25°C , Mostly cloudy | Kigali-Rwanda

AU yihanganishije u Rwanda n’ibindi bihugu byibasiwe n’ibiza

Yanditswe na NTAWITONDA JEAN CLAUDE

Ku ya 18-05-2020 saa 12:49:32

Umuryango w’Ubumwe bw’Afurika (AU) wihanganishije u Rwanda nyuma y’ibiza byatewe n’imvura idasanzwe yaguye mu ijoro rishyira ku wa 7 Gicurasi igatwara ubuzima bw’abantu 72, ikangiza amazu arenga 500, imihanda n’ibindi bikorwa remezo.

Leta y’u Rwanda yafashe mu mugongo imiryango y’abahitanywe n’iyo mvura, ndetse inacumbikira abasizwe iheruheru ari na ko ibagenera ibyo kurya ndetse n’ibikoresho by’isuku.

Ibiza ntibyagwiririye u Rwanda gusa kuko ibihugu by’Afurika y’Iburasirazuba bitashegejwe n’imvura byibasiwe  n’inzige zangije imyaka zigasiga amapfa adasanzwe, muri ibi bihe bitoroshye byo kwirinda Icyorezo cya Koronavirusi (COVID-19).

Perezida wa Komisiyo ya AU Moussa Faki Mahamat, yatangaje ko Umuryango w’Ubumwe bw’Afurika wifatanyije n’ibihugu byahuye n’ibiza, byiganje muri Afurika y’Iburasirazuba.

Yagize ati: “AU yifatanyije n’ibihugu birimo u Rwanda, Somalia, Kenya, Ethiopia, u Burundi, Djibouti, Tanzania, Uganda na Sudani y’Epfo, bikomeje guhangana n’ingaruka zasizwe n’imvura idasanzwe ndetse n’inzige, byiyongera ku mutwaro wo guhangana na COVID-19.”

Imvura yaguye mu Rwanda ivugwaho gusenya inzu zirenga 500, hegitari zitabarika z’imyaka zirangirika, ibiraro n’imihanda birasenyuka, imiyoboro y’amazi n’ibindi bikorwa remezo birangirika mu turere twa Nyabihu, Gakenke, Muhanga, Musanze, Ruhango na Rubavu.

N’ibitari ibyo tuzabitsinda-Kagame

Ku wa Gatandatu tariki 16 Gicurasi, ni bwo Perezida wa Repubulika y’u Rwanda Paul Kagame yasuye ibice byo mu Ntara y’Iburengerazuba byibasiwe n’ibiza, atanga ubutumwa bw’ihumure, agaragaza ko u Rwanda ruzabirenga nubwo byahuriranye n’ibihe bidasahznwe byo kwirinda Icyorezo cya Koronavirusi (COVID-19).

Perezida Kagame yasuye uduce twibasiwe n’ibiza mu Burengerazuba, mu mpera z’icyumweru gishize

Abinyujije ku rubuga rwa twitter, Perezida Kagame yagize ati: “Kuri ubu tugomba guhangana n’ikibazo cya COVID-19, n’iyangirika rikomeye ryaturutse ku mvura idasanzwe yateje imyuzure yatwaye ibiraro n’imihanda mu bice bitandukanye by’Igihugu. N’ibirenze ibi, tuzabitsinda.”

Abanyarwanda ndetse n’abayobozi batandukanye ku Isi bahise bagaragaza akababaro batewe n’iyo nkuru mbi ariko bashimanshira ko u Rwanda ruzava muri ibyo bibazo rwemye.

Umuyobozi wa Komisiyo Mpuzamahanga iharanira uburenganzira bwa Muntu (IHRC)Amb. Dr. Muhammad Shahid Amin Khan, ni umwe mu batanze ubutumwa bwo kwifatanya n’u Rwanda muri ibyo bihe bigoye

Ati:” Nyakubahwa Perezida, nyemerera mbikuye ku mutima mbihanganishe ku bahasize ubuzima ndetse no ku ngaruka ibyo biza byasize muri ibi bihe by’icyorezo. Nk’Umuyobozi wa IHRC ndagushimira imbaraga ushyira mu kwitangira Abanyarwanda.”

Uruzinduko rwa Perezida Kagame rwaje rukurikiye urwa Minisitiri muri Minisiteri Ibikorwa by’Ubutabazi (MINEMA) Kayisire Marie Solange, na Minisitiri w’Ubutegetsi bw’Igihugu (MINALOC) Prof. Shyaka Anastase, basuye uduce dutandukanye tw’Intara y’Amajyaruguru n’iy’Iburengerazuba bagahumuriza abasizwe iheruheru n’ibyo biza

Basize bagobotse abaturage mu izina rya Guverinoma batangariza babashyikiriza ubutumwa bw’ihumure bwa Perezida wa Repubulika Paul Kagame, ndetse babizeza ko Leta y’u Rwanda izakomeza kubaba hafi muri ibi bihe bitoroshye barimo.

Hatangiye imirimo yo gusana ibyangijwe n’imvura

Umwanditsi:

NTAWITONDA JEAN CLAUDE

Tanga Igitekerezo

Email yanyu ntigaragazwa ku rubuga. Amazina na Email ni ngombwa.