24°C , Intermittent clouds | Kigali-Rwanda
Abakiriya bahamya ko serivisi zitangirwa kuri ATM zituma indi mirimo bakora idahungabana(Foto Sezibera A)

ATM, serivisi abakorana na banki bafata nka konti bagendana mu biganza

Yanditswe na Sezibera Anselme

Ku ya 18-12-2018 saa 11:44:41

Uko iminsi ihita indi ikaza, ni ko abaturage bitabiriye gukorana n’amabanki bagenda begerezwa serivisi zinyuranye ziborohereza kubikuza no kubitsa hifashishijwe ibyuma bya ATM.

Abaturage batandukanye bo hirya no hino mu gihugu, babwiye Imvaho Nshya ko mbere y’umwaduko wa ATM mu Rwanda, hari ibibazo byinshi byariho, ije irabikemura.

Uwingabire Francine utuye mu Murenge wa Nyamata mu Karere ka Bugesera, avuga ko hashize imyaka igera ku 8 yitabiriye gukoresha serivisi z’ikarita ya ATM mu bikorwa byo kubikuza.

Avuga ko ubusanzwe ari umukiriya wa Banki ya Kigali (BK), akavuga ko ATM yamufashije kuba yabikuza amafaranga akayabona mu masaha yose amabanki yaba afunze.

Yagize ati: “Ni ukuri kwitabira gukoresha uburyo bw’ikarita mu kubikuza ni ibintu byaziye igihe kandi ubona bikunzwe n’abantu benshi kuko birafasha cyane kuba umukiriya yabasha kwibikuriza amafaranga mu masaha amabanki afunze nka nijoro ndetse no mu minsi ya konji.”

Yifuza ariko ko hajya hakorwa isuzuma ry’ibyo byuma kuko hari igihe bipfa na serivisi zikahazaharira abantu bakabura uko babikuza amafaranga yabo.

Agira ati: “Mu mujyi wa Nyamata ntuyemo habarizwa icyuma kimwe (cya BK) kandi abakiriya ni benshi. Iyo cyagize ikibazo nko mu mpera z’icyumweru (week-end) biratuyobera kandi dukeneye amafaranga cyane ko hari n’ubwo tuba tutitwaje ikindi cyadufasha kubikuza.”

Uwizeyimana Jean Pierre, ni umushoferi w’imodoka mu mujyi wa Kigali, akorana na we na Banki ya Kigali, BK. Avuga ko ATM zitaraza hari ubwo yakeneraga amafaranga, yagera kuri banki akagorwa no gutonda umurongo bitewe n’akazi ke katagira amasaha.

Avuga ko hari n’ubwo wasangaga amagishe yakiriye abantu benshi bishyura imisoro inyuranye, icyo gihe uwabaga yifuza kubikuza make yihuta ngo ntibyamukundiraga.

Uwizeyimana avuga ko amara nk’umwaka umwe ataragera kuri gishe akoresha ATM kandi agashimangira ko n’amafaranga bisaba atari menshi.

Avuga ko imbogamizi zishobora kugaragara muri iyo serivisi ari igihe rimwe na rimwe bakenera kubikuza cyangwa anabitsa bagasanga ibyuma byapfuye kubera ikoranabuhanga, cyangwa icyuma kikagaragaza ko cyayatanze kitayatanze bigasaba kwandika impapuro zibisobanura nazo zigafata iminsi irenze ibiri.

Abitabiriye ATM bayifata nko kugendana konti yabo mu ntoki

Umunyeshuri muri Kaminuza y’u Rwanda ishami rya Huye Migabo Joie Arestide, asobanura ko kugira ikarita ya ATM birinda umuntu kuba yagendana amafaranga mu ntoki, kandi bikagaragara nk’aho umuntu atwaye konti ye mu ntoki ayigendana aho agiye ndetse n’ikibazo iyo karita yahura na cyo ntikigire icyo gihungabanyaho konti.

Agira ati: “Umuntu akwibye ikarita yawe ya ATM atazi umubare wawe w’ibanga ntacyo yamumarira, ibyo bikongera umutekano wawe w’amafaranga.”

ATM mu magambo arambuye bivuga “Automated Teller Machine”, akaba ari icyuma k’itumanaho gifasha abantu kubona serivisi z’imari cyane kubikuza no kwishyura hatabaye guhura n’umukozi wa banki.

Mu gihe ATM ya mbere yatangiye gukoreshwa mu 1963 na Banki yo muri Leta Zunze Ubumwe z’Amerika, mu Rwanda zatangiye gukoreshwa mu myaka ya 2000 aho imikorere yazo yagenzurwaga na sosiyete yitwaga Simtel, yaje guhinduka Rswitch.

Abakiriya ba Banki ya Kigali bifuza ko ibyuma bya ATM byongerwa kuko hari ahakigaragara umubare muke wabyo(Foto Sezibera A)

Abakiriya bahamya ko serivisi zitangirwa kuri ATM zituma indi mirimo bakora idahungabana(Foto Sezibera A)

Migabo Joie Aristide, umunyeshuri muri Kaminuza y’u Rwanda i Huye, gukoresha ATM ngo ni konti ye aba agendana mu ntoki(Foto Sezibera A)

Musabyemariya Aline umaze gusobanukirwa akamaro ka ATM(Foto Sezibera A)

Musabyemariya Aline, umwe mu bakora muri Salon zitunganya imisatsi ngo agiye kwitabira serivisi zitangwa na ATM(Foto Sezibera A)

Rimwe na rimwe kudakora neza ku ibyuma bya ATM bibangamira ababikoresha mu kubikuza amafaranga yabo(Foto Sezibera A)

TANGA IGITEKEREZO

Leave a Reply

Your email address will not be published. Required fields are marked *