19°C , Partly cloudy | Kigali-Rwanda
Muhitira Felicien utangaza ko ashaka gukora amateka yegukana amasiganwa abiri azitabira mu Bufaransa

Atletisme: Muhitira arashaka gukora amateka mu masiganwa ateganya kwitabira mu Bufaransa

Yanditswe na NKOMEJE GUILLAUME

Ku ya 29-09-2018 saa 11:54:42

Muhitira Felicien uzwi nka “Magare”, umukinnyi mpuzamahanga w’imikino ngororamubiri aratangaza ko ashaka kwandika amateka mu masiganwa abiri azitabira mu gihugu cy’u Bufaransa azaba mu Kwakira 2018.

Muhitira Felicien utangaza ko ashaka gukora amateka yegukana amasiganwa abiri azitabira mu Bufaransa

Aya masiganwa ni “Sedan-Charleville” rizabera i Charleville-Mézières rireshya n’ibirometero 24, rizaba tariki 07 Ukwakira 2018 ndetse na ‘20 Km de Paris’, rizaba tariki 14 Ukwakira 2018.

Uyu mukinnyi uzaba wongera kwitabira aya masiganwa, nyuma y’uko yabikoze mu mwaka ushize wa 2017 yatangarije Imvaho Nshya ko yiteguye kuzakora ibishoboka akayatwara yombi.

Yemeza ko aya masiganwa azaba akina mu Bufaransa, akaba avuga ko azarushaho kumufasha kwitegura neza isiganwa rya Marato ya “Firenze marathon” yo mu Butaliyani rizaba rigamije gushaka ibihe bizamuhesha kuzakina shampiyona y’Isi “IAAF World Championships Doha 2019” izabera muri Qatar kuva tariki 28 Nzeri kugeza 6 Ukwakira 2019.

Ati “Aya marushanwa azamfasha kwitegura Marato nzakina tariki 25 Ugushyingo 2018 mu Butaliyani kugira ngo nzabone ibihe bizampesha itike ya shampiyona y’Isi izabera muri Qatar mu 2019”.

Mu mwaka ushize wa 2017, mu isiganwa rya ‘20 Km de Paris’ 2017 ryabaye ku tariki 8 Ukwakira 2017, Muhitira yaje ku mwanya wa 4, aho mu gusiganwa ahareshya n’ibilometero 20, yakoresheje iminota 58 n’amasegonda 43 (58’43”), arushwa na Collins Chebi ukomoka muri Kenya wabaye uwa mbere amasegonda 15 (58’:28”).

Ku rundi ruhande, Muhitira Felicien yegukanye isiganwa rya “2017 Sedan-Charleville” ryaberaga i Charleville-Mézières, ryabaye tariki 01 Ukwakira 2017, nyuma yo kuba uwa mbere, aho mu gusiganwa ahareshya n’ibirometero 24 akoresheje isaha imwe, iminota 10 n’amasegonda 4 (1h10’04’’).

 

 

TANGA IGITEKEREZO

Leave a Reply

Your email address will not be published. Required fields are marked *