ku nyamaswa”

Tanga Igitekerezo

Email yanyu ntigaragazwa ku rubuga. Amazina na Email ni ngombwa.